قازىرگى تاڭدا پروكۋراتۋرا ورگاندارىندا الماتى, شىمكەنت قالالارى, اقتوبە, اتىراۋ, الماتى, جامبىل, قىزىلوردا جانە شىعىس قازاقستان وبلىستارىندا قاڭتار قىرعىنى كەزىندە بولعان قيراتۋ, مەملەكەتتىك وبەكتىلەردى ورتەۋ, م ۇلىكتى جويۋ جانە تەرروريزم اكتىلەرىنە قاتىستى 5 مىڭنان استام سوتقا دەيىنگى تەرگەپ-تەكسەرۋ بار. باس پروكۋراتۋرا وكىلىنىڭ مالىمدەۋىنشە, 27 ادام ەلىمىزدىڭ ءار وڭىرىندە وسى قىلمىستاردى ۇيىمداستىرۋشى رەتىندە انىقتالعان.
ولاردىڭ اراسىندا الماتى اۋەجايىنا شابۋىل جاساپ, «كوكتوبە» تەلەمۇناراسىن باسىپ الۋعا ارەكەت جاساعاندار دا بار. سەرىك شالاباەۆتىڭ ايتۋىنشا, قاڭتار وقيعاسىندا قىلمىستىق ورتانىڭ بەلسەندىلەرى «ەرەكشە ءرول اتقارعان». «اتاپ ايتقاندا, «جابايى ارمان» لاقاپ اتىمەن تانىمال ارمان جۇماگەلديەۆ پەن ونىڭ سىبايلاستارىنىڭ بەلسەندىلىگىن ەرەكشە اتاپ وتۋگە بولادى. ولار 6 قاڭتاردا «قازاقستان» قوناق ۇيىنە كەلگەن قىلمىسكەرلەرگە Glock جانە «ماكاروۆ» تاپانشالارىن تاراتىپ, قاراماعىنداعى ادامدارعا نۇسقاۋ بەرىپ وتىرعان. سەرىكتەستەرىن 10 ادامنان تۇراتىن توپتارعا ءبولىپ, الدىن الا جوسپارلانعان قىلمىستاعى رولدەرىن انىقتاپ بەرگەن. ىشتەرىنەن «باسشىلارىن» تاعايىنداپ, ولارعا وق وتپەيتىن كەۋدەشە, قورعانىس قۇرالدارى, اتىس قارۋى جانە 200 مىڭ تەڭگە اقشا بەرگەن. ال قاتارداعى سەرىكتەستەرى سۋىق قارۋمەن, دۋبينكا جانە دەنەگە زيان كەلتىرۋگە بولاتىن باسقا زاتتارمەن قارۋلانعان», دەپ مالىمدەگەن باس پروكۋراتۋرانىڭ 1-قىزمەت باسشىسى قىلمىستىق توپ مۇشەلەرىنىڭ ەرەكشە بەلگىلەرى – بىلەكتەرىنە تاققان اق ماتا بولعانىن اتاپ كورسەتتى.
قارۋلى قىلمىستىق توپتار قالانىڭ ءار جەرىنەن 24 ازاماتتى ۇرلاپ اكەتىپ, ولاردى ۇرىپ-سوعىپ, Ritz Carlton جانە «قازاقستان» قوناق ۇيلەرىنىڭ جەرتولەسىندە كۇشپەن ۇستاعان. كەيىننەن «تۇتقىندارىن» قالا شەتىنە جەتكىزگەن قىلمىسكەرلەر قارۋلى كۇزەت قويىپ, ولاردى مەتالل كونتەينەردە قاماپ ۇستاعان. وكىنىشكە قاراي, اۋىر سوققىدان جابىرلەنۋشىلەردىڭ ءبىرى قايتىس بولدى.
بۇگىندە وسى قىلمىستارعا قاتىسى بار 40 كۇدىكتى قاماۋعا الىنعان بولسا, قىلمىستىق توپتىڭ قالعان مۇشەلەرىن انىقتاۋ بويىنشا جۇمىس جالعاسۋدا. سونداي-اق ارنايى پروكۋرورلار كۇش قۇرىلىمدارىنىڭ جەكەلەگەن باسشىلارىنا قاتىستى تەرگەۋدى جالعاستىرىپ جاتىر.
باس پروكۋراتۋرا تاراتقان مالىمەتكە قاراعاندا, 5 قاڭتاردا جۇمىس ورنىن, ونىڭ ىشىندە قارۋ ساقتايتىن قويمالاردى قاراۋسىز تاستاپ كەتكەن الماتى جانە جامبىل وبلىستارىنىڭ پوليتسيا دەپارتامەنتتەرى, سونداي-اق الماتى, قىزىلوردا جانە الماتى وبلىستارىنىڭ ۇلتتىق قاۋىپسىزدىك كوميتەتى دەپارتامەنتتەرى باسشىلارىنىڭ بارلىعى كۇدىكتى دەپ تانىلعان. بۇل فاكتىلەر بويىنشا قوزعالعان قىلمىستىق ءىس سانى 9-عا جەتكەن.
