اقتوبە وبلىسىندا بالىقتاردىڭ جاپپاي قىرىلۋى ورىن الدى

استانا. 25 ءساۋىر. اقتوبە وبلىسى اۋماعىنداعى باتپاقتى وزەنىنىڭ جاعالاۋىنان قىرىلىپ جاتقان سازان تۇقىمداس اققايران بالىقتارى تابىلدى. بۇل تۋرالى «ەكسپرەسس ك» حابارلادى. جەرگىلىكتى تۇرعىندار ءبىر اۋىزدان بالىقتاردىڭ ولۋىنە شوشقا فەرماسىنان شىعاتىن قالدىقتاردىڭ تىكەلەي اسەرى ءتيىپ وتىرعانىن ايتۋدا. تۇسىندىرە سويلەسەك, شوشقا فەرماسىنىڭ جۋىندى-شايىندىسى قۇيىلاتىن قازانشۇڭقىر ەرنەۋىنەن اسا تولعان. سودان اسىپ-توگىلگەن قالدىقتار باتپاقتى وزەنىنە قۇيىلعان. وزەنگە قۇيىلعان لاس زاتتاردان الگى بالىقتار ۋلانعان. بەستاماق اۋىلى ازاماتتارى وسىلاي دەيدى. ۇزاق جىلداردان بەرى اتالعان اۋىلدا تۇرىپ كەلە جاتقان ورىنباسار وتەگەنوۆ دەگەن 80 جاستاعى قاريا: «ەگەر شوشقا فەرماسى جاقتان جەل تۇرسا, دەم الۋ مۇمكىن بولماي قالادى. ونىڭ ۋى تەك بالىقتاردى ەمەس, مىنا اينالانىڭ ءوزىن قۇرتىپ بىتەتىن بولدى», – دەيدى قىنجىلا. قازىر ءولى بالىقتاردىڭ اعزاسى جانە وزەن سۋى تەكسەرىلۋ ۇستىندە. ورىن العان جاعداي ءتيىستى ورىنداردىڭ باقىلاۋىندا. جولدىباي بازار. دەرەككوز: «ەكسپرەسس ك». فوتو: Ohotniki.kz.