كەپىلگەر ەلدەر جابىق كەلىسسوز جۇرگىزدى. ەلىمىزدىڭ سىرتقى ىستەر مينيسترلىگىنىڭ ءباسپاسوز ورتالىعى حابارلاعانداي, تاراپتار سيرياداعى جاعدايدى, ونىڭ ىشىندە گۋمانيتارلىق جانە الەۋمەتتىك-ەكونوميكالىق احۋال, جەنەۆاداعى سيريالىق كونستيتۋتسيالىق كوميتەت جۇمىسىنىڭ جاندانۋ پەرسپەكتيۆالارى, تاراپتار اراسىنداعى سەنىمدى نىعايتۋ, كەپىلگە الىنعانداردى بوساتۋ جانە ءىز-ءتۇزسىز جوعالعانداردى ىزدەۋ ماسەلەلەرىن تالقىلاعان. كەلىسسوز قورىتىندىسى بويىنشا يران, رەسەي جانە تۇركيا بىرلەسكەن مالىمدەمە جاسادى. وندا تاراپتار سيريا اراب رەسپۋبليكاسىنىڭ ەگەمەندىگىنە, بىرلىگى مەن اۋماقتىق تۇتاستىعىنا, سونداي-اق بۇۇ جارعىسىنىڭ ماقساتتارى مەن قاعيداتتارىنا وزدەرىنىڭ تۇراقتى تۇردە بەرىلگەندىكتەرىن قۋاتتادى جانە بۇل پرينتسيپتەر جالپىعا بىردەي ساقتالۋى جانە قۇرمەتتەلۋگە ءتيىس ەكەنىن اتاپ ءوتتى.
سونىمەن قاتار كەپىلگەر-ەلدەر سيريانىڭ ءارتۇرلى ايماقتارىنداعى لاڭكەستىك ارەكەتتىڭ بارلىق ءتۇرىن ايىپتادى. «دايش, «دجابحات ان-نۋسرا» جانە ء«ال-كايدا» نەمەسە دايش-پەن بايلانىستى بارلىق تۇلعانى, توپتى, كاسىپورىن مەن ۇيىمدى جانە بۇۇ قاۋىپسىزدىك كەڭەسى وسىنداي دەپ تانىعان باسقا دا لاڭكەستىك توپتاردى تۇپكىلىكتى جويۋ ماقساتىندا ودان ءارى ىنتىماقتاستىقتىڭ قاجەتتىگىن قۋاتتادى. يدليب دەەسكالاتسيا ايماعىندا (IDZ) جانە ودان تىس جەرلەردە بەيبىت تۇرعىندارعا قاۋىپ توندىرەتىن, بۇۇ قاۋىپسىزدىك كەڭەسى مويىنداعان «حايات تاحرير اش-شام» توبىنىڭ جانە ونىمەن بايلانىسى بار باسقا دا تەرروريستىك ۇيىمداردىڭ بولۋى مەن لاڭكەستىك ارەكەتى ءبىزدى الاڭداتىپ وتىر. وسىعان وراي ءبىز يدليب دەەسكالاتسيا ايماعىنداعى جاعدايدى ءجىتى قاراستىرىپ, گۋمانيتارلىق جاعدايدى تۇراقتى قالىپقا كەلتىرۋ ءۇشىن ودان ءارى كۇش سالۋعا كەلىستىك. يدليب بويىنشا بارلىق قولدانىستاعى كەلىسىمدەردى تولىق ورىنداۋ ارقىلى «جەردەگى» تىنىشتىقتى ساقتاۋ قاجەتتىگىن اتاپ وتتىك», دەپ كورسەتتى مالىمدەمەسىندە تاراپتار.
