بۇعان دەيىن دە, ياعني 2011 جىلى «وڭتۇستىك قازاقستان وبلىسىنىڭ ەڭ ۇزدىك حيرۋرگى» اتانعان جانە رەسەيلىك «بەحتەرەۆ» اتىنداعى مەدالدىڭ يەگەرى, جوعارى ساناتتى حيرۋرگ جاڭگىرحان بيماحان ۇلى 2013 جىلى «لاپاروسكوپيالىق اپپەندەكتومياداعى جاڭا بايلاۋ ءادىسىن» ەنگىزىپ, ادىلەت مينيسترلىگىنىڭ زياتكەرلىك مەنشىك قۇقىعى كوميتەتىنەن «اۆتورلىق كۋالىك» العان بىلىكتى مامان. ال 2001 جىلى كەنتاۋ قالاسىندا جانە وڭىردەگى اۋداندار اراسىندا العاش رەت لاپاروسكوپيالىق حيرۋرگيا ەنگىزىلىپ, ورازباقوۆ باستاعان بىلىكتى ماماندار وپەراتسيا جاساۋدى قولعا العان-دى. بۇگىندە كەنتاۋدا بارلىق حيرۋرگيالىق, گينەكولوگيالىق, ۋرولوگيالىق وتالاردىڭ 30-عا جۋىق ءتۇرى ەندوۆيدەوحيرۋرگيا جولىمەن جاسالادى. سونىمەن قاتار قالالىق ورتالىق اۋرۋحانادا بيىلدان باستاپ گەمورروي اۋرۋلارىنا جوعارى ساپالى مينينۆازيۆتىك لونگو وپەراتسياسى جاسالۋدا. مۇنداي وپەراتسيالار ۇلكەن قالالاردا جانە پروكتولوگيالىق ورتالىقتاردا عانا جاسالادى ەكەن. اۋرۋحانا حيرۋرگتەرى بۇل وپەراتسيا ءتۇرىن تاجىريبە جۇزىندە وقىپ ۇيرەنىپتى. جاڭگىرحان بيماحان ۇلى لونگو وپەراتسياسى گەموررويدىڭ 3-4-ءشى ساتىسىنىڭ كلاسسيكالىق ەمدىك ءتاسىلى ەكەنىن ايتادى.
– ول كوبىنە ەۋروپالىق ەلدەردە قولدانىلادى. بۇل وپەراتسيالاردىڭ اتى – ستەپلەرلى گەموررويدوپەكسيا. شىرىشتى جانە شىرىش استى قاباتىنىڭ رەزەكتسياسى. وپەراتسيا ارنايى قۇرال-سايماندارمەن, رەزەكتسيامەن قاتار اينالاسىن تيتان سكرەپكالارىمەن تىگۋ ارقىلى ىسكە اسىرىلادى. وپەراتسيانىڭ جاسالۋ ۋاقىتى ورتاشا ەسەپپەن 20-30 مينۋتتى الادى. ەكى-ءۇش كۇندە اۋرۋ كلينيكادان شىعارىلادى. جالپى «حيرۋرگتىڭ قولى – ايەلدەردىكىندەي نازىك, كوزى – بۇركىتتىكىندەي قىراعى, جۇرەگى – ارىستانداي ايباتتى بولۋى كەرەك» دەگەن ءسوز بار. مەنىڭ وعان قوسارىم – ءسوزى دۇرىس بولۋى كەرەك. ياعني ءاربىر دارىگەر كەز كەلگەن اداممەن ءتىل تابىسىپ, سويلەسە الۋى قاجەت. حيرۋرگ بولۋ وتە قيىن. ادامنىڭ قانىن كورۋ, ونىمەن جۇمىس ىستەۋ كەز كەلگەن ادامنىڭ قولىنان كەلە بەرمەيدى. ۇلكەن جاۋاپكەرشىلىكتى تالاپ ەتەدى. ادام ومىرىنە جاۋاپتى بولاسىز. وپەراتسيا جاساماس بۇرىن قالاي بولار ەكەن دەپ ويلانىپ شىقساق, وپەراتسيادان كەيىن دە تۇنىمەن ۇيىقتاي المايتىن كەزدەرىمىز بولادى. ءدارىسىن بەرىپ, ۋكولىن سالىپ كەتەتىن باسقا سالالارعا قاراعاندا, حيرۋرگيا سالاسىنىڭ سالماعى وتە اۋىر. دەسەك تە, حيرۋرگيا بولىمشەسىنىڭ قىزمەتى – اۋرۋحانانىڭ ايناسى. حيرۋرگياسى جاقسى اۋرۋحانا جاقسى كورسەتكىشتەرگە يە بولادى, – دەيدى دارىگەر.
