عىلىم • 21 ماۋسىم، 2022

قازۇۋ-دا اسقار اقاەۆ تسيفرلىق دامۋ تاقىرىبىندا ءدارىس وقىدى

48 رەت كورسەتىلدى

ءال-فارابي اتىنداعى قازاق ۇلتتىق ۋنيۆەرسيتەتىندە قىرعىز رەسپۋبليكاسىنىڭ تۇڭعىش پرەزيدەنتى، رەسەي عىلىم اكادەمياسىنىڭ اكادەميگى، م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتى جانىنداعى كۇردەلى جۇيەلەردى ماتەماتيكالىق زەرتتەۋ ينستيتۋتىنىڭ باس عىلىمي قىزمەتكەرى، پروفەسسور اقاەۆ اسقار اقاي ۇلىنىڭ كوشباسشىلىق دارىستەرى ءوتتى، دەپ حابارلايدى Egemen.kz.

عالىمنىڭ ءال-فارابي كىتاپحاناسىندا وتكەن العاشقى كوشباسشىلىق ءدارىسى «ەجەلگى داۋىردەگى دەموگرافيالىق دامۋ كورسەتكىشى جانە ادامزاتتىڭ بولاشاعى (ماتەماتيكالىق مودەلدەۋ جانە كومپيۋتەرلىك بولجاۋ)» تاقىرىبىن قامتىدى.

ستۋدەنتتەر سارايىندا وتكەن ەكىنشى ءدارىس «تسيفرلىق ەكونوميكا (نۇسقالار مەن بولجامدار)» تاقىرىبىنا ارنالدى.

كەزدەسۋدى اشقان ءال-فارابي اتىنداعى قازاق ۇلتتىق ۋنيۆەرسيتەتىنىڭ باسقارما توراعاسى – رەكتورى جانسەيىت تۇيمەباەۆ اسقار اقاي ۇلىنىڭ قىزمەتتىك جولىنا توقتالىپ،  الەمدىك عىلىمداعى جەتىستىكتەرىن اتاپ ءوتتى.

اسقار اقاەۆ ءوز دارىسىندە دامىعان وزىق مەملەكەتتەردىڭ  تسيفرلىق ەكونوميكانى قۇرۋداعى تابىستارىنا تالداۋ جاساپ،  دامۋشى ەلدەردىڭ ەكونوميكالىق باعىتتارىنا ساراپتاما جاسادى. «بۇگىندە ءداستۇرلى ەكونوميكاعا قاراعاندا، اقپارات پەن بىلىمگە نەگىزدەلگەن تسيفرلىق ەكونوميكانىڭ ماتەماتيكالىق تالداۋىمەن قارقىندى جۇمىس جۇرگىزىلۋدە. كلاسسيكالىق ەكونوميكالىق ديناميكا كوبب-دۋگلاس ءتيپىنىڭ وندىرىستىك فۋنكتسياسىنا نەگىزدەلگەن، ول ءۇش نەگىزگى فاكتورعا – كاپيتالعا، ەڭبەككە جانە تەحنولوگيالىق پروگرەسكە بايلانىستى. ەڭ قيىن مىندەت – تەحنولوگيالىق پروگرەستى مودەلدەۋ. سوندىقتان تەحنولوگيالىق پروگرەستىڭ ەكزوگەندىك جانە ەندوگەندىك مودەلدەرىن جاساعانى ءۇشىن نوبەل سىيلىعى ر.سولوۋ مەن پ. رومەرگە بەرىلدى. الايدا، بۇل مودەلدەردە اقپارات ءوندىرىسىنىڭ ديناميكاسى جوق»، – دەدى پروفەسسور.

ي

كورنەكتى عالىم اسقار اقاەۆ تسيفرلىق ەكونوميكانىڭ بۇگىنى مەن بولاشاعى تۋرالى ءوز كوزقاراسىن ۇسىنا وتىرىپ، ءوزى ازىرلەگەن تسيفرلىق داۋىرگە ارنالعان تەحنولوگيالىق پروگرەستىڭ اقپاراتتىق مودەلدەرى جانە تسيفرلىق ەكونوميكاعا ارنالعان وندىرىستىك فۋنكتسيا جايلى باياندادى. «ادام جانە ينتەللەكتۋالدى ماشينا» ۇيلەسىمى – تسيفرلىق داۋىردە ەڭ ءونىمدى كۇشكە اينالماق. وسى ستسەناريدى ىسكە اسىرۋ ءۇشىن ىرگەلى STEM-ءبىلىم الۋ قاجەتتىگى ايتىلدى.

كوشباسشىلىق دارىسىندە ۇلكەن تاجىريبەسىمەن بولىسكەن اكادەميك اسقار اقاەۆ  وقىتۋشى-پروفەسسورلار مەن ءبىلىم الۋشى جاستاردىڭ سۇراقتارىنا جاۋاپ بەردى.

جيىندا ءسوز العان قر ۇعا پرەزيدەنتى مۇرات جۇرىنوۆ اسقار اقاي ۇلىنىڭ قازاقستان رەسپۋبليكاسى ۇلتتىق عىلىم اكادەمياسىنىڭ مۇشە-اكادەميگى بولىپ قابىلدانعانىن قۋانىشپەن جەتكىزىپ، ارنايى كۋالىك تابىس ەتتى.

قازاقستان رەسپۋبليكاسى مەن قىرعىز رەسپۋبليكاسىنىڭ حالىق ءارتىسى، مەملەكەتتىك سىيلىقتىڭ لاۋرەاتى التىنبەك قورازباەۆ «نارىننان جازعان سالەم حات» ءانىن ورىنداپ، اننەن شاشۋ شاشتى.

قادىرمەندى قوناق قازۇۋ باسشىلىعىنا قوناقجايلىعى ءۇشىن العىس بىلدىرە وتىرىپ، قازاقستان مەن ورتالىق ازياداعى جەتەكشى ۋنيۆەرسيتەتتە كوشباسشىلىق ءدارىس وقىعانىنا  ريزاشىلىعىن ءبىلدىردى.

كەزدەسۋ سوڭىندا رەكتور جانسەيىت تۇيمەباەۆ قازۇۋ عىلىمي كەڭەسىنىڭ شەشىمىمەن اسقار اقاەۆتى ء«ال-فارابي اتىنداعى قازۇۋ-دىڭ التىن مەدالىمەن ماراپاتتادى.

كوشباسشىلىق دارىستەرگە قر ۇعا اكادەميكتەرى، بەلگىلى عالىمدار، عزي باسشىلارى، قازۇۋ ديرەكتورلار كەڭەسىنىڭ مۇشەلەرى، قالامگەرلەر، ونەر قايراتكەرلەرى، باق وكىلدەرى، ءبىلىم ورداسىنىڭ وقىتۋشى-پروفەسسورلار قۇرامى مەن ستۋدەنتتەرى قاتىستى.

سونداي-اق قۇرمەتتى قوناق ساپار بارىسىندا قازۇۋ مۋزەيىمەن تانىسىپ، سوڭعى ۇلگىدەگى وقۋ عيماراتتارىن، جاڭارعان اۋديتوريالاردى، عىلىمي لابوراتوريا مەن زەرتتەۋ ورتالىقتارىن ارالادى.

ايانا توعانبەك

سوڭعى جاڭالىقتار

قازاقستاندا قانشا ادام ۆاكتسينا الدى

كوروناۆيرۋس • بۇگىن، 10:42

ۇقساس جاڭالىقتار