تالعامپاز سۋرەتكەر ءابدىراشيت سىدىحانوۆ باتىستىق مانەردە رەاليستىك بىرنەشە تۋىندىمەن قاتار ميفكە يەك سۇيەيتىن ءتۇرلى شىعارما جازدى. ونىڭ جەكە الەمىندەگى ەڭ باستى ەرەكشەلىك – تۇستەر تراەكتورياسى. ياكي, بەينەلەۋ ونەرىندە ءبىرىنشى كەزەكتە اسەر بەرەتىن, ۆيزۋالدى تۇردە ەموتسياعا بولەيتىن, سەزۋ مۇمكىندىگىن سىيلايتىن – بوياۋ. بۇل – ايدان انىق!
ءتۇس قاشاندا ۇلكەن ماعىنالى سيمۆولدىڭ ءرولىن اتقارادى. ءتىپتى ادامدى باستاپقى كەزەڭمەن, اتا-تەگىمەن جانە ولاردىڭ ويلاۋ قاعيداسىمەن ۇندەستىرەدى. بوياۋ – سۋرەتشى ءۇشىن ادامنىڭ جان-دۇنيەسىن, سەزىمدەرى مەن ويىن ەركىن بەرە الاتىن قۇندى قۇرال.
ماسەلەن, «قورقىت اتا» كارتيناسى 1992 جىلى جارىققا شىققان. مۇندا سول كەزەڭنىڭ ءتۇسى بار. سۋرەتكەر اتى اڭىزعا اينالعان قورقىت اتا بەينەسىن ۇلكەن فيلوسوفيالىق ماعىنامەن ۇشتاستىرادى. مۇنداعى يدەيا – ماڭگىلىك ءومىر.
كومپوزيتسيادا قورقىت اسپاندا, بەينە ءبىر شەكسىز عالامدا نار ۇستىندە قىلقوبىزىمەن اۋەندەتە قالىقتاپ ۇشىپ بارادى. ءمولدىر, اشىق تۇستەرمەن بەرىلگەن اق ساقالدى اۋليە قورقىت باقسى, ماڭگىلىك سيمۆولى رەتىندە بەرىلگەن. قولىنداعى قوڭىر, قويۋ-قىزىل ءتۇستى قاسيەتتى اسپابى قىلقوبىز – سول الەمگە جولدايتىن جول, ەسىگىن اشاتىن كىلت ىسپەتتى.
باقساڭىز, سالالى ساۋساقتارىنان, التىن ءتۇستى نۇرلى ىشەگىنەن شىققان اۋەن – وكىنىش پەن قايعى, ءومىردىڭ ۋاقىتپەن عانا ولشەنەتىن قىسقا جولى. ال كوكشىل-قارا اسپان, جىلتىلداعان اق تۇسپەن تۇرتكەن نۇكتەلى داقتار شوق جۇلدىزداردى ەسكە تۇسىرەتىن تۇڭعيىق الەم, ياعني – شەكسىزدىك, ءومىردىڭ جالعاسىنا اينالعان سيمۆول بەلگى. قورقىت اتا وبرازى – ماڭگىلىك ءومىردىڭ كەيىپكەرى. كۇردەلى كومپوزيتسيانىڭ نەگىزگى كىلتى وسى.
