13 ماۋسىم ساعات 09.00-دە ەكىباستۇز قالالىق پب كەزەكشى بولىمىنە «103» جەدەل جاردەم ديسپەتچەرىنەن ەنەرگەتيكوۆ كوشەسىندەگى ءۇيدىڭ اۋلاسىندا ءۇشىنشى پودەزدىڭ جانىندا بالا جاتىر دەگەن تەلەفون حابارلاماسى كەلىپ ءتۇستى.
انىقتالعانداي, 5 جاستاعى جاس بالا اتا-اناسىنىڭ قاراۋىنسىز قالىپ, 3-قاباتتاعى اس ءۇيدىڭ اشىق تۇرعان تەرەزەسىنەن قۇلاپ كەتكەن. ءبۇلدىرشىن تۋعان كەزىنەن مۇگەدەك ەكەنى بەلگىلى بولدى. قۇلاۋ سالدارىنان بالا ءتۇرلى دەنە جاراقاتتارىن الىپ, ەكىباستۇز قالاسى اۋرۋحاناسىنىڭ جانساقتاۋ بولىمىنە جاتقىزىلدى.
«ابايسىزدا جاس بالانىڭ دەنساۋلىعىنا اۋىر نەمەسە اۋىرلىعى ورتاشا زيان كەلتىرۋگە اكەپ سوققان, جاس بالانىڭ ءومىرى مەن دەنساۋلىعىنىڭ قاۋىپسىزدىگىن قامتاماسىز ەتۋ جونىندەگى مىندەتتەردى تيىسىنشە ورىنداماعانى ءۇشىن 25 جاستاعى اكەسىنە قاتىستى قازاقستان رەسپۋبليكاسى قك-ءنىڭ 141-بابى بويىنشا سوتقا دەيىنگى تەرگەپ-تەكسەرۋ جۇرگىزىلەدى», دەپ حابارلايدى ەكىباستۇز قالاسى پوليتسيا باسقارماسىنىڭ باستىعى قايىرجان شاقارعاليەۆ.
