رەسەي ازاماتتارى پاۆەل ليتۆينەنكو, يۋري موسكۆين جانە اقتوبە قالاسىنىڭ تۇرعىنى راۆيل قازىباەۆقا قىلمىستىق كودەكستىڭ «ۇيىمداسقان توپ, قىلمىستىق ۇيىم قۇرۋ جانە ولارعا باسشىلىق ەتۋ, سول سياقتى ولارعا قاتىسۋ», «قارجىلىق (ينۆەستيتسيالىق) پيراميدانى قۇرۋ جانە وعان باسشىلىق ەتۋ» باپتارى بويىنشا ايىپ تاعىلدى.
ءىس ماتەريالىنا سۇيەنسەك, پاۆەل ليتۆينەنكو, يۋري موسكۆين جانە راۆيل قازىباەۆ 2019 جىلدىڭ قازان ايى مەن 2020 جىلدىڭ اقپان ايى ارالىعىندا قارجىلىق قىلمىس جاساعان. پاۆەل ليتۆينەنكو ۇزاق جىلدار بويى ءتۇرلى جەلىلىك ماركەتينگ ارقىلى ساتۋ-ساتىپ الۋمەن اينالىسىپ, تاجىريبە جيناعان. سول قابىلەتىن العا تارتىپ, وزگەلەردى الداپ-ارباۋ جولىن ويلاستىرىپ, قارجى پيراميداسىن قۇردى. ءسويتىپ 2019 جىلى جشس-ءىن زاڭداستىرىپ الىپ, ادامداردى كانادالىق «ASHLY» كومپانياسىنا ينۆەستيتسيا سالۋعا ۇگىتتەدى. ول ينۆەستيتسيا سالۋدىڭ 7 جولىن ۇسىنعان. ەڭ تومەنگى باعا 300 مىڭ تەڭگە بولسا, ەڭ كوبى 10 ملن تەڭگە دەپ بەلگىلەنگەن. وسىلايشا ادامدارعا 10 ملرد تەڭگەدەن استام شىعىن كەلدىردى. سوتتالۋشىلار شىعىننىڭ كوپ بولىگىن وتەگەنىمەن, ءالى دە 2,4 ملرد تەڭگەنى قايتارۋى ءتيىس.
اقتوبە قالالىق №2 سوتىندا الاياقتارعا قاتىستى ۇكىم شىقتى. پاۆەل ليتۆينەنكو 12 جىلعا باس بوستاندىعىنان ايىرىلدى. سونداي-اق ول 7 جىل بويى كوممەرتسيالىق جانە قارجىلىق ۇيىمداردا باسشىلىق قىزمەت اتقارا المايدى. يۋري موسكۆين 9 جىلعا, ال راۆيل قازىباەۆ 6 جىلعا باس بوستاندىعىنان ايىرىلدى. ولار جازاسىن قاۋىپتىلىگى ورتاشا تۇزەتۋ مەكەمەسىندە وتەيدى. سونىمەن بىرگە ءۇش سوتتالۋشى جابىرلەنۋشىلەردىڭ شىعىنىن تولىق وتەۋى ءتيىس.
سوت ۇكىمى زاڭدى كۇشىنە ەنگەن جوق.
