ءوز سوزىندە س.شاپكەنوۆ وڭىردەگى سۋ سالاسىنىڭ جاعدايى مەن دامۋ پەرسپەكتيۆالارى تۋرالى ايتىپ, بۇل ماسەلەنىڭ اسا وزەكتى ەكەنىن اتاپ ءوتتى. ول دەپۋتاتتارعا اتىراۋ وبلىسىنداعى نەگىزگى سۋ وبەكتىلەرى اقتوبە وبلىسىنان كەلەتىن جەم, ساعىز, ويىل وزەندەرى, رەسەي فەدەراتسياسىنان باستاۋ الاتىن جايىق جانە قيعاش وزەندەرى, سونداي-اق قۇرمانعازى اۋدانىنداعى قوياندى جانە قىزىلقوعا اۋدانىنداعى تايسويعان جەر استى سۋلارىنىڭ ەكى كەن ورنى بولىپ تابىلاتىنىن ەسكە سالدى.
بايانداما بارىسىندا اتىراۋ وبلىسى حالقىنىڭ 70%-ى جايىق وزەنىنەن اۋىز سۋ الاتىنىن اتاپ ءوتتى. بۇل وبلىس ورتالىعى جانە تۇرعىنداردىڭ جالپى سانى 468 مىڭ ادامدى قۇرايتىن ءۇش اۋدان. حالىقتىڭ تاعى 24%-ى ء(ۇش اۋدان – 162 مىڭ تۇرعىن) استراحان-ماڭعىشلاق ماگيسترالدى سۋ تارتقىشىنان سۋ الادى. بۇدان باسقا, قۇبىرعا «تەڭىزشەۆرويل» (تشو), «KUS» (KarabatanUtilitySolutions), «بولاشاق» زاۋىتى (NCOC) سياقتى ءىرى ونەركاسىپتىك كاسىپورىندار, سونداي-اق شارۋا قوجالىقتارى قوسىلعان. اتىراۋ وبلىسى حالقىنىڭ قالعان 6%-ى, بۇل شامامەن 38 مىڭ ادام, تۇرعىندار سۋدى جەر استى كوزدەرىنەن الادى.
بۇگىنگى كۇنى ءوڭىر حالقىن ورتالىقتاندىرىلعان اۋىز سۋمەن قامتاماسىز ەتۋ دەڭگەيى 99,6%-دى, اۋىلدىق ەلدى مەكەندەر بويىنشا 83%-دى نەمەسە 128 اۋىل مەن كەنتتى قۇرايدى.
- الايدا, اتىراۋ قالاسى مەن ماقات اۋدانىندا حالىقتى اۋىز سۋمەن قامتاماسىز ەتەتىن سۋ تازارتۋ قۇرىلىستارى وتكەن عاسىردىڭ 30-60 جىلدارى سالىنعانىن ەسكەرگەن ءجون. قازىر ولار اپاتتى جاعدايدا تۇر. قازىردىڭ وزىندە اۋىز سۋ تاپشىلىعى بار, الداعى بەس جىلدا ونىڭ تاپشىلىعى 40%-عا دەيىن ارتۋى مۇمكىن, - دەدى س.شاپكەنوۆ.
ونىڭ ايتۋىنشا, وسىعان بايلانىستى تاعى ەكى سۋ تازارتۋ ستانتسياسىن ىسكە قوسۋ جوسپارلانۋدا. استراحان-ماڭعىشلاق ماگيسترالدىق سۋاعارىنىڭ وتكىزۋ قابىلەتىنىڭ جوسپارلى ۇلعايۋىنا قاراماستان, جۇرگىزىلگەن ەسەپ بويىنشا سۋ تاپشىلىعىنىڭ تۋىنداپ وتىرعانىن كورسەتەدى. الدىمەن حالىقتى تازا اۋىز سۋمەن قامتاماسىز ەتۋگە باسىمدىق بەرۋ قاجەت, الايدا مۇندا ءوڭىر ەكونوميكاسىنىڭ نەگىزىن قالىپتاستىراتىن ءىرى ونەركاسىپتىك كاسىپورىنداردىڭ دا ماسەلەلەرىن شەشۋ قاجەت.
سوندىقتان, سۋ وتكىزگىشتىڭ وتكىزۋ قابىلەتىن ارتتىرۋ ءۇشىن ونى قايتا جاڭارتۋدى جانە جوسپارلانعان جوندەۋ جۇمىستارىن كەشەۋىلدەتۋگە بولمايدى دەپ سانايمىز جانە سىزدەن قولداۋلارىڭىزدى سۇرايمىز, - دەدى اتىراۋ وبلىسىنىڭ اكىمى دەپۋتاتتارعا.
ول سونداي-اق, اۋىز سۋ تاپشىلىعىن شەشۋ ءۇشىن كوكجيدە تۇششى سۋ كەن ورنىنىڭ الەۋەتىن پايدالانۋ قاجەت ەكەنىن ەسكە سالدى. بۇل, ارينە, حالىقتىڭ دەنساۋلىعىن جاقسارتۋعا وڭ اسەرىن تيگىزەدى. وسىعان بايلانىستى س.شاپكەنوۆ ەكولوگيا مينيسترلىگىنە تەحنيكالىق-ەكونوميكالىق نەگىزدەمەنى بىرلەسىپ دايىنداۋ جونىندە ءوتىنىش ءبىلدىردى.
