كونفەرەنتسياعا قازاقستان, قىرعىزستان, وزبەكستان, تاجىكستان, رەسەي, گەرمانيا, فرانتسيا مەن قىتايدىڭ بەلگىلى عالىمدارى قاتىستى.
ايتا كەتەيىك, يۋنەسكو-نىڭ ماڭىزدى جوبالارىنىڭ ءبىرى – جاھاندىق گەوپارك قۇرۋ. اتالعان ۇيىم بۇل ماسەلە بويىنشا بىرنەشە جىلدان بەرى جۇمىس ىستەپ كەلەدى. ال گەوپاركتەر – حالىقارالىق گەولوگيالىق ماڭىزى بار وبەكتىلەرى مەن لاندشافتى بار گەوگرافيالىق ايماقتار. ءوڭىردىڭ تابيعي ءھام مادەني مۇراسىن ساقتاۋ, جەرگىلىكتى وزىندىك بولمىسىن نىعايتۋ جانە تۇراقتى ءتۋريزمدى ىلگەرىلەتۋ گەوپاركتەردىڭ نەگىزگى ماقساتتارىنىڭ بىرىنە جاتادى. بۇگىندە گەوپاركتەر وڭىرلەردى دامىتۋدىڭ, جەرگىلىكتى قوعامداستىقتاردى قولداۋدىڭ جاڭا ءۇردىسى سانالادى.
جيىن بارىسىندا يۋنەسكو كلاستەرلىك كەڭسەسى جاراتىلىستانۋ عىلىمدارى ءبولىمىنىڭ مەڭگەرۋشىسى كريستيە توۆماسيان: «كونفەرەنتسيا قورىتىندىسى باي تابيعي مۇرانى, گەولوگيالىق سەكتسيالاردى, قازبا فاۋناسى مەن فلورانى ساقتاۋعا سەپتىگىن تيگىزەتىنىنە سەنىمدىمىز. وسى ءىس-شارانىڭ قورىتىندىسىندا ءبىز عىلىمدى, ءبىلىمدى جانە تۇراقتى گەوتۋريزمدى دامىتۋ ءۇشىن بىرەگەي گەولوگيالىق لاندشافتتاردى ساقتاۋدىڭ ماڭىزدىلىعىن جانە گەوپاركتەردى قۇرۋ تاجىريبەسىن كورسەتكىمىز كەلەدى», دەدى.
ونىڭ ايتۋىنشا, قازىرگى كەزەڭدە حالىقتىڭ حاباردارلىعىن ارتتىرىپ, ولاردى گەولوگيالىق مۇرانى ساقتاۋعا تارتۋ ماڭىزدى بولىپ وتىر.
سونداي-اق عالىمدار ءوز باياندامالارىندا گەوعىلىم, گەولوگيالىق ەسكەرتكىشتەر مەن گەوتۋريزمدى زەرتتەۋدەگى ەڭبەكتەرى مەن تاجىريبەلەرىن ورتاعا سالدى. ودان بولەك گەولوگيالىق مۇرانى باعالاۋ جانە پايدالانۋ ادىستەرى, وسى سالاداعى ءبىلىم بەرۋدىڭ دامۋ پەرسپەكتيۆالارى تۋرالى اڭگىمەلەپ بەردى.
بۇگىندە ورتالىق ازيادا ءالى دە گەوپاركتەر جوق. دەسەك تە مۇنداي العاشقى تابيعي ايماق «التىن ەمەل» ۇلتتىق ساياباعىنىڭ اۋماعى عانا ەمەس, سونىمەن قاتار لاندشافت ايماقتارىنىڭ الۋان تۇرلىلىگىمەن, بىرەگەي فلوراسى مەن فاۋناسىمەن تانىمال بولۋى مۇمكىن.
كونفەرەنتسيانى قازاقستان, قىرعىزستان, تاجىكستان جانە وزبەكستان بويىنشا يۋنەسكو-نىڭ كلاستەرلىك كەڭسەسى قازاقستان ۇكىمەتىنىڭ قولداۋىمەن يۋنەسكو-نىڭ ۇلتتىق گەوپاركتەر كوميتەتىمەن, تيان-شان گەولوگيالىق قوعامىمەن, QazaqGeography رەسپۋبليكالىق قوعامدىق بىرلەستىگىمەن بىرلەسىپ ۇيىمداستىردى.
كورمەنىڭ اشىلۋىندا ءسوز سويلەگەن QazaqGeography رقب باسقارما توراعاسى ورمان نۇرباەۆ يۋنەسكو-نىڭ قازاقستاننىڭ مادەنيەتىن, ءبىلىمىن جانە عىلىمىن دامىتۋعا جانە ساقتاۋعا قوسقان زور ۇلەسىن اتاپ ءوتتى.
«يۋنەسكو-مەن ءوزارا ءىس-قيمىل ەلىمىزگە وسى باعىتتار بويىنشا گۋمانيتارلىق ىنتىماقتاستىقتى دامىتۋدىڭ جاڭا دەڭگەيىنە شىعۋعا مۇمكىندىك بەردى. وسىلايشا, كلاستەرلىك بيۋرونىڭ جۇمىسىنىڭ ناتيجەسىندە بىرنەشە قازاقستاندىق قورىق پەن ۇلتتىق پارك دۇنيەجۇزىلىك بيوسفەرالىق رەزەرۆاتتاردىڭ جەلىسىنە ەندى. QazaqGeography قولداۋىمەن 2017 جىلى «التىن ەمەل» مۇتپ يۋنەسكو-نىڭ بۇكىلالەمدىك بيوسفەرالىق قورىقتار جەلىسىنە قابىلداندى», دەدى ورمان نۇرباەۆ.
كونفەرەنتسيانىڭ ەكىنشى بولىگى گەولوگيالىق پارك اۋماعىنا جوسپارلانعان دالالىق ساپارعا ارنالدى. وعان قاتىسۋشىلار ورنالاسقان جەردىڭ لاندشافتىق ەرەكشەلىكتەرىن جانە ونىڭ عىلىمي, تۋريستىك جانە مادەني الەۋەتىن زەرتتەيدى.
