«بۇگىنگى ۇلتتىق قۇرىلتايعا ءبىز اتا-بابالارىمىزدىڭ ارتىندا قالدىرعان – تاتۋلىق پەن بىرلىكتىڭ بايراعىن كوتەرىپ, ادال اماناتىن ارقالاپ كەلىپ وتىرمىز. بارشا كوپۇلتتى وتانداستارىمىزدىڭ وسى يگى جولدا مەملەكەت باسشىسى قاسىم-جومارت كەمەل ۇلى توقاەۆتىڭ «بابالار اماناتىنا ادال بولىپ, ونى ۇرپاققا تابىستاۋ – مەن ءۇشىن كيەلى پارىز» دەگەن ارداقتى سوزىنەن قۋات العانى اقيقات! وعان وسىدان ەكى اپتا بۇرىن اتا زاڭىمىزعا ەنگىزىلگەن وزگەرىستەرگە ارنالىپ وتكەن رەسپۋبليكالىق رەفەرەندۋمنىڭ وڭ ناتيجەلەرى ايقىن دالەل. قازاق ەلى ءوز تاريحىنىڭ جاڭا بەلەسىنە اياق باستى», دەدى ە. قوشانوۆ.
قوشانوۆتىڭ ايتۋىنشا, 5 ماۋسىمدا وتكەن رەفەرەندۋم قازاق حالقىنىڭ اۋىزبىرشىلىگىن, ۇلتتىق باعىتتا ۇيىسا بىلەتىنىن كورسەتتى.
«حالقىمىز مەملەكەت باسشىسى قاسىم-جومارت كەمەل ۇلى توقاەۆتىڭ ەكىنشى رەسپۋبليكا قۇرۋدى كوزدەگەن ستراتەگيالىق باعىتىن, تەرەڭ رەفورمالارىن, ەلدى تۇبەگەيلى وزگەرتۋگە باعىتتالعان تاريحي تالپىنىسىن باسىم داۋىسپەن قولدادى. ەلىمىز رەفورمالاردىڭ ودان ءارى جالعاسۋىن, جالعاسا بەرۋىن قالاپ وتىر. ەل-جۇرتتى ارالاپ, مىڭداعان كەزدەسۋلەر وتكىزگەن كەزدە ءماجىلىس دەپۋتاتتارى, «اماناتتىڭ» وڭىردەگى وكىلدەرى وسىعان تولىق كوز جەتكىزدىك. تۇپتەپ كەلگەندە, قاسىرەتتى قاڭتار وقيعاسىنان كەيىن قازاقستاننىڭ بولاشاعىنا, قازاق قوعامىنىڭ بىرلىگىنە كۇمان كەلتىرگەندەر دە از بولعان جوق. الايدا تاريحي رەفەرەندۋم حالقىمىزدىڭ تۇتاستىق پەن اۋىزبىرشىلىككە, مەملەكەتشىلدىك مۇراتى مەن ءتاۋ ەتكەن تاۋەلسىزدىككە ادال ەكەنىن ايقىن كورسەتتى.
«وسى تۇستا ءبىر نارسەنى ەرەكشە اتاپ وتكىم كەلەدى. ەل تاعدىرى قىل ۇستىندە تۇرعان سول سىن ساعاتتارىندا اسا اۋىر جاعدايدا قانداي قيىن شەشىمدەر قابىلداعانىڭىزدىڭ كۋاگەرى بولدىق. ول تۋرالى كەشەگى بەرگەن تەلە-سۇحباتىڭىزدا ءوزىڭىز دە ايتتىڭىز. سول شەشىمدەر ءبىزدىڭ تاۋەلسىزدىگىمىز بەن مەملەكەتتىگىمىزدى ساقتاپ قالعانى – اقيقات», دەدى ەرلان قوشانوۆ.
ايتا كەتەيىك, بۇگىن قر پرەزيدەنتى قاسىم-جومارت توقاەۆتىڭ قاتىسۋىمەن ۇلىتاۋدا ۇلتتىق قۇرىلتايدىڭ العاشقى وتىرىسى ءوتىپ جاتىر.
