الماتى قالاسى بويىنشا مەملەكەتتىك كىرىستەر دەپارتامەنتى «جەتىسۋ» كەدەن بەكەتىنىڭ قىزمەتكەرلەرىمەن وسى جىلدىڭ باسىنان باستاپ قر اقبتك-ءنىڭ 551 جانە 545-باپتارى بويىنشا 103 اكىمشىلىك ماتەريال تولتىرىلعان, سونداي-اق قىلمىستىق قۇقىق بۇزۋشىلىق بەلگىلەرى بار 13 فاكت انىقتالعان.
انىقتالعان نەمەسە دەكلاراتسيالانباعان قولما-قول اقشا قاراجاتىنىڭ سوماسى 528 ملن تەڭگەدەن استى. وسى بۇزۋشىلىقتار بويىنشا سالىنعان ايىپپۇل سوماسى 3,2 ملن تەڭگەنى قۇرادى.
وسىلايشا, قاڭتاردا «الماتى-ابۋ-دابي» باعىتىنداعى اۋە رەيسىنىڭ كەدەندىك باقىلاۋىنان وتكەننەن كەيىن ۇشىپ شىعۋ زالىندا قازاقستان ازاماتشاسى توقتاتىلدى. وندا 57 000 اقش دوللارى مولشەرىندە دەكلاراتسيالانباعان قولما-قول اقشا قاراجاتى تابىلدى.
اقپاندا «الماتى-ىستانبۇل» قاتىناسىنداعى اۋە رەيسىنە كەدەندىك باقىلاۋدى جۇزەگە اسىرعاننان كەيىن 97 000 اقش دوللارى مولشەرىندە دەكلاراتسيالانباعان قولما-قول اقشا قاراجاتى تابىلعان ەل ازاماتشاسى توقتاتىلدى. ماتەريال ەكونوميكالىق تەرگەۋ دەپارتامەنتىنە بەرىلدى. ازاماتشاعا قر قىلمىستىق كودەكسىنىڭ 234-بابى بويىنشا قىلمىستىق ءىس قوزعالدى (ەكونوميكالىق كونتراباندا).
مامىردا «سەۋل-الماتى» باعىتىنداعى اۋە رەيسىنىڭ كەدەندىك باقىلاۋىنان وتكەننەن كەيىن ۇشىپ شىعۋ زالىندا قر ازاماتشاسى توقتاتىلدى, وندا 12 000 اقش دوللارى مولشەرىندە قولما-قول اقشا قاراجاتى تابىلدى.
ماۋسىم ايىنىڭ باسىندا ۇشىپ كەلۋ زالىندا «دۋباي-الماتى» اۋە رەيسىن كەدەندىك باقىلاۋدى جۇزەگە اسىرۋ كەزىندە قر ازاماتى توقتاتىلدى, وندا جەكە تەكسەرۋ بارىسىندا 23 200 اقش دوللارى انىقتالدى. ازاماتشا اكىمشىلىك قۇقىق بۇزۋشىلىق ءۇشىن جاۋاپكەرشىلىككە تارتىلدى.
ەسكە سالا كەتەيىك, مەملەكەت باسشىسىنىڭ 2022 جىلعى 14 ناۋرىزداعى № 830 جارلىعىنا سايكەس, قازاقستان رەسپۋبليكاسىنىڭ ۇلتتىق بانكى اكەتۋ كۇنىنە بەلگىلەگەن باعام بويىنشا ەسەپتەلگەن جانە 10 000 (ون مىڭ) اقش دوللارى بالاماسىنان اساتىن سوماداعى قولما-قول شەتەل ۆاليۋتاسىن جانە (نەمەسە) شەتەل ۆاليۋتاسىنداعى اقشا قۇرالدارىن اكەتۋگە تىيىم سالىنعان.
