قوعام • 23 ماۋسىم، 2022

كوپبالالى انالار باسپانامەن قامتىلىپ جاتىر

«بىرقاباتتى شىعىس» وڭىرلىك جوباسى اياسىندا بيىل زايسان قالاسىندا 2 پاتەرلى 35 ءۇيدىڭ قۇرىلىسى قارقىندى تۇردە ءجۇرىپ جاتىر. اتالعان باعدارلاما اياسىندا 2020 جىلى ساۋىر شاعىن اۋدانىندا 18 قوس پاتەرلى 36 تۇرعىن ءۇي كوپبالالى وتباسىلارعا بەرىلگەن. 2021 جىلى ساۋىر شاعىن اۋدانىندا 62 كوپبالالى وتباسى تاعى دا «بىرقاباتتى شىعىس» باعدارلاماسىمەن 31 قوس پاتەرلى 62 تۇرعىن ۇيمەن قامتاماسىز ەتىلدى.

مەرەي قاينار ۇلى

– زايسان اۋدانىندا وڭىرلىك ء«بىر قاباتتى شىعىس» باعدارلاماسى جۇيەلى ىسكە اسىرىلىپ، كوپبالالى وتباسىلار جىل سايىن قونىس تويىن تويلاپ جاتىر. باسقا اۋداندارمەن سالىستىرساق، تۇرعىن ۇيلەردىڭ سانى مەن ساپاسى بىزدە كوش باستاپ تۇر. بيىل دا 2 پاتەرلى 35 ءۇيدى قولدانىسقا بەرۋدى جوسپارلاپ وتىرمىز. اتالعان ۇيلەر ورتالىق اۋىز سۋ، گاز، ەلەكتر جەلىلەرىنە قوسىلىپ، كارىز سۋ قۇبىرلارى تارتىلىپ بەرىلەدى، – دەيدى اۋدان اكىمىنىڭ ورىنباسارى س.تلەمەسوۆ.

جىل سايىن مەملەكەت ازاماتتاردىڭ ءال-اۋقاتىن اتتىرۋعا باعىتتالعان ءتۇرلى باعدارلامالار مەن جوبالاردى ناتيجەلى ىسكە اسىرىپ كەلەدى. اسىرەسە، شالعايداعى شەكارالىق اۋدانداردىڭ الەۋەتىن ارتتىرۋ سوڭعى ۋاقىتتا باستى نازارعا الىنىپ وتىر. شەكارالىق اۋدانداردى دامىتۋدىڭ ارنايى باعدارلاماسى دا جاسالدى.

– زايسان اۋدانى سوڭعى 2-3 جىلدا ادام ايتارلىقتاي وزگەردى. جاڭا تۇرعىن ۇيلەر بوي كوتەرىپ، قالانىڭ ءسانى مەن سالتاناتى جاراستى. زايسان قالاسىنا كىرە بەرىستەگى كوپبالالى وتباسىلارعا بەرىلگەن 2 پاتەرلى ۇيلەر بولەك ءبىر قالاشىق بولدى. تۋعان قالامىزدىڭ كوركەيىپ، گۇلدەنگەنى – ءار تۇرعىننىڭ قۋانىشى، – دەيدى قوعام بەلسەندىسى ءادىلحان كاكەەۆ.

تۇرعىن ۇيلەردىڭ كوپ سالىنۋى اۋداننىڭ الەۋمەتتىك-ەكونوميكالىق جاعدايىنىڭ تۇراقتىلىعىنىڭ ايقىن كورىنىسى. ء«بىر قاباتتى شىعىس» باعدارلاماسىنىڭ ناتيجەسىندە اۋداننىڭ دەموگرافيالىق كورسەتكىشى جىلدان جىلعا ارتىپ، حالىق سانى ءوسىپ كەلەدى.

– مەن كوپبالالى انامىن. بيىل كەزەگىم كەلىپ، جاڭادان سالىنىپ جاتقان 2 پاتەرلى 35 ءۇيدىڭ بىرەۋىن الاتىن بولدىم. جاڭا ءۇيىمىزدىڭ بولاتىنىنا بالالارىم قاتتى قۋانىپ ءجۇر. بارشا كوپبالالى وتباسىلارعا وسىنداي قۋانىش سىيلاپ، قونىس تويىن تويلاۋ مۇمكىندىگىن بەرگەن مەملەكەتىمىزگە انالىق العىسىمدى بىلدىرەمىن، – دەيدى كوپبالالى انا ا.وماروۆا.

اتالعان باعدارلاما كوپبالالى انالاردى قۋانتىپ قانا قويماي، اۋداننىڭ الەۋمەتتىك-ەكونوميكالىق دامۋىنا ۇلكەن اسەرىن تيگىزدى. قۇرىلىس زاتتارىن ساتاتىن دۇكەندەردىڭ ساۋدا اينالىمى ارتىپ، ازاماتتار جۇمىسپەن قامتىلدى. ايتا كەتسەك، ەندىگى سالىنىپ جاتقان ۇيلەر I، II توپتاعى مۇمكىندىگى شەكتەۋلى ازاماتتارعا، جەتىم بالالار مەن الەۋمەتتىك جاعىنان از قامتىلعاندارعا بەرىلمەك.

شىعىس قازاقستان وبلىسى،

زايسان اۋدانى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز