مەملەكەت باسشىسى جاڭا قۇرىلىم جايىندا العاش رەت ناۋرىزداعى جولداۋىندا مالىمدەگەن بولاتىن. ۇلتتىق قۇرىلتاي نە ءۇشىن قۇرىلدى؟ ۇلتتىق قۇرىلتاي قوعامنىڭ بىرىگۋىن نىعايتۋ جانە كەڭەيتۋگە يدەيالار مەن قادامدار ىزدەۋ ءارى ازىرلەۋ ءۇشىن ديالوگ پلاتفورماسىنا اينالۋدى ماقسات تۇتادى. بۇرىن ۇلتتىق قوعامدىق سەنىم كەڭەسىندە الەۋمەتتىك-ەكونوميكالىق ماسەلەلەر توڭىرەگىندە پىكىرتالاستار بولسا, ۇلتتىق قۇرىلتاي كوتەرەتىن پروبلەمالار نەگىزىنەن جالپىۇلتتىق قۇندىلىقتار ارقىلى قوعامنىڭ بىرىگۋىن ارتتىرۋ بولماق. ءۇش جىل جۇمىس ىستەگەن ۇلتتىق قوعامدىق سەنىم كەڭەسى ءوز مىندەتىن ابىرويمەن اتقاردى. قوردالانعان ماسەلەلەر جوعارى مىنبەردەن ايتىلىپ, الەۋمەتتىك ماسەلەلەردىڭ كەي بولىگى شەشىلدى. ەندى وسى كەڭەسكە مۇشە بولعانداردىڭ ءبىرازى ۇلتتىق قۇرىلتايدىڭ قۇرامىنا ەندى.
تاريحقا كوز سالىپ, عاسىرلار قويناۋىنا شەگىنىس جاسايتىن بولساق, قۇرىلتاي ەجەلگى داۋىردەن باستاپ ەل مەن حالىق ماسەلەسىن شەشۋدە ۇلكەن ءرول اتقارعان. وندا, نەگىزىنەن, ۇلى حان سايلاۋ, جەرگە يەلىك ەتۋ جانە اسكەرباسى تاعايىنداۋ ماسەلەلەرى شەشىلدى. حV-ءحVىىى عاسىرلاردا تۇركى مەملەكەتتەرىندە, سونىڭ ىشىندە قازاق حاندىعىندا اسا ماڭىزدى ماسەلەلەردى شەشۋ ءۇشىن قۇرىلتاي شاقىرىلعان. وعان قاراقۇمداعى حالىق قۇرىلتايى, ورداباسى قۇرىلتايى سياقتى تاريحي دەرەكتەر ايعاق بولا الادى. حح عاسىردا ءبىزدىڭ ەلىمىزبەن بىرگە تۇرىكمەنستان, وزبەكستان, تاجىكستان سەكىلدى ورتالىق ازيا ەلدەرىندە بيلىكتىڭ جوعارى ورگانى – قۇرىلتاي بولدى. قازىرگى زاماندا قۇرىلتاي – پارتيالاردىڭ, قوزعالىستاردىڭ, تاعى دا باسقا وزگە دە قوعامدىق بىرلەستىكتەردىڭ اسا ماڭىزدى ماسەلەلەرگە بايلانىستى باسقوسۋ جيىلىسى بولىپ تابىلادى.
ساياسي رەفورمالارعا بەلسەنە كىرىسىپ, ءتيىستى رەفورمالاردى جۇرگىزىپ وتىرعان مەملەكەت باسشىسىنىڭ باتىل قادامدارىن قولدايتىن ەل-جۇرتى بىرلىك-ىنتىماق, اۋىزبىرشىلىك پەن ءوزارا سەنىمدى ىقپالداستىق ارقىلى بارلىق قيىندىقتى ەڭسەرىپ, جاڭا قازاقستاننىڭ جاڭارعان كەلبەتىن قالىپتاستىرۋعا اتسالىساتىن بولادى.
مۇحتار تاڭىربەرگەنوۆ,
«اۋىل» حدپ پارتياسىنىڭ جەتىساي اۋداندىق اۋماقتىق پارتيا ۇيىمىنىڭ توراعاسى
