ۇلتتىق ەكسپورتتىق ستراتەگياعا سايكەس 2022 جىلعا تامان شيكىزاتتىق ەمەس ەكسپورت 31,8 ملرد دوللاردى قۇراپ, ونىڭ 22,5 ملرد دوللارى – وڭدەلگەن تاۋارلارعا, 9,3 ملرد دوللارى قىزمەتتەرگە تيەسىلى بولۋى كەرەك ەدى. 2025 جىلعا قارايعى ماقساتتى ينديكاتور – 41 ملرد دوللارعا جەتكىزۋ. KazakhExport ەكسپورتتىق ساقتاندىرۋ كومپانياسى, QazIndustry يندۋستريا جانە ەكسپورت ورتالىعى, سونداي-اق QazTrade ساۋدا ساياساتىن دامىتۋ ورتالىعى وتاندىق ەكسپورتتاۋشىلارعا قولداۋ كورسەتