مەملەكەتتىك قىزمەتتىڭ بەدەلىن نىعايتىپ, مەملەكەتتىك قىزمەتشىلەردىڭ بولمىسىن ناسيحاتتاۋعا ءارى ىنتالاندىرۋعا باعىتتالعان كونكۋرس جىل سايىن وتكىزىلەدى. «بيىلعى باسەكە ەرەكشە بولدى», دەيدى ۇيىمداستىرۋشىلار. ماراپاتتاۋ ءىس-شاراسى مەملەكەتتىك تىلدە وتكىزىلىپ, جىلداعى ء«داستۇردى» ارتقا تاستادى. مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباەۆ مەملەكەتتىك قىزمەت سالاسىنداعى جاڭا سىن-تەگەۋرىندەردى شەشۋدە مەملەكەتتىك قىزمەتشىنىڭ ميسسياسى اسا زور ەكەنىن اتاپ ءوتتى. «باستى ۇستانىم – ادال نيەتپەن ەلگە قىزمەت ەتۋ بولۋى كەرەك. وسى باعىتتا سانالى تۇردە جاڭعىرۋ قاجەت. مەملەكەتتىك قىزمەتشىگە ازاماتتىق سانا, ەلدىك سانا, مەملەكەتشىلدىك سانا باستى قۇندىلىق بولۋعا ءتيىس», دەدى د.جازىقباەۆ. سونىمەن قاتار ول مەملەكەتتىك قىزمەتكە كىرگەندە قابىلداناتىن انتتىڭ ماڭىزدىلىعىن اتاپ ءوتتى.
«مەملەكەتتىك قىزمەتكە كىرگەندە انت بەرۋدىڭ ماعىناسى وتە زور. بۇل ادەتتەگى فورمالدى تۇردە ورىندالاتىن ءىس-شارا بولىپ قالماۋى كەرەك. ول ۇلكەن جاۋاپكەرشىلىكتى ءوزىڭنىڭ ار-وجدانىڭمەن جاريا تۇردە قابىل الۋدى بىلدىرەدى. ونىڭ سۇراۋى دا ۇلكەن. ءاربىر مەملەكەتتىك قىزمەتشى وسىنى ەرەكشە ەسكەرۋى كەرەك. انتقا بەرىك بولۋ – ادام بويىنداعى قاسيەتتەردىڭ ۇلكەن كورىنىسى. انتتى بۇزباۋ, انتتى اتتاماۋ – ءبىزدىڭ حالىق الدىنداعى باستى پارىزىمىز», دەدى اگەنتتىك توراعاسى.
بايقاۋ جەڭىمپازدارىن ارداگەرلەر ۇيىمىنىڭ توراعاسى باقتىقوجا ىزمۇحامبەتوۆ, سەنات دەپۋتاتى نۇرتورە ءجۇسىپ, مەملەكەتتىك قىزمەت سالاسىنداعى قوعامدىق كەڭەستىڭ مۇشەلەرى ميربولات جاقىپوۆ پەن اناس باققوجاەۆ ماراپاتتادى. بيىلعى كونكۋرسقا 714 مەملەكەتتىك قىزمەتشى قاتىسقان. ولاردىڭ قاتارىندا قوستاناي وبلىسى سارىكول اۋدانى اكىمدىگىنىڭ ءبولىم باسشىسىنىڭ ورىنباسارى ارمان ۆيلياموۆ, الماتى قالاسى بويىنشا مەملەكەتتىك كىرىستەر دەپارتامەنتى باسقارماسىنىڭ باسشىسى ايجان بەكەەۆا, الماتى وبلىسى ەسكەلدى اۋدانىنىڭ اكىمى ءالي رۋستام, نۇر-سۇلتان قالاسى باس كولىك پروكۋرورىنىڭ اعا كومەكشىسى ارتۋر بايماحانوۆ, پاۆلودار وبلىسى جەر قويناۋىن پايدالانۋ, قورشاعان ورتا جانە سۋ رەسۋرستارى باسقارماسىنىڭ باس مامانى ميراس ءجۇمادىلوۆ, مەديتسينالىق قىزمەتتەر كولەمىن بولجاۋ جانە جوسپارلاۋ باسقارماسىنىڭ باسشىسى عازيز ساعيت ۇلى, اقمولا وبلىسى قوسشى قالاسىنىڭ ءبولىم باسشىسى ايناگۇل قونباي, قوستاناي وبلىسى اكىمدىگىنىڭ باسقارما باس مامانى ايدا باجيروۆا, اقتوبە وبلىسى اكىمدىگىنىڭ ءبولىم باسشىسى راسلانا سالمانوۆا, اقتوبە وبلىسى اكىمدىگىنىڭ ءبولىم باسشىسى المات ماحاي ۇزدىك دەپ تانىلدى. ال بايقاۋعا بەلسەندى قاتىسقان جانە مەملەكەتتىك قىزمەتتىڭ وڭ ءيميدجىن قالىپتاستىرۋعا ۇلەس قوسقان مەملەكەتتىك قىزمەتشىلەرگە اگەنتتىك توراعاسىنىڭ العىسحاتى مەن گراموتاسى تابىستالدى.
سونداي-اق مەملەكەتتىك قىزمەت ارداگەرى ەرسۇلتان بەكتۇرعانوۆ پەن اگەنتتىكتىڭ مەملەكەتتىك قىزمەت سالاسىنداعى باقىلاۋ دەپارتامەنتىنىڭ ديرەكتورى ەرلان ساپاروۆ «ۇزدىك مەملەكەتتىك قىزمەتشى» توسبەلگىسىن تاقتى. ورتالىق جانە جەرگىلىكتى ورگاندار اراسىنداعى ىقپالداستىقتىڭ نىعايۋىنا قوسقان ۇلەسى ءۇشىن اگەنتتىكتىڭ بىرقاتار قىزمەتشىسى نۇر-سۇلتان قالاسى اكىمىنىڭ العىسحاتىمەن ماراپاتتالدى.
سالتاناتتى ءىس-شارا كوپشىلىك الدىندا سويلەۋ, يميدجمەيكينگ, الەۋمەتتىك جەلىلەردى جۇرگىزۋ بويىنشا سەمينار-ترەنينگتەر مەن جوعارى لاۋازىمدى مەملەكەتتىك قىزمەتشىلەردىڭ قالىپتاسۋى تۋرالى سەسسيالارمەن جالعاستى. بۇعان قوسا مەملەكەتتىك قىزمەتشىلەردىڭ ينتەللەكتۋالدىق ءبىلىمىن شىڭداۋ ماقساتىندا مەملەكەتتىك ورگاندار اراسىندا العاش رەت «نە؟ قايدا؟ قاشان؟» ويىنى وتكىزىلدى.