تۇركىستانعا قاراستى بوزبۇتاق اۋىلىندا كوپبالالى وتباسىندا دۇنيەگە كەلىپ, ورتا مەكتەپتى ۇزدىك بىتىرگەن جاڭگىرحان بيماحان ۇلى اقتوبە مەملەكەتتىك مەديتسينا ينستيتۋتىن تامامداعان سوڭ, ياعني 1990 جىلى كەنتاۋعا كەلىپ, حيرۋرگيا جانە رەانيماتسيا بولىمىنە قىزمەتكە ورنالاستى. كەيىننەن حيرۋرگيا بولىمشەسىنىڭ مەڭگەرۋشىسى قىزمەتىنە تاعايىندالدى. ال 2013 جىلدان بەرى بولىمشەگە ۋرولوگيا, گينەكولوگيا بولىمشەلەرىنىڭ قوسىلۋىنا بايلانىستى بوساتىلعان ءبولىم مەڭگەرۋشىسى قىزمەتىن اتقارۋدا. تالاي جاندى اجالدان اراشالاپ قالعان مامان بۇگىندە وڭىردەگى بىلىكتى حيرۋرگتەردىڭ بىرىنە اينالعان. جانى تازا, ەڭبەگىنە ادال دارىگەردىڭ قولى جەڭىل ەكەنىن ەستىگەندەر جەر شالعايلىعىنا قاراماستان دەرتىنە داۋا سۇراپ, جاڭگىرحاندى ادەيى ىزدەپ كەلەتىن بولعان. ء«بىز ەڭبەك جولىمىزدى باستاعان جىلدارى وپەراتسيا جاساعاندا كەڭەس سۇرايتىن مامان مۇلدە بولماعان ەدى. بار جاۋاپكەرشىلىكتى ءوز موينىمىزعا الىپ, وپەراتسيا جاسايتىنبىز. ول كەزدەگى مەديتسينالىق قۇرال-جابدىقتار مەن وقۋ قۇرالدارى دا قازىرگىمەن سالىستىرۋعا كەلمەيدى. قازىر ءبارى بار عوي. ادام دەنساۋلىعىنا قاتىستى قانداي دا ءبىر جايتتى بىلگىڭ كەلسە, عالامتورعا كىرىپ, قالاعان مالىمەتتى الاسىڭ. ال بىزدەر بولساق, مۇقاباسى اقجەمدەلگەن كىتابىمىزعا جۇگىنەتىنبىز. وسىلايشا, مەديتسينا سالاسىنداعى جاڭالىقتاردى ءوز بەتىمىزشە ىزدەنىپ, ءبىلىپ وتىرۋشى ەدىك. قازىرگى تاڭدا مەديتسينادا ءبىر اۋرۋدى ەمدەۋدىڭ ءتۇرى كۇن سايىن جاڭارىپ جاتىر. ءوز باسىم دارىگەرلەر قىزمەتىنەن قول ءۇزىپ, زەينەتكە شىققانشا وقىپ, ىزدەنىپ وتۋگە ءتيىس دەپ ويلايمىن. ويتپەگەن جاعدايدا ەلىمىزدىڭ مەديتسينا سالاسى زامان كوشىنەن قالىپ قوياتىنىن جادىمىزدان شىعارماۋىمىز كەرەك», دەيدى جاڭگىرحان بيماحان ۇلى.
تۇركىستان وبلىسى
