ەل جاستارىنىڭ ەڭ اۋقىمدى بولىگى شوعىرلانعان مەگاپوليستىڭ بارلىق 8 اۋدانىندا دا جاستار رەسۋرستىق ورتالىقتارى جۇمىس ىستەيدى. جاستاردى جۇمىسپەن قامتۋ, ەلدىڭ ساياسي-مادەني ومىرىنە, قوعامدىق جۇمىستارعا بەيىمدەۋ ماقساتىندا قۇرىلعان جوباعا مىڭداعان ازامات تارتىلعان. قالانىڭ 14 پەن 29 جاس ارالىعىنداعى كەز كەلگەن تۇرعىنى ءوزىنىڭ تۇرعىلىقتى مەكەن-جايىنا جاقىن اۋماقتا ورنالاسقان جاستار ورتالىعىنا بارىپ, ءتۇرلى ۇيىرمەلەرگە تەگىن قاتىسىپ, باعىت-باعدار الۋ مۇمكىندىگىنە يە. تاپ وسى جازعى دەمالىس ماۋسىمىندا ەكى مىڭعا تارتا جاس «جاسىل ەل» باعدارلاماسىنا قاتىسۋعا ىنتا بىلدىرگەن.
ەرتەڭىنەن ءۇمىت كۇتكەن ەل ەڭ الدىمەن, قوعامداعى جاستار ماسەلەسىنە كوڭىل بولەتىنىن ايتقان ۆيتسە-مينيستر, قازاقستانداعى جاستار ساياساتى قوعامنىڭ ىزگىلەنۋىنە ايتارلىقتاي ۇلەس قوسىپ كەلە جاتقانىن مالىمدەدى. بۇل تۇرعىدا جاستاردى جالاڭ ۇرانشىلدىققا ەمەس, ناقتى ىستەرگە باۋلۋدىڭ ماڭىزى زور. سەبەبى بۇگىنگى جاستاردىڭ وي-ءورىسى, ساياسي تانىمى, پروگرەسكە ۇمتىلۋى مەن كوزقاراسى مۇلدە بولەك. ولار پىكىرىن اشىق ايتۋعا بەيىمدەلگەن. زامان اعىمىنا ساي جان-جاقتىلىق تا ولارعا ءتان. سوندىقتان جاڭا قازاقستاندا جاستار ساياساتى جاستاردى ساياسي قۇرال رەتىندە ەمەس, ولاردىڭ نەگىزگى ماسەلەلەرىن شەشۋگە بەيىمدەلۋى كەرەك. مەملەكەت جاستاردىڭ ساياسي ساۋاتتى بولۋىنا مۇددەلى. ەركىن فورماتتا وربىگەن باسقوسۋدا وسى ماسەلەلەر كەڭىنەن تالقىلاندى.
– ءبىزدىڭ سىزدەرمەن اشىق اڭگىمە قۇرۋداعى ماقساتىمىز جاستار رەسۋرستىق ورتالىقتارىنىڭ جۇمىسىمەن تانىسۋ ءارى ونداعى كەمشىلىكتەردى رەتتەۋ. جاستاردىڭ بەلگىلى ءبىر ماقساتقا جەتۋى جولىندا بىرىگۋى مەملەكەتتىڭ بولاشاعىن ايقىندايدى. دەموكراتيالىق مەملەكەتتە جاستار ەركىن ويلى ءھام ساياسي ساۋاتتى بولۋعا ءتيىس. مەملەكەت ومىرىندەگى كەز كەلگەن وقيعا ولاردىڭ ومىرىنەن تىس قالماۋى كەرەك. جاستارعا جاعداي جاساۋ, ولاردى دۇرىس ارناعا سالىپ جول كورسەتۋ مەملەكەتتىك ساياساتتىڭ باسىم باعىتتارىنىڭ ءبىرى. جاستاردى ەلدىڭ رۋحاني-مادەني ومىرىنە ناقتى ۇلەس قوسۋعا شاقىرامىن. ءبىلىمدى ۇرپاق – ەلدىڭ بولاشاعى, – دەدى ا. دانيلوۆ.
قالاداعى رەسۋرستىق ورتالىقتاردىڭ ەسىگى جاستار ءۇشىن ايقارا اشىق. وتكەن جىلدىڭ وزىندە جۇزدەگەن جاس ورتالىقتىڭ كومەگىمەن جۇمىسقا ورنالاسۋعا جولداما العان. اسىرەسە مۇمكىندىگى شەكتەۋلى جاستاردى قاناتتاندىرىپ, ولاردى وڭتايىنا كەلەتىن كاسىپكە باۋلۋعا مول مۇمكىندىك قاراستىرىلعان.