«قازىرگى ۋاقىتتا سوت سانكتسياسىمەن قاڭتار وقيعالارىنا قاتىسى بار 514 كۇدىكتى قاماۋدا وتىر. ولاردىڭ ارقايسىسى بويىنشا اۋىر قىلمىستارعا قاتىستىلىعى تۋرالى مالىمەتتەر جەتكىلىكتى. جەكە باسىن, دەنساۋلىق جاعدايىن جانە باسقا دا ءمان-جايلاردى ەسكەرە وتىرىپ, 284 ادامنىڭ قاماۋدا ۇستاۋ بۇلتارتپاۋ شاراسى ەشقايدا كەتپەۋ تۋرالى قولحاتقا, كەپىلگە, ءۇي قاماققا جانە جەكە كەپىلگەرلىككە اۋىستىرىلدى. بۇگىنگى كۇنى 392 قىلمىستىق ءىس سوتقا جولدانىپ, 433 ادام ءتۇرلى جازاعا تارتىلدى», دەپ اتاپ ءوتتى سەرىك شالاباەۆ.
ول سونداي-اق مەملەكەت باسشىسىنىڭ اۋىرلاتاتىن ءمان-جايلار بولماعان كەزدە جازانى جەڭىلدەتۋ جونىندەگى تاپسىرماسىن ورىنداۋ ماقساتىندا پروكۋرورلاردىڭ باس بوستاندىعىنان ايىرۋعا بايلانىستى ەمەس جازالاردى تاعايىنداۋعا ەرەكشە ءمان بەرىپ وتىرعانىن جەتكىزدى. وسىلايشا, جاپپاي تارتىپسىزدىكتەرگە قاتىسۋ تۋرالى قىلمىستىق ىستەردى قاراۋ كەزىندە 34 ادام باس بوستاندىعىنان ايىرۋعا بايلانىستى ەمەس جازاعا كەسىلگەن. قارۋ ۇرلاۋ جانە ساقتاۋعا قاتىستى اۋىر قىلمىس جاساعان 46 سوتتالۋشى باس بوستاندىعىنان ايىرىلسا, قوعامدا ۇلكەن داۋ تۋدىرعان 8 ءىستى ارنايى پروكۋرورلار تەرگەۋدە. ءبىر ايتا كەتەرلىگى, بۇل ىستەر بويىنشا قۇقىق قورعاۋ جانە ارنايى ورگانداردىڭ 15 قىزمەتكەرى كۇدىكتى دەپ تانىلىپ, ونىڭ 9-ى قاماۋعا الىنعان. رەزونانستى ىستەردىڭ ىشىندە الماتى وبلىسىنداعى ۇتىكپەن كۇيدىرگەن ازاپتاۋ ءىسى دە بار. بۇگىندە بۇل قىلمىس بويىنشا جابىرلەنۋشىلەردىڭ سانى 25-كە جەتكەن.
«ولاردىڭ بارلىعى ماجبۇرلەپ مويىنداتۋ, ۇتىك باسىپ كۇيدىرۋ سەكىلدى ازاپتاۋدى قولدانۋدىڭ ۇقساس ء«تاسىلىن» سيپاتتاپ بەردى. جەدەل تەرگەۋ كەزىندە ارنايى پروكۋرورلار وسىنداي ازاپتاۋعا قاتىسى بار 5 پوليتسيا قىزمەتكەرىن انىقتاپ وتىر. ولاردىڭ ۇشەۋى كىنالارىن مويىندادى», دەپ مالىمدەدى باس پروكۋراتۋرا وكىلى. سونداي-اق جاقىندا الماتى وبلىسىنىڭ ۇقك دەپارتامەنتىنىڭ ەكى قىزمەتكەرىنە قاتىستى تەرگەۋ اياقتالدى. بۇل قىزمەتكەرلەر ۇستالعانداردىڭ ءبىرىن ۇرىپ-سوعىپ, ازاپتاۋدىڭ سالدارىنان ادام ولىمىنە اكەلىپ سوققان اۋىر قىلمىس بويىنشا كۇدىكتى دەپ تانىلعان بولاتىن.
ءوز سوزىندە سەرىك شالاباەۆ ازاپتاۋلار بويىنشا قىلمىستىق ىستەردى تەرگەۋ ەرەكشە نازاردا ۇستالاتىنىن اتاپ ءوتتى. «جابىرلەنۋشىلەردىڭ كوپشىلىگى وزدەرىن ناقتى كىمدەردىڭ ازاپتاعانىن ءدوپ باسىپ ايتا المايدى. سەبەبى كۇدىكتىلەر بەتپەردە كيىپ, ارنايى كيىم-كەشەكسىز جۇرگەن. سونداي-اق پوليتسيا عيماراتتارىنا شابۋىل جاساۋ كەزىندە قۇرال-جابدىقتار ىستەن شىققاندىقتان بەينە جازبالار دا جۇرگىزىلمەگەن. الايدا وسىنداي كەدەرگىلەرگە قاراماستان, دالەلدەمەلەردى جيناۋ باعىتىندا تەرگەۋ جانە پروتسەستىك ارەكەتتەردىڭ بارلىق كەشەندى شارالارى جۇرگىزىلدى», دەپ ءتۇسىندىرىپ ءوتتى سپيكەر.
