«قولدانىستاعى گەودەزيا جانە كارتوگرافيا تۋرالى زاڭ 2002 جىلى قابىلدانعان. 20 جىل ىشىندە گەودەزيا مەن كارتوگرافيا سالاسىندا ەلەۋلى وزگەرىستەر بولدى. تسيفرلىق تەحنولوگيالار, سپۋتنيك جابدىقتارى وندىرىسكە ەنگىزىلىپ, كەڭىنەن قولدانىلىپ كەلەدى. كەڭىستىك دەرەكتەرىنىڭ دالدىگىنە, ولشەۋ تيىمدىلىگىنە دەگەن تالاپتار ءوستى», دەدى تسيفرلىق دامۋ, يننوۆاتسيالار جəنە اەروعارىش ونەركəسىبى ءمينيسترى باعدات مۋسين.
ونىڭ ايتۋىنشا, سالاداعى ولقىلىقتار مەن قايشىلىقتاردى تۇزەتۋ ءۇشىن جاڭا زاڭ جوباسىن قابىلداۋ - زامان تالابى.
«گەودەزيا جانە كارتوگرافيا سالاسىنىڭ جاعدايى مەملەكەتتەگى كاداستر, جەر مەن م ۇلىك قاتىناستارىنىڭ ساپاسىنا تىكەلەي اسەر ەتۋى وتە ماڭىزدى. دەمەك, بۇل ءاربىر ازاماتتىڭ مۇددەسىن قوزعايدى. حالىقتىڭ كوپشىلىگى گەودەزيا عىلىمىمەن تانىس ەمەس. ءبىز تۇراتىن ءارى جۇمىس ىستەيتىن عيماراتتار, جۇرەتىن جولدار مەن كوپىرلەردى جوبالاۋ, سالۋ كەزىندەگى قاتەلىكتەردى جويۋ, سونداي-اق ۇشاقتاردىڭ ۇشۋى مەن قونۋى كەزىندەگى كەدەرگىلەردى انىقتاۋ جانە باسقا دا سالالار گەودەزيا ولشەمدەرىنىڭ دالدىگىنە بايلانىستى. زاڭ جوبالارىنىڭ نەگىزگى مىندەتتەرى – قازاقستان رەسپۋبليكاسىن جوعارى دالدىكتى گەودەزيا كوورديناتتار جۇيەسىمەن قامتاماسىز ەتۋ جانە ونىڭ نەگىزىندە ەلدىڭ بىرىڭعاي تسيفرلىق كارتوگرافيا نەگىزىن قۇرۋ», دەدى مينيستر.
ءمينيستردىڭ سوزىنە قاراعاندا, قازىر ەلىمىزدە كەڭەستىك ۋاقىتتان قالعان 1942 جىلعى سك-42 مەملەكەتتىك كوورديناتالار جۇيەسى ورناتىلعان. بۇل جۇيە قازىرگى زاماننىڭ تالاپتارىنا ساي ەمەس, ابدەن ەسكىرگەن, دەرەكتەردىڭ دالدىگى مەن تيىمدىلىگى تومەن. زاڭ جوباسىندا قاراستىرىلعان جاڭاشىلدىقتاردىڭ ءبىرى – ۇلتتىق كەڭىستىك دەرەكتەرى ينفراقۇرىلىمىن ەنگىزۋ. ياعني اقپاراتتار ءدال, جەدەل جانە وزەكتى بولۋى ءۇشىن كەڭىستىك دەرەكتەرى ءبىر پلاتفورمادا بىرىڭعاي فورماتتا جانە بىرىڭعاي تالاپتارعا ساي قۇرىلادى.
