شىعارماشىل دارىندى جاستارعا قولداۋ كورسەتۋ, قازاق مۋزىكاسىن ناسيحاتتاۋ ماقساتىنداعى بايقاۋدىڭ ىرىكتەۋ كەزەڭىندە 52 ۇمىتكەر ونلاين فورماتتا ءوتىنىم ءبىلدىرىپ, ونىڭ 17-ءسى ۇيىمداستىرۋ كوميتەتىنىڭ شەشىمىمەن اقتىق كەزەڭگە جولداما العان. دارىندار اراسىندا جەڭىمپازدى انىقتاۋ قازىلار القاسىنا دا وڭايعا سوقپادى. بۇل ورايدا قازىلار القاسىنىڭ توراعاسى, قازاقستاننىڭ ەڭبەك سىڭىرگەن قايراتكەرى, ءانشى, كومپوزيتور مەدەۋ ارىنباەۆ قاتىسۋشىلار دايىندىعىنىڭ جوعارى دەڭگەيدە بولعانىن, ولاردىڭ ءان تاڭداۋى, داۋىس تەحنيكاسى, ساحنا شەبەرلىكتەرى مەن جاۋاپكەرشىلىكتەرى مىقتى ەكەندىگىن اتاپ ءوتتى. ال تانىمال كومپوزيتور بەيبىت ورال ۇلى: «ماعان رەسپۋبليكالىق بايقاۋ ۇنادى. قاتىسۋشىلاردىڭ دەنى ءان ايتۋدىڭ ناعىز شەبەرلەرى دەۋگە بولادى. ولار ءتىپتى حالىقارالىق بايقاۋلارعا دا تاجىريبەلەرى جەتەتىن كاسىبي مۋزىكانتتار ەكەندىگىن دالەلدەي ءتۇستى», دەدى.
سونىمەن, الماتى وبلىسىنىڭ قاتىسۋشىسى الماگۇل باتتاليەۆا باس جۇلدە يەگەرى اتانسا, 1-ورىنعا ديدار ابدۋحالىق (شىمكەنت قالاسى), باحتيار اقىلبەك (اقتوبە وبلىسى) لايىق دەپ تانىلدى. ال 2-ورىندى تولعاناي پازىلاقىن (الماتى قالاسى) مەن ارقاس ايداربەك (باتىس قازاقستان وبلىسى) يەمدەنسە, 3-ورىن ەلۆيرا نۋرگۋجينا (نۇر-سۇلتان قالاسى) مەن اسىل جومارتوۆقا (ماڭعىستاۋ وبلىسى) جانە ەرنار اماندىققا (قىزىلوردا وبلىسى) بۇيىردى. ال نازرين مۇسا (قاراعاندى وبلىسى) مەن جاناسىل ەلۋباەۆ ( ۇلىتاۋ وبلىسى) جانە ايدانا ريزا (قوستاناي وبلىسى) بايقاۋ ديپلومانتتارى اتاندى. جەڭىمپازدارعا گران-پري كۋبوگىنان بولەك, ارنايى جۇلدەلەر مەن ديپلومدار, باعالى سىيلىقتار تابىستالدى.
تۇركىستان
