ساتىلىم بويىنشا ەكىنشى اي قاتارىنان Chevrolet ماركاسى كوش باستاپ تۇر. بۇل ماركانىڭ 2 630 بىرلىگى ساتىلسا, ەكىنشى ورىندا 1 752 بىرلىك ساتىلىممەن Hyundai تۇر. Kia ديلەرلەرى 914 كولىك ساتقان. Lada اۆتوموبيلدەرى ءتورتىنشى ساتىدا تۇر: 831 بىرلىك كولىك ساتىلعان.
Camry جانە RAV4 مودەلدەرىنىڭ تاپشىلىعىنا بايلانىستى Toyota الدىڭعى پوزيتسيالارعا تالاسا الماي تۇر. الايدا LX 600 Lexus فلاگمانىنىڭ شىعۋىمەن, 251 اۆتوكولىكتى ساۋدالاپ, جەتىنشى ورىنعا تۇراقتادى. ەكىنشى بەستىك ىشىنەن ءۇش بىردەي قىتايلىق اۆتوكولىك ورىن ەنشىلەگەن. قوستانايدا قۇراستىرىلعان JAC كولىكتەرىنىڭ 297 بىرلىگى, Chery-ءدىڭ 207 بىرلىگى جانە Exeed مودەلدەرىنىڭ 100 داناسى ءوز يەسىن تاۋىپتى. ونىنشى ورىنعا 70 ساتىلىممەن Renault ورنالاسقان.
10 ۇزدىك تانىمال مودەل قاتارىندا – وتاندىق وندىرىستەگى Chevrolet Cobalt (2 042 بىرلىك), Hyundai Elantra (593) جانە Hyundai Tucson (391) بار. ودان ءارى قارايعى ورىنداردى Lada Granta (337), Hyundai Santa Fe (330), Chevrolet Nexia (303), Hyundai Sonata (284), Toyota Land Cruiser Prado (256), ليفتبەك JAC J7 (230) جانە Lada Vesta (213) كولىكتەرى يەلەنگەن.
قاۋىمداستىقتىڭ مالىمدەۋىنشە, بۇرىن رەسەيدە وندىرىلگەن تانىمال مودەلدەردىڭ تاپشىلىعىنا جانە جەتكىزۋ قيىندىعىنا بايلانىستى ەلدەگى ساتىپ الۋ كولەمى دە تومەندەگەن. رەسەيدەن كەلەتىن تەحنيكا ۇلەسى 23,2-دەن 12,9 پايىزعا دەيىن كەمىپتى. ءبىرىنشى نەسيە بيۋروسىنىڭ دەرەگىنشە, 2022 جىلدىڭ ساۋىرىندە رەسەيدەن اكەلىنگەن كولىك سانى ناۋرىزداعى كورسەتكىشتەن 2,5 ەسە از بولعان. ناۋرىزدا كورشى ەلدەن – 1 493, ساۋىردە 587 اۆتوكولىك يمپورتتالعان. بۇل 2020 جىلدىڭ مامىر ايىنان بەرى تىركەلىپ تۇرعان ەڭ تومەنگى كورسەتكىش.
بىراق ازيا ەلدەرىنەن تاسىلاتىن كولىك سانى كوبەيگەن. ماسەلەن, جاپونيادان ساۋىردە 20,7 ملن دوللارعا 1 575 بىرلىك كولىك اكەلىنسە, وڭتۇستىك كورەيادان 7,7 ملن دوللارعا 732 بىرلىك كولىك يمپورتتالىپتى. جالپى, ءساۋىر ايىندا ەل اۋماعىنا كىرگىزىلگەن كولىك سانى – 4 949. وعان 106,2 ملن دوللار قاراجات جۇمسالعان. ارينە, مۇنىڭ ءبارى تەك سالوندا عانا ساتىلاتىن سۋ جاڭا ءارى قىمبات كولىكتەر. وعان ەكىنىڭ ءبىرىنىڭ قولى جەتە بەرمەيدى. قارا حالىقتىڭ قولى جەتسىن دەپ مەملەكەت جاقىندا عانا جەڭىلدەتىلگەن اۆتونەسيە باعدارلاماسىن باستاعان. بىراق ونىڭ ءوزى داۋمەن باستالدى جانە قازىر ۋاقىتشا توقتاپ تۇر. باعدارلاما وپەراتورى – «ونەركاسىپتى دامىتۋ قورى» اق مالىمەتىنشە, 100 ملرد تەڭگە ەكىنشى دەڭگەيلى بانكتەرگە كەلەسىدەي ليميت بويىنشا بولىنگەن: «ەۋرازيالىق بانككە» – 35 ملرد تەڭگە, «بانك تسەنتركرەديتكە» – 27,5 ملرد تەڭگە, «قازاقستان حالىق بانكىنە» – 15 ملرد تەڭگە, Forte Bank-كە – 15 ملرد تەڭگە. باعدارلاما باستالعالى بانكتەر جالپى سوماسى 71 ملرد تەڭگەگە 9 575 ءوتىنىمدى ماقۇلداعان. سونىڭ ىشىندە «ەۋرازيالىق بانك» 15,6 ملرد تەڭگەگە 2 068 ءوتىنىمدى, بتسك 25,9 ملرد تەڭگەگە 3 462 ءوتىنىمدى, Halyk Bank 19,4 ملرد تەڭگەگە 2 630 ءوتىنىمدى جانە Forte Bank 9,9 ملرد تەڭگەگە 1 415 ءوتىنىمدى ماقۇلداعان.
وسىلايشا, «ەۋرازيالىق بانك» وزىنە ءبىرىنشى ترانش اياسىندا بەرىلگەن قاراجاتتى تولىق يگەرىپ, قازىر 20 ملرد تەڭگە كولەمىندەگى ەكىنشى ترانشتى الۋ پروتسەدۋراسىن وتكەرىپ جاتىر ەكەن. «قازاقستان حالىق بانكى» ءليميتتى 7,5 ملرد تەڭگەگە كوبەيتۋگە نيەتتى. قور اۆتونەسيە اياسىندا بتسك مەن فورتەنىڭ ءوتىنىم قابىلداۋدى جالعاستىرىپ جاتقانىن حابارلادى. قور ءباسپاسوز قىزمەتى سونداي-اق باعدارلامانىڭ رەۆولۆەرلىك جۇيەمەن جۇمىس ىستەيتىنىن, ياعني, زايمدار بويىنشا قايتارىلعان اقشا ەسەبىنەن بانكتەردىڭ قايتادان قوسىمشا قارجىلاندىرۋدى قاراستىراتىنىن ايتتى.