ءوز كەزەگىندە ءىىم تەرگەۋ دەپارتامەنتىنىڭ باسشىسى سانجار ءادىلوۆ ىشكى ىستەر ورگاندارى تەرگەۋشىلەرىنىڭ 56 كۇدىكتىگە قاتىستى 553 قىلمىستىق ءىس بويىنشا جۇمىس ىستەپ جاتقانىن حابارلادى. قاماۋدان 255 كۇدىكتى بوساتىلىپ, ولارعا قوعامنان وقشاۋلاۋمەن بايلانىستى ەمەس بۇلتارتپاۋ شارالارى تاڭدالىپ الىنسا, سوت ۇكىمىمەن 332 سوتتالۋشى قاماقتان شىققان.
«بۇگىندە وندىرىستەگى قىلمىستىق ىستەر بويىنشا 14 ادام قاماۋدا وتىر. ونىڭ ىشىندە الماتى قالاسى بويىنشا – 8, الماتى وبلىسى – 3 جانە جامبىل وبلىسى 3 كۇدىكتى اۋىر قىلمىستارى ءۇشىن ۇستالعان. تەرگەۋشىلەر 565 ايىپتالۋشىعا قاتىستى 344 قىلمىستىق ءىستى سوتقا جولدادى. بۇل ىستەردىڭ باسىم بولىگى ۇرلىققا قاتىستى, بارلىعى – 257 ءىس. قارۋدى زاڭسىز ساقتاۋ – 37, قارۋ ۇرلاۋ – 18, ايداپ كەتۋگە قاتىستى 5 ءىس بار», دەپ مالىمدەدى ءىىم وكىلى.
مينيسترلىك مالىمەتتەرىندە 382 ادامنىڭ سوتتالعانى, ونىڭ ىشىندە 46 ادامنىڭ باس بوستاندىعىنان ايىرىلعانى تۋرالى ايتىلادى. سانجار ءادىلوۆتىڭ ايتۋىنشا, ولاردىڭ بارلىعى «بۇرىن سوتتالعان, كىناسىن مويىنداماعان جانە كەلتىرىلگەن زالالدى وتەمەگەن». ەڭ كوپ شىعارىلعان ۇكىم – باس بوستاندىقتى شەكتەۋ. جاساعان ىستەرىنە شىنايى وكىنىپ, زالالدى وتەگەن 330 ادامعا وسىنداي جازا تاعايىندالعان. سونىمەن قاتار ورتاشا جانە ونشا اۋىر ەمەس قىلمىستىق ىستەر بويىنشا 12 ادامعا قاتىستى ءىس تاراپتاردىڭ تاتۋلاسۋىنا بايلانىستى توقتاتىلعان.
بريفينگتە ءىىم وكىلى سوتقا جولدانعان ىستەر بويىنشا جابىرلەنۋشىلەرگە شامامەن 100 ملن تەڭگەدەن استام زالالدىڭ وتەلگەنىن اتاپ ءوتتى. «مۇنىڭ بارلىعى پوليتسيا قىزمەتكەرلەرىنىڭ ۇرلانعان م ۇلىكتى تابۋى مەن ايىپتالۋشىلاردىڭ زالالدىڭ ورنىن تولتىرۋىنىڭ ارقاسىندا جۇزەگە اسىپ وتىر», دەدى ول.
قاڭتار قىرعىنى كەزىندە ۇرلانعان دۇنيە-م ۇلىكتى, سونداي-اق زاڭسىز ساقتالعان جانە تىركەلمەگەن قارۋدى انىقتاۋ جانە الىپ قويۋ باعىتىنداعى جۇمىس ءالى دە قارقىندى جۇرگىزىلىپ كەلەدى. جۇيەلى جۇمىستىڭ ناتيجەسىندە پوليتسيا قىزمەتكەرلەرى الماتى قالاسى, الماتى جانە جامبىل وبلىستارىندا قارۋ مەن ارنايى قۇرالدار ساقتالاتىن جاسىرىن ورىندارى انىقتاعان.
ءىىم مالىمەتتەرىنە قاراعاندا «قاسىرەتتى قاڭتار» وقيعالارى كەزىندە قولدى بولعان قارۋدىڭ 1625-ءى تابىلعان. سونداي-اق ءتۇسىندىرۋ جۇمىسىنىڭ ناتيجەسىندە ازاماتتار 212 قارۋدى ءوز ەرىكتەرىمەن تاپسىرعان. الايدا قازىردىڭ وزىندە قىلمىسكەرلەردىڭ قولىندا اۋقىمدى ارسەنال – ۇرلانعان 2 مىڭنان استام قارۋ بار: 30 – گراناتا, 2 – وق اتقىش, 122 – اۆتومات پەن 379 – تاپانشا.
