كيەۆكە فرانتسيا, گەرمانيا جانە يتاليا باسشىلارى كەلدى. فرانتسيا پرەزيدەنتى ەممانۋەل ماكرون بۇل ساپاردى ەۋروپالىق بىرلىكتىڭ سيمۆولىنا بالادى. گەرمانيا كانتسلەرى ولاف شولتس ءوز سوزىندە بۇل ساپار ۋكرايناعا جانە ونىڭ حالقىنا كومەكتەسۋگە جانە قولداۋعا دەگەن ىنتىماق پەن نيەتتى كورسەتەتىنىن اتاپ ءوتتى. ونىڭ ايتۋىنشا, قارت قۇرلىق ۋكرايناعا قارجىلىق جانە گۋمانيتارلىق كومەك كورسەتۋدى جالعاستىرا بەرمەك. سونداي-اق كيەۆكە رۋمىنيا پرەزيدەنتى كلاۋس يوحاننەس تا كەلدى. ول ۋكراينا پرەزيدەنتى ۆولوديمير زەلەنسكيگە جانە ۋكراين حالقىنا قولداۋ ءبىلدىرۋ ءۇشىن كەلگەنىن جازدى.
ۇلىبريتانيا بارلاۋ قىزمەتى ۋكرايناداعى احۋالعا قاتىستى تىڭ مالىمەتتەرىمەن ءبولىستى. ماسەلەن, سەۆەرسكي دونەتسك وزەنىنەن سەۆەرودونەتسكىگە باراتىن ءۇش كوپىر دە قيراتىلعان. دەگەنمەن ۋكراينا اسكەري كۇشتەرىنىڭ باسىم بولىگىن قالادان شىعارىپ ۇلگەرگەن. وزەننىڭ شىعىسىنا بەكىنگەن ۋكراينالىق كۇشتەر مەن بەيبىت تۇرعىندار ءۇشىن جاعداي وتە قيىن كۇيىندە قالىپ وتىر.
سونداي-اق ۇلىبريتانيا بارلاۋ قىزمەتى رەسەيدىڭ دونباسستاعى اسكەرىنىڭ قۇرامى بىتىراپ, السىرەپ بارا جاتقانىن حابارلادى. كەلتىرىلگەن مالىمەتكە سۇيەنسەك, ادەتتە 600-800 ادامنان تۇراتىن كەيبىر باتالوندىق تاكتيكالىق كوماندالاردا 30 جاۋىنگەر عانا بار.
قازىرگى تاڭدا باستى قاقتىعىس سەۆەرودونەتسكى قالاسى ءۇشىن ءجۇرىپ جاتىر. سوندىقتان دا ەكى تاراپ تا شاعىن پەحوتالىق توپتار ارقىلى شايقاس جۇرگىزەدى. بىراق رەسەيلىكتەر تانكىسىنىڭ كوپتىگىن مۇنداي جاعدايدا قولدانا المايدى. سونىڭ سالدارىنان رەسەي اسكەرىنىڭ العا جىلجۋى باسەڭدەگەن.
«رەسەيدىڭ ۋكرايناعا باسىپ كىرۋىنەن كەيىن كۇشەيگەن جاھاندىق ازىق-ت ۇلىك داعدارىسىن ەڭسەرۋ ارەكەتتەرى قونىس اۋدارۋىنا جول بەرمەۋ ءۇشىن ماڭىزدى», دەدى بۇۇ-نىڭ بوسقىندار ءىسى جونىندەگى جوعارعى كوميسسارى فيليپپو گراندي.
ۇلىبريتانيا پرەمەر-ءمينيسترى بوريس دجونسون ۋكراينا پرەزيدەنتى ۆولوديمير زەلەنسكيمەن تەلەفون ارقىلى سويلەستى. اڭگىمە بارىسىندا الداعى ۋاقىتتا ۋكراين استىعىن ەكسپورتتاۋ ماسەلەسى ءسوز بولدى.
رەسەيدىڭ قارا تەڭىز بەن ازوۆ تەڭىزىندەگى پورتتاردى جاۋىپ تاستاۋى سالدارىنان ۋكراينا 22 ميلليون توننا استىقتى ەكسپورتتاي الماي وتىر. وتكەن اپتادا بۇۇ-داعى رەسەيدىڭ تۇراقتى وكىلى ۆاسيلي نەبەنزيا تەڭىز ارقىلى ۋكراينا استىعىن ەكسپورتتايتىن كەمەلەردىڭ قاۋىپسىزدىگىن قامتاماسىز ەتۋگە دايىن ەكەنىن مالىمدەگەن. ونىڭ سوزىنە سۇيەنسەك, الدىمەن پورت ماڭىن مينالاردان تازارتۋ كەرەك.
تۇركيانىڭ TRT تەلەارناسى رەسەي, ۋكراينا جانە تۇركيا ۋكراينا پورتتارىنان استىق ەكسپورتتاۋ ماسەلەسى بويىنشا قورعانىس مينيسترلىكتەرى ارقىلى شۇعىل بايلانىس ارناسىن قۇرعانىن حابارلادى.
رەسەي پرەزيدەنتى ۆلاديمير پۋتين بۇعان دەيىن كيەۆ ءوز پورتتارىن مينالاردان تازارتسا, ماسكەۋ ۋكرايندىق استىقتى تاسىمالدايتىن كەمەلەردىڭ كەدەرگىسىز وتۋىنە كەپىلدىك بەرەتىنىن مالىمدەگەن. سونداي-اق رەسەيدىڭ باقىلاۋىنداعى بەرديانسك جانە ماريۋپول سياقتى پورتتار ارقىلى تاۋارلاردىڭ ەكسپورتىن قامتاماسىز ەتە الاتىنىن ايتقان.
بىراق ۋكراينا تاراپى كرەملدىڭ ۋادەسىنە سەنىپ وتىرعان جوق. ساراپشىلاردىڭ ايتۋىنشا, بۇعان نەگىز جەتەرلىك. الدا-جالدا ۋكراينا پورتتى قالالارى ماڭىن مينالاردان تازارتسا, رەسەي وسى ءساتتى پايدالانىپ جاعاعا جاقىن كەلىپ سوققى جاساۋى مۇمكىن. سوندىقتان رەسمي كيەۆ باسقا مەملەكەتتەردىڭ كەپىلدىگىن تالاپ ەتىپ وتىر.
اقش ارمياسى بىرىككەن شتابىنىڭ توراعاسى مارك ءميلليدىڭ پىكىرىنشە, ۋكرايناداعى قاقتىعىس باستالعالى رەسەي اسكەرى بروندى تەحنيكاسىنىڭ 20-30 پايىزىنان ايىرىلعان. ونىڭ ايتۋىنشا, اسكەري قاقتىعىستا «جەڭىس ساندارمەن ەمەس, ولاردى دۇرىس قولدانۋمەن قامتاماسىز ەتىلەدى».
گەنەرالدىڭ سوزىنە سەنسەك, رەسەي جاۋىنگەرلەرى قارسىلاس باعىتقا بەتالدى وق جاۋدىرادى. سونىڭ سالدارىنان بەيبىت تۇرعىندار كوپتەپ زارداپ شەگىپ جاتىر. الايدا ۋكراينا جاۋىنگەرلەرىنىڭ كاسىبيلىگى جوعارى ەكەنىن جەتكىزدى. وسىلايشا, ۋكراينالىقتار ارتيللەريانى جاقسى مەڭگەرىپ, مانەۆر جاساپ, وتە ءتيىمدى اسكەري ءىس-قيمىل جاساپ وتىر.