«قالامىزداعى جاستار رەسۋرستىق ورتالىقتارى وسكەلەڭ ۇرپاقتىڭ الەۋمەتتىك جانە تۇلعالىق دامۋىنا جاردەمدەسەتىن ءارى جاستار ۇيىمدارىنىڭ قىزمەتىنە قولداۋ كورسەتەتىن بىردەن-ءبىر ورىن. مۇندا جاستاردى جۇمىسقا تۇرۋعا دايىنداۋعا, تسيفرلى ساۋاتىن ارتتىرۋعا, يننوۆاتسيالىق جانە كاسىپكەرلىك ءبىلىمىن جانداندىرۋعا جاردەمدەسەمىز. ودان بولەك جاستارعا پاسيحولوگيالىق, كونسۋلتاتيۆتىك جانە زاڭدىق تۇرعىدان تەگىن كومەك كورسەتىلەدى. ءتۇرلى فورماتتا پىكىرتالاستار ۇيىمداستىرىپ, كوشباسشى جاستاردى ءوزىن ءوزى باسقارۋ ۇيىمدارىنا تارتامىز. ەڭ باستىسى, مەملەكەتتىك باعدارلامامەن تۇرعىن ءۇي الۋعا, عىلىمي-زەرتتەۋ باعىتىنداعى جۇمىسىن جانداندىرۋعا قولداۋ تانىتامىز. الماتى قالاسىنىڭ جاستارى وتە بەلسەندى», دەيدى الماتى قالالىق جاستار رەسۋرستىق ورتالىعىنىڭ جەتەكشىسى الما قۇرمانقىزى.
بارلىق سالانىڭ تىرشىلىگىن تۇرالاتقان پاندەميا كەزىندە الماتىلىق ەرىكتىلەر قاۋىمى قالا حالقىنا ايرىقشا قولداۋ كورسەتتى. جۇدىرىقتاي جۇمىلعان جاستار ەگدە جاستاعى تۇرعىندارعا اس-سۋ ازىرلەپ, جۇرتشىلىقتى كارانتين تالاپتارىن ساقتاۋعا شاقىردى. ءتىپتى قالا قاقپالارىنا قويىلعان وتكىزۋ بەكەتتەرىندە قاۋىپسىزدىك قۇرىلىمىنىڭ قىزمەتكەرلەرىمەن بىرگە ساپتا تۇردى.
«ۆولونتەرلىك – ءاربىر ازاماتتىڭ مىندەتى. كوپشىلىك ۆولونتەرلىكتى تەگىن قىزمەت كورسەتۋ نەمەسە بىرەۋگە جاردەمدەسۋ دەپ بىلەدى. شىنىنا كەلسەك, ءار ازامات ۆولونتەر بولۋى كەرەك. سەبەبى اينالامىزدا كومەككە مۇقتاج ادامدار كوپ. اڭگىمە تەك ماتەريالدىق كومەككە تىرەلمەيدى, جاي عانا جىلى ءسوز ايتىپ مۇڭايعانعا رۋحاني جاردەم جاساۋدىڭ ءوزى ناعىز ۆولونتەرلىك. ءارى ۇلكەن ساۋاپتى ءىس. ءار ازامات تۇرىپ جاتقان جەرىنىڭ تازالىعىن ساقتاپ, قوعامنىڭ بىرلىگىن نىعايتۋعا سوزىمەن دە, ىسىمەن ۇلەس قوسۋى كەرەك. ماسەلەن, جەردەگى قوقىستى كوتەرگەننەن ازاماتتاردىڭ ارلانباعانى دۇرىس. سايىپ كەلگەندە بۇل قوعامنىڭ ىزگىلەنۋىنە قوسىلعان ۇلەس. سوندىقتان ۆولونتەرلەر دەپ جاۋاپكەر-شىلىك پەن مىندەتتى شەكتەمەگەن ءجون. بۇل بارلىعىمىز جۇمىلا اتقاراتىن شارۋا», دەيدى بەلسەندى جاس ارۋجان اسىلبەك.
كەزدەسۋ سوڭىندا قازاقستان حالقى اسسامبلەياسىنا قاراستى ەتنو-مادەني بىرلەستىكتەردىڭ سان سالادا جەتىستىككە جەتكەن بەلسەندى جاستارى ۆەدومستۆو باسشىسىنىڭ العىس حاتتارىمەن ماراپاتتالدى.
الماتى
