وبلىستىق سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى گۇلناز ەرباتىروۆانىڭ ايتۋىنشا, تەز دايىندالاتىن تاعامنان باس تارتقان ءجون. ويتكەنى ونى كىم, قالاي دايىندايتىنى بەيمالىم. ونىڭ ۇستىنە ءجىتى ىشەك ينفەكتسياسىنىڭ ورشۋىنە سەبەپ بولۋى مۇمكىن. ماسەلەن, بىلتىر 125 ادامنان وسىنداي ينفەكتسيا انىقتالعان. ال جىل باسىنان بەرى 105 ادام ءجىتى ىشەك ينفەكتسياسىن جۇقتىرعان.
اتالعان دەپارتامەنت باسشىسىنىڭ ورىنباسارى ءاليا بەكەشوۆانىڭ مالىمەتىنشە, وتكەن اپتادا بىرنەشە ادام ۋلانۋ دياگنوزىمەن اۋرۋحاناعا جۇگىنگەن. ۋلانعان تۇرعىندار مۇنايلى شاھارداعى س.داتوۆ كوشەسىندە ورنالاسقان جەكە يەلىكتەگى Afisha دۇڭگىرشەگىنەن قۇس ەتىنەن دايىندالعان دونەر ساتىپ العان. وسىعان بايلانىستى قالالىق پوليتسيا باسقارماسىنىڭ قىزمەتكەرلەرى تەرگەۋ امالدارىن جۇرگىزىپ جاتىر. قازىر ءتيىستى ساراپتامالار تاعايىندالدى. دۇڭگىرشەك جۇمىسىن ۋاقىتشا توقتاتتى, – دەيدى ول.
اتىراۋداعى №2 وبلىستىق اۋرۋحانانىڭ ينفەكتسيونيست دارىگەرى ادىلبەك ماحاشتىڭ مالىمەتىنشە, توعىز ناۋقاسقا تاماقتان ۋلانۋ دياگنوزى قويىلعان. ناۋقاستاردىڭ اراسىندا ءبىر وتباسىنىڭ مۇشەلەرى دە بار. اۋرۋحاناعا تۇسكەندەردىڭ كىشىسى – 1 جاس 7 ايلىق, ال ۇلكەنىنىڭ جاسى – 30-دا. قازىر ناۋقاستارعا قاجەتتى ەم-دوم شارالارى جۇرگىزىلىپ جاتىر.
ال قالالىق سانيتارلىق-ەپيدەميولوگيالىق باقىلاۋ باسقارماسىنىڭ مالىمەتىنشە, كوتەرمە جانە بولشەك ساۋدا نىساندارىنان ساراپتاما جۇرگىزۋ ءۇشىن تاۋىق ەتىنىڭ 108 ءتۇرى ساتىپ الىنعان. ساراپتاما قورىتىندىسىمەن 108 سىنامانىڭ 40 پايىزدان استامى كەدەن وداعىنىڭ تەحنيكالىق رەگلامەنتتەرىنىڭ تالاپتارىنا سايكەس بولماي شىققان.
– «ماكينسك قۇس فابريكاسى» جشس-نىڭ برويلەر-بالاپان ەتىنەن ادام ومىرىنە قاۋىپ توندىرەتىن باكتەريالىق كورسەتكىش تابىلدى. وسىعان بايلانىستى ءىرى كاسىپكەرلىك سۋبەكتىسى – «مەترو كەش ەند كەرري» جشس قىزمەتىنە جوسپاردان تىس تەكسەرۋ جۇرگىزىلدى. تەكسەرۋ كەزىندە سەرىكتەستىكتەگى ءونىم ساپاسىنىڭ تالاپقا سايكەس ەمەستىگى انىقتالدى. ساتىلىمداعى 1 توننا 597,65 كيلو برويلەر تاۋىق ەتىن جويۋ تۋرالى سانيتارلىق-ەپيدەميالىق نۇسقاما بەرىلدى, – دەپ حابارلادى اتىراۋ قالالىق سانيتارلىق-ەپيدەميولوگيالىق باقىلاۋ باسقارماسى.
ادامنىڭ ءومىرى مەن دەنساۋلىعىنا, جانۋارلار مەن قورشاعان ورتاعا قاۋىپ توندىرەتىن تاماق ونىمدەرىن جويۋ جونىندەگى كوميسسيانىڭ شەشىمىنە سايكەس قاۋىپتى تاۋىق ەتى ورتەلدى. ءونىمدى جويۋ ءىس-شاراسىنا قالالىق سانيتارلىق-ەپيدەميولوگيالىق باقىلاۋ جانە ۆەتەرينارلىق ينسپەكتسيا باسقارمالارىنىڭ ماماندارى, سونداي-اق «مەترو كەش ەند كەرري» جشس-نىڭ سەنىمدى وكىلى قاتىستى.
اتىراۋ وبلىسى
