وسىعان بايلانىستى وبلىستىق پروكۋراتۋرانىڭ ۇيىتقى بولۋىمەن اليمەنتكە قاتىستى بەرەشەكتى ازايتۋ ءۇشىن ۆەدومستۆوارالىق جۇمىس توبى قۇرىلدى. جۇمىس توبىنىڭ باستى ماقساتى – بالالاردىڭ قۇقىقتارىن قورعاۋ. اسىرەسە اليمەنت تولەمەي جۇرگەن بورىشكەرلەردى انىقتاپ, ولاردى جۇمىسقا ورنالاستىرۋعا ىقپال ەتۋ. وسى ماقساتتا ۋاكىلەتتى ورگاندارمەن بىرگە 10 جارمەڭكە ۇيىمداستىرىلىپ, ناتيجەسىندە, 42 بورىشكەر جۇمىسقا ورنالاستىرىلدى.
«بىرلەسىپ جۇرگىزىلگەن رەيد كەزىندە بورىشكەرلەردىڭ 17 كولىگى انىقتالدى. بورىشكەرلەر 19 بالا ءۇشىن 27,2 ملن تەڭگە اليمەنتتى تولىق تولەدى. پروكۋرورلىق ىقپال ەتۋ شارالارىمەن تولەنبەگەن اليمەنت بويىنشا 62,5 ملن تەڭگەنىڭ بەرەشەگى ءوندىرىلدى. وسىلايشا, 65 بالانىڭ قۇقىعى قورعالدى» دەپ حابارلادى وبلىستىق پروكۋراتۋرانىڭ ءباسپاسوز قىزمەتى.
پروكۋراتۋرا قىزمەتكەرلەرى-
ءنىڭ ىقپالىمەن 69 بورىشكەر اكىمشىلىك قۇقىق بۇزۋشىلىق تۋرالى كودەكستىڭ 669-بابىمەن اكىمشىلىك جاۋاپكەرشىلىككە تارتىلدى. بورىشكەردىڭ بىرەۋى قىلمىستىق كودەكستىڭ 139-بابىنا سايكەس (بالالارىن كۇتىپ-باعۋعا ارنالعان قاراجاتتى تولەۋ جونىندەگى مىندەتتەردى ورىنداماۋ) 1 جىل 6 ايعا باس بوستاندىعىنان شەكتەۋ جازاسىنا سوتتالدى. سوت ۇكىمى زاڭدى كۇشىنە ەندى. سونداي-اق بەس بورىشكەرگە قاتىستى سوتقا دەيىنگى تەرگەۋ جۇرگىزىلىپ جاتىر.
– قازىر 42 بورىشكەردىڭ كولىك باسقارۋ قۇقىعى ۋاقىتشا شەكتەلدى. ال 102 بورىشكەردىڭ شەتەلگە شىعۋ قۇقىعىنا ۋاقىتشا تىيىم سالىندى. بالالارى ءۇشىن اليمەنتىن تولەمەي جۇرگەن 185 جاۋاپسىز اكە انىقتالىپ وتىر. ولاردىڭ بەرەشەگى 290 ملن تەڭگەنى قۇرايدى. وسىعان وراي ادىلەت دەپارتامەنتى مەن جەكە سوت ورىنداۋشىلارىنىڭ وڭىرلىك پالاتاسىنا وسى باعىتتاعى جۇمىستى جانداندىرۋ ءۇشىن ناقتى مىندەتتەر قويىلىپ, سوت اكتىلەرىن ءتيىمدى ورىنداۋعا بايلانىستى نەگىزگى ماقسات ايقىندالدى, – دەپ ءمالىم ەتتى پروكۋراتۋرانىڭ ءباسپاسوز قىزمەتىنەن.
اتىراۋ قالالىق پروكۋراتۋراسىنىڭ ءبولىم پروكۋرورى ايگەرىم سابيتقىزىنىڭ مالىمەتىنشە, مۇنايلى شاھاردا تۇراتىن 153 ەر ادامنىڭ اليمەنت بويىنشا تولەنبەگەن قارىزى 195 ملن تەڭگەنى قۇراپ وتىر. سونداي بورىشكەردىڭ بىرەۋىنىڭ التى جىلدان بەرى تولەمەگەن اليمەنتى 3,5 ملن تەڭگەگە جەتكەن.
– جوعارعى سوتتىڭ ءتيىستى نورماتيۆتىك قاۋلىسىنا ەنگىزىلگەن وزگەرىستەرگە سايكەس, ەندى اليمەنت تولەمەي جۇرگەن ادامدار قىلمىستىق كودەكستىڭ 139-بابىمەن 2 جىلعا دەيىن باس بوستاندىعىنان ايىرىلادى. جاقىندا اتىراۋ قالاسىندا اليمەنت تولەۋدەن جالتارىپ جۇرگەن, 3,5 ملن تەڭگە قارىزى بار ەر ادامنىڭ ءىسى سوتقا جولداندى, – دەيدى ايگەرىم سابيتقىزى.
ونىڭ ايتۋىنشا, بۇل بورىشكەردىڭ تۇراقتى جۇمىسى بار. بىراق التى جىل بويى اليمەنتكە بەرەشەگىن تولەمەۋىنە نە سەبەپ؟ ەندى بۇل ءىستىڭ اق-قاراسى سوتتا انىقتالادى. مۇنداي جاعداي اتىراۋ قالاسىندا العاش رەت تىركەلىپ وتىر. سەبەبى بۇعان دەيىن اليمەنتكە بەرەشەگىن تولەۋدەن باس تارتىپ, جاسىرىنىپ جۇرگەن ادامدار اكىمشىلىك جازامەن عانا قۇتىلاتىن ەدى.
اتىراۋ وبلىسى
