ساۋلەلى دياگنوستيكا – دەنساۋلىق كەپىلى

تاياۋدا كەنشىلەر استاناسىنداعى وبلىستىق كلينيكالىق اۋرۋحانانىڭ تەراپەۆتىك كورپۋسىن­دا ساۋلەلى دياگنوستيكا ورتالىعى سالتاناتتى تۇر­دە اشىلدى. مەملەكەت-جەكەمەنشىك ارىپتەستىگى نەگىزىندە اشىلعان Shipager مەديتسينالىق ورتالى­عىنا جوعارى دالدىكتەگى جانە جوعارى ءتيىمدى كت جانە مرت اپپاراتتارى قويىلعان. ايتا كەتۋ كەرەك، مۇنداعى زاماناۋي توموگرافتار قىتايدىڭ جەتەكشى مەديتسينالىق جابدىق وندىرۋشىسىنەن ساتىپ الىنعان.

بۇل اپپاراتتاردىڭ مۇمكىندىگى وتە جوعارى. مىسالى، 64 ءتىلىمى بار كت اپپاراتىنداعى ساۋلەلەنۋ­دىڭ تومەن دوزاسى ارقىلى ونكوگەماتولوگيالىق اۋرۋلارى بار پاتسيەنتتەر جان-جاقتى تەكسەرۋدەن وتە الادى. مامانداردىڭ ايتۋىنشا، وبلىستا بۇعان دەيىن مۇنداي مۇمكىندىك بولعان ەمەس.

سونىمەن قاتار باعدارلامالىق جاساقتاماعا پنەۆمونيادان كەيىنگى تالداۋ قوسىلعانىن دا ايتا كەتكەن ءجون. ەندى وكپەنىڭ زاقىمدانۋى اۆتوماتتى تۇردە ەسەپتەلەدى. سونداي-اق جۇرەك تامىرلارىنىڭ جاعدايىن دياگنوستيكالاۋعا ارنالعان ۆيرتۋالدى كوروناروگرافيا باعدارلامالارى دا بار. مۇنىڭ ءوزى جاقىن ارادا كلينيكالىق اۋرۋحانادا 30 ورىندىق كارديولوگيا بولىمشەسىن اشۋعا مۇمكىندىك بەرەدى.

MRI 1،5 Tesla اپپاراتى جوعارى دەڭگەيدە زەرتتەۋ جۇرگىزۋگە جانە ساپالى ەگجەي-تەگجەيلى سۋرەتتەر الۋعا قول جەتكىزدى. باعدارلامالىق جاساقتاما جۇم­ساق تىندەردى دە، ىشكى اعزالاردى دا تەكسەرۋگە مۇم­كىندىك بەرەدى. دارىگەرلەر ءارتۇرلى مولشەردەگى ىسىك­تەردى ەرتە كەزەڭدەردە انىقتاي الادى: مۇنداي جاع­داي ەمدەۋ تاكتيكاسىن وڭاي باسقارۋعا الىپ كەلەدى.

Shipager كومپانياسىنىڭ قۇرىلتايشىسى دەنيس پودگاينوۆ جابدىقتىڭ كەز كەلگەن دەنە سالماعى بار پاتسيەنتتەرگە ەسەپتەلگەنىن ايتادى.

– مىسالى، كت 250 كگ دەيىن، مرت 200 كگ دەيىن. ورتالىقتا رەنتگەن اپپاراتى دا بار. مامان­دار تولىقتاي دايىن، ويتكەنى بۇل مەملەكەت-جەكە­­مەنشىك ارىپتەستىگى باعدارلاماسى نەگىزىندە اشىل­عان 10-شى ورتالىق. وندا 12 دارىگەر جۇمىس ىستەيدى. زەرتتەۋلەردى قاشىقتان سيپاتتاۋعا بولادى. سون­دىقتان ءبىز قاراعاندى، الماتى جانە ماسكەۋدەن دارىگەرلەردى بۇل ىسكە جۇمىلدىردىق، – دەيدى ول.

ال قاراعاندى وبلىستىق كلينيكالىق اۋرۋحا­نا­سىنىڭ ديرەكتورى ەرجان نۇربىلاەۆ بۇگىندە وڭىردە 27 توموگرافتىڭ جۇمىس ىستەيتىنىن ايتادى. جىل سوڭىنا دەيىن ولاردىڭ سانىن 30-دان اسىرۋ جوسپارلانعان.

– وسىنداي جابدىقتار جاڭاارقا، وساكاروۆ جانە قارقارالى اۋداندارىنداعى ورتالىق اۋرۋحانالارعا دا قويىلادى. اۋىل تۇرعىندارى ءۇشىن بۇل جاعىمدى جاڭالىق. ءبىز ولارعا جوعارى مامانداندىرىلعان مەديتسينالىق كومەكتى قولجەتىمدىرەك ەتۋگە تىرىسامىز، – دەپ اتاپ ءوتتى ول.

اپتا بويى دەمالىسسىز، كۇنى-ءتۇنى جۇمىس ىستەيتىن ورتالىقتا تاۋلىگىنە 50 ناۋقاستى قابىلداۋعا مۇم­كىن­دىك بار. تەراپەۆتىك بەيىندەگى 300 توسەكتىك ورنى بار كلي­نيكادا وبلىستىڭ بارلىق جەرىنەن، اسىرەسە اۋىلدىق جەرلەردەن پاتسيەنتتەر جاتىپ، ەم الا الادى. ايتا كەتەتىن ءبىر جايت، جەرگىلىكتى تۇرعىنداردىڭ باسىم بولىگىنىڭ ءمامس اياسىندا تەگىن مەديتسينالىق قىزمەت الۋعا مۇمكىندىگى بار.

قاراعاندى وبلىسى