سونداي-اق كەپىلگەر-ەلدەر حالىقارالىق قۇقىق پەن حالىقارالىق گۋمانيتارلىق قۇقىققا, سيريا مەن كورشىلەس ەلدەردىڭ ەگەمەندىگىنە قايشى كەلەتىن, ايماقتاعى تۇراقتىلىق پەن قاۋىپسىزدىككە قاۋىپ توندىرەتىن ءيزرايلدىڭ سيريادا جالعاسىپ جاتقان اسكەري شابۋىلدارىن ايىپتاپ, ولاردى توقتاتۋعا شاقىردى. مالىمدەمەدە ءيزرايلدىڭ سيريا اۋماعىنداعى اگرەسسيانى بۇركەمەلەۋ رەتىندە ازاماتتىق ۇشاقتاردى پايدالانۋى حالىقارالىق ەرەجەلەردى ورەسكەل بۇزۋ جانە بەيبىت تۇرعىنداردىڭ ومىرىنە قاۋىپ توندىرەتىنى ايتىلعان.
كەلىسسوزدەر الداعى ۋاقىتتا دا قازاقستاندا جالعاسادى. «استانا پروتسەسىنىڭ 19-كەزدەسۋى وسى جىلدىڭ ەكىنشى جارتىسىندا ەلوردادا وتەدى», دەپ مالىمدەدى قازاقستان سىرتقى ىستەر ءمينيسترىنىڭ ورىنباسارى ءادىل تۇرسىنوۆ.
استانا پروتسەسىنىڭ 18-كەزدەسۋىنە رف پرەزيدەنتىنىڭ سيريا جونىندەگى ارنايى وكىلى الەكساندر لاۆرەنتەۆ, تۇركيا دەلەگاتسياسى ءسىم كوپجاقتى دەپارتامەنتىنىڭ باس ديرەكتورى سەلدجۋك ۋنال, يران دەلەگاتسياسى ءسىم ساياسي ماسەلەلەر جونىندەگى اعا كومەكشىسى الي اسگار حادجي قاتىستى. سونداي-اق بۇۇ باس حاتشىسىنىڭ سيريا جونىندەگى ارنايى وكىلى كەڭسەسىنىڭ ساياسي ماسەلەلەر جونىندەگى باس قىزمەتكەرى روبەرت دانن, يوردانيا دەلەگاتسياسى, بۇۇ بوسقىندار ىستەرى جونىندەگى جوعارعى كوميسسارى باسقارماسىنىڭ جانە حالىقارالىق قىزىل كرەست كوميتەتىنىڭ وكىلدەرى باقىلاۋشىلار رەتىندە كەلدى.
نۇر-سۇلتانداعى كەلىسسوزدەردىڭ جۇرگىزىلۋى حالىقارالىق قوعامداستىق تاراپىنان قولداۋ تاۋىپ وتىر. ويتكەنى «استانا پروتسەسى العاش رەت سيريا ۇكىمەتى مەن قارۋلى وپپوزيتسيا وكىلدەرىن ءبىر-بىرىمەن بەتپە-بەت وتىرعىزىپ, تىلدەستىردى. بۇگىندە ەل ۇيىمداستىرعان ءىس-شارا سيرياداعى قاقتىعىستاردى تولىقتاي توقتاتىپ تاستاماسا دا, كەلىسسوزدەر ارقىلى ۋشىققان جاعدايدى ءبىرشاما جەڭىلدەتتى», دەيدى ساراپشىلار. «بىزگە استانا پروتسەسىنىڭ قاي ەلدە, قاي جەردە وتەتىنى ماڭىزدى ەمەس, ماسەلەن استانا پروتسەسىنىڭ بىرقاتار راۋندى ەل اۋماعىندا وتكەن جوق. سوچي, انكارادا ۇيىمداستىرىلدى. بۇل جەردە بىزگە ماڭىزدىسى ىدىراپ, كەرەگەسى سوگىلگەن سيرياعا كومەك بەرۋ, ونداعى قاقتىعىستاردى اۋىزدىقتاپ, حالقىنا بولاشاقتا بەيبىت ءومىر سىيلاۋ جولىنداعى ماسەلەلەردى شەشۋگە تۇرتكى بولۋ», دەدى قازاقستان ستراتەگيالىق زەرتتەۋلەر ينستيتۋتى ديرەكتورىنىڭ ورىنباسارى سانات كوشكىنباەۆ.
