فورۋمنىڭ اشىلۋ راسىمىندە قر يدم يندۋستريالىق دامۋ كوميتەتىنىڭ توراعاسى تۇرار جولماعامبەتوۆ ءسوز سويلەپ, بۇگىنگى وتاندىق كومىر ونەركاسىبى سالاسىنىڭ احۋالى توڭىرەگىندە باياندادى. قازىرگى تاڭدا ەلىمىزدىڭ كومىر سالاسى ەلەكتر ەنەرگياسىنىڭ شامامەن 70 پايىزىن ءوندىرىپ, كوكس-حيميا ءوندىرىسىنىڭ تولىق جۇكتەمەسىن قامتاماسىز ەتەدى. سونداي-اق كوممۋنالدىق-تۇرمىستىق سەكتور مەن ەل حالقىنىڭ وتىنعا قاجەتتىلىگىن تولىق قاناعاتتاندىرادى. سالادا 30 مىڭعا جۋىق ادام ەڭبەك ەتۋدە.
سوڭعى 30 جىلدان استام ۋاقىتتا وتاندىق كاسىپورىندار 2,7 ملرد توننادان استام كومىر وندىرگەن. شامامەن 0,8 ملرد توننا جاقىن جانە الىس شەتەلگە ەكسپورتتالدى.
قازىر ەلىمىزدە كومىر ءوندىرۋ باعىتىندا 30-عا جۋىق كاسىپورىن جۇمىس ىستەيدى. ولاردىڭ قاتارىندا «بوگاتىر كومىر» جشس, «ۆوستوچنىي» رازرەزى, «شۇباركول كومىر» اق, «ارسەلورميتتال تەمىرتاۋ» اق, «قازاقمىس كوال» اق, «قاراجىرا» اق, «مايكۋبەن ۆەست» اق سياقتى ءىرى كاسىپورىندار بار.
تۇرار جولماعامبەتوۆتىڭ ايتۋىنشا, يندۋستريا جانە ينفراقۇرىلىمدىق دامۋ مينيسترلىگى ءۇشىن ىشكى نارىقتى, ونىڭ ىشىندە حالىق پەن كوممۋنالدىق-تۇرمىستىق سەكتوردى كومىرمەن قامتاماسىز ەتۋ وتە ماڭىزدى.
«وتكەن جىلىتۋ ماۋسىمىندا مينيسترلىك سىزدەرمەن بىرلەسە كوممۋنالدىق-تۇرمىستىق سەكتوردى جانە حالىقتى كومىرمەن قامتاماسىز ەتۋ بويىنشا اۋقىمدى جۇمىس اتقاردى. ارينە, بۇل جۇمىس سىزدەردىڭ قولداۋلارىڭىزدىڭ جانە وندىرىستىك پروتسەستەردى ءتيىمدى باسقارۋدىڭ ارقاسىندا ورىندالدى. وسىلايشا, تۇتىنۋشىلاردى كومىردىڭ قاجەتتى مولشەرىمەن قامتاماسىز ەتتىك. ءبىزدىڭ مينيسترلىك ءۇشىن كومىر سالاسىنداعى الەۋمەتتىك ارىپتەستىك ماڭىزدى», دەدى تۇرار جولماعامبەتوۆ.
بۇگىندە مينيسترلىك جانىندا الەۋمەتتىك ارىپتەستىك بويىنشا سالالىق كوميسسيا جۇمىس ىستەيدى. وندا كومىر سالاسى كاسىپورىندارىنىڭ وزەكتى ماسەلەلەرى, قاۋىپسىز ەڭبەك جاعدايلارىن جاساۋ جانە وندىرىستىك جاراقاتتانۋدى تومەندەتۋ بويىنشا كومپانيالاردىڭ وڭ تاجىريبەسى قاراستىرىلادى. سونىمەن قاتار كوميسسيا الەۋمەتتىك جوبالار, كادر جانە باسقا دا ماسەلەلەردى زەردەلەيدى.
سونداي-اق تۇرار جولماعامبەتوۆ كومىرتەكتى بەيتاراپتىلىق باعىتى قازاقستاندا كومىردى تەرەڭ كەشەندى قايتا وڭدەۋ جوبالارىن ىسكە اسىرۋعا جانە كومىر حيميا سالاسىن دامىتۋعا مۇمكىندىك بەرەتىندىگىن اتاپ ءوتتى. ونىڭ پايىمداۋىنشا, كومىردەن سۇيىق جانە گاز ءتارىزدى وتىن الۋ ستراتەگياسىنا باسا نازار اۋدارۋ قاجەت.
ءوز كەزەگىندە مينيسترلىك قوسىلعان قۇنى جوعارى ونىمدەردى الۋ ءۇشىن كومىردى تەرەڭ كەشەندى وڭدەۋگە باعىتتالعان ساياساتتى ءاردايىم قولدايدى.
سونىمەن قاتار فورۋمنىڭ پلەنارلىق وتىرىسىندا «تاۋ-كەن ءوندىرۋشى جانە تاۋ-كەن مەتاللۋرگيا كاسىپورىندارىنىڭ قاۋىمداستىعى» زتب اتقارۋشى ديرەكتورى نيكولاي رادوستوۆەتس, قر ەگترم كليماتتىق ساياسات جانە جاسىل تەحنولوگيالار دەپارتامەنتىنىڭ ديرەكتورى ولجاس اعابەكوۆ, «قازاقستان ەلەكتر ەنەرگەتيكالىق قاۋىمداستىعى» زتب توراعاسى تالعات تەمىرحانوۆ جانە كومىر ءوندىرۋشى كاسىپورىنداردىڭ باسشىلارى ءسوز سويلەدى.
