«بۇگىنگى كۇنى بن-350 رەاكتورلىق قوندىرعىسىنىڭ پايدالانىلعان يادرولىق وتىنى 60 مەتالل بەتون كونتەينەرگە سالىنىپ, بۇرىنعى سەمەي يادرولىق سىناق پوليگونىنىڭ اۋماعىندا ۇزاق مەرزىمدى ساقتاۋعا ورنالاستىرىلدى. 2011 جىلدان بەرى پايدالانىلعان يادرولىق وتىندى قورعاۋ, يادرولىق جانە رادياتسيالىق قاۋىپسىزدىكتى قامتاماسىز ەتۋ جونىندەگى جۇمىستار رەسپۋبليكالىق بيۋدجەت ەسەبىنەن قارجىلاندىرىلادى. بۇل رەتتە بن-350 رەاكتورلىق قوندىرعىسىنىڭ عيماراتتارى مەن قۇرىلىستارىن قاۋىپسىز ساقتاۋ ماقساتىندا «بن-350 رەاكتورلىق قوندىرعىسىن پايدالانۋدان شىعارۋ جوباسى» تەحنيكالىق-ەكونوميكالىق نەگىزدەمەسى ازىرلەندى. وسى نەگىزدەمەگە سايكەس 114,8 ملرد تەڭگە (2022-2032 جىلدارداعى باعا) مولشەرىندە قارجىلاندىرۋ كوزدەلگەن, ونىڭ ىشىندە قۇرىلىس-مونتاجداۋ جۇمىستارى – 36 077,6 ملن تەڭگە, جابدىقتار – 48 583,3 ملن تەڭگە, باسقالارى – 30 118,6 ملن تەڭگە», دەلىنگەن ءاليحان سمايىلوۆتىڭ جاۋابىندا.
ونىڭ ايتۋىنشا, كەلەسى كەزەڭ رەاكتور قوندىرعىسىنىڭ ءبىرىنشى كونتۋرىنداعى سۇيىق مەتالل ءناتريدى جانە سۇيىق راديواكتيۆتى قالدىقتاردى وڭدەۋدىڭ ءتيىمدى جانە وڭتايلى ادىستەرى مەن تەحنولوگيالارىن تاڭداۋ بولىپ وتىر. قازىر ەنەرگەتيكا مينيسترلىگى اتوم ەنەرگياسى جونىندەگى حالىقارالىق اگەنتتىكپەن بىرلەسىپ, جىلدام نەيتروندى رەاكتورلاردى پايدالانۋدان شىعارۋ كەزىندە تۋىندايتىن پروبلەمالار جانە ولاردى شەشۋ جولدارى بويىنشا كونسۋلتاتسيالار جۇرگىزۋدە.
«حالىقارالىق ساراپشىلاردىڭ پىكىرىن ەسكەرە وتىرىپ, تەحنولوگيانى تاڭداۋ قورىتىندىلارى بويىنشا زاڭنامادا بەلگىلەنگەن تارتىپپەن بن-350 رەاكتورلىق قوندىرعىسىن ۇزاق مەرزىمدى قاۋىپسىز ساقتاۋ جاعدايىنا كەلتىرۋ جونىندەگى جۇمىستار جۇرگىزىلەدى. ناقتى جوبالار بويىنشا جۇمىستاردىڭ تۇپكىلىكتى قۇنى جوبالاۋ-سمەتالىق قۇجاتتامانى ازىرلەۋ ناتيجەلەرى بويىنشا ايقىندالادى», دەپ اتاپ ءوتتى پرەمەر-مينيستر.
