قۇرمانعازى اۋداندىق ستاتسيوناردىڭ ينفەكتسيونيست دارىگەرى مەن انەستەزيولوگ-رەانيماتولوگى 2020 جىلدىڭ اياعىندا «پنەۆمونيا» جانە قانت ديابەتى دياگنوزىمەن اۋرۋحاناعا تۇسكەن ناۋقاسقا ءتيىستى مەديتسينالىق كومەك كورسەتپەگەن. اق حالاتتىلاردىڭ كاسىپتىك مىندەتتەرىنە ۇقىپسىز قاراۋى سالدارىنان ناۋقاس قايتىس بولىپتى.
كۇدىكتىلەردىڭ كىناسى جابىرلەنۋشىلەردىڭ, كۋالاردىڭ, ساراپشىلاردىڭ ايعاقتارىمەن جانە كوميسسيالىق سوت-مەديتسينالىق ساراپتامانىڭ قورىتىندىسىمەن دالەلدەنگەن. سوت ۇكىمى بويىنشا دارىگەرلەرگە ەكى جارىم جىل مەرزىمگە باس بوستاندىعىنان ايىرۋ جازاسى تاعايىندالعان. بىراق راقىمشىلىق جاساۋ زاڭىنا سايكەس ولار تەمىر تورعا قامالمايدى.
سوتتالعانداردان جابىرلەنۋشىلەردىڭ پايداسىنا 8 ملن تەڭگە مورالدىق زالال وتەماقىسى ءوندىرىلدى.
«سوتتالۋشىلارعا دارىگەرلىك قىزمەتپەن اينالىسۋ قۇقىعىنان ايىرۋ جازاسىن تاعايىنداي وتىرىپ, باس بوستاندىعىنان ايىرۋ جازاسى تاعايىندالدى. الايدا قر تاۋەلسىزدىگىنىڭ 30 جىلدىعىنا بايلانىستى راقىمشىلدىق جاساۋ جونىندەگى زاڭنىڭ نەگىزىندە ولار باس بوستاندىعىنان ايىرۋ جازاسىنان بوساتىلدى», دەدى قۇرمانعازى اۋداندىق سوتىنىڭ سۋدياسى بەيبىتگۇل مەڭسەيىتوۆا.
