جيىندا رەسپۋبليكالىق بيۋدجەت ەسەبىنەن شالقار كولىن تازارتۋ جۇمىستارى ءجۇرىپ جاتقانى ايتىلدى (جالپى قۇنى 3,1 ملرد تەڭگە). جۇمىستىڭ 45%-ى ورىندالدى. شىعارىلاتىن تومەنگى تۇنبانىڭ كولەمى 3,0 ملن. م3 قۇرايدى, 963 مىڭ م3 تازارتىلدى. كولدى تازارتۋ سۋدىڭ ساپاسىن ارتتىرۋعا, شالقار قالاسىنىڭ حالقىن شارۋاشىلىق-تۇرمىستىق سۋمەن جابدىقتاۋ ساپاسىن جاقسارتۋعا جانە جالپى ارال ءوڭىرىنىڭ ەكولوگياسىن جاقسارتۋعا مۇمكىندىك بەرەدى.
«مينيسترلىك الداعى جىلدارى (2023-2024) جەم وزەنىنىڭ ارناسىن تازارتۋ, ويىل وزەنىن ساۋىقتىرۋ, ەلەك, قارعالى جانە جىڭىشكە وزەندەرى ارناسىن تازارتۋ, ءتۇبىن تەرەڭدەتۋ جانە جاعالاۋدى نىعايتۋ جۇمىستارىن باستاۋدى جوسپارلاپ وتىر. 2023-2025 جىلدارعا ارنالعان رەسپۋبليكالىق بيۋدجەتتى قالىپتاستىرۋ شەڭبەرىندە جوعارىدا اتالعان جوبالاردى ىسكە اسىرۋ ءۇشىن قارجى مينيسترلىگىنە بيۋدجەتتىك ءوتىنىم بەرىلدى», دەلىنگەن مينيسترلىكتىڭ ءباسپاسوز قىزمەتى تاراتقان حابارلامادا.
ايانا توعانبەك
