قىزىلوردادا بالالار ءۇيىنىڭ شاكىرتتەرى ەڭبەك ەرى اۋىلىمەن تانىستى

قىزىلوردا. 25 ءساۋىر. قىزىلورداداعى ا.س.ماكارەنكو اتىنداعى بالالار ءۇيىنىڭ تاربيلەنۋشىلەرى جەرگىلىكتى كاسىپكەر, قازاقستاننىڭ ەڭبەك ەرى ابزال ەراليەۆ باسقاراتىن «ابزال جانە ك» تولىق سەرىكتەستىگىنىڭ اۋىل شارۋاشىلىعى وندىرىسىمەن تانىستىرىلدى. بۇل تۋرالى egemen.kz ءتىلشىسى حابارلادى. وبلىستىڭ سىرداريا اۋدانى اۋماعىندا ورنالاسقان ن.ءىلياسوۆ اتىنداعى اۋىلعا بالالار ءۇيىنىڭ شاكىرتتەرى وسى ماقساتتا كەلدى. وبلىستىق كاسىپكەرلەر پالاتاسى مەن بالالار ءۇيىنىڭ باسشىلىعى ۇيىمداستىرعان بۇل كەزدەسۋدە جەتكىنشەكتەر سەرىكتەستىكتىڭ جىلى جايى مەن زامان تالابىنا ساي جابدىقتالعان 2 كۇرىش وڭدەۋ زاۋىتىنىڭ جۇمىسىن كوردى. «ابزال جانە ك» اگروفيرماسىنداعى قايناعان ەڭبەككە جانە ورناتىلعان جاڭا تەحنولوگيالارعا قىزىعا قاراپ ءارى كوكەيلەرىندەگى ساۋالدارعا قويعان وقۋشىلارعا كاسىپورىن جەتەكشىسى ەگجەي-تەگجەيلى جاۋاپ قايتاردى. بالالارعا, اسىرەسە, ا.ەراليەۆتىڭ «ءبىزدىڭ كاسىپورىن ۇلكەن تابىسقا تەك ەڭبەك ارقىلى جەتتى. سەندەر دە ءوز ماقساتتارىڭا وسى ەڭبەك پەن شىدامدىلىق, ءتوزىم ارقىلى جەتە الاتىندارىڭدى بىلۋلەرىڭ كەرەك», – دەگەن ءسوزى ايرىقشا ۇنادى. بالالاردى «ابزال جانە ك» جۇمىسىمەن تانىستىرۋعا باستاپ كەلگەن اپايلارى – پەداگوگ-پسيحولوگ اقمارال ەلدەسباەۆا: «بۇگىن ءبىزدىڭ وقۋشىلارىمىز سەرىكتەستىكتىڭ تىنىس-تىرشىلىگىنە قىزىعۋشىلىق ءبىلدىردى. بالالاردىڭ مۇنداعى كورگەندەرى   كەلەشەكتە وزدەرىنىڭ ماماندىق تاڭداۋلارىنا اسەرىن تيگىزەدى دەپ ويلايمىن», – دەدى. ال قىزىلوردا وبلىستىق كاسىپكەرلەر پالاتاسىنىڭ ديرەكتورى دىنمۇحامەد ءابساتتاروۆ  جاستاردى اۋىل شارۋاشىلىعى وندىرىسىمەن تانىستىرۋداعى نەگىزگى ماقساتتارىن تۇسىندىرە كەلىپ: «وبلىستىق كاسىپكەرلەر پالاتاسى مەن ءبىلىم بەرۋ باسقارماسى بىرلەسە جاستارعا كاسىپتىك باعدار بەرۋ شارالارىن جۇرگىزۋدە. قازىر بىلىكتى ماماندار تاپشى بولعاندىقتان, مۇنداي ءىس شارالاردىڭ ماڭىزىن ءبىلىم سالاسىنداعىلار تەرەڭ تۇسىنۋدە. سوندىقتان, كەلەشەكتە جۇيەلى تۇردە مەكتەپ وقۋشىلارىن سۇرانىسقا ساي ماماندىقتارعا بەيىمدەۋ جۇمىستارىن جالعاستىرا بەرەمىز», – دەدى. «ابزال جانە ك» سەرىكتەستىگىندەگى قايناعان ەڭبەكپەن تانىسقان جەتكىنشەكتەرگە وبلىستىق كاسىپكەرلەر پالاتاسى تاراپىنان ەستەلىك-سىيلىقتار تاپسىرىلدى. جولدىباي بازار. دەرەككوز: egemen.kz. فوتو: قىزىلوردا وبلىستىق كاسىپكەرلەر پالاتاسى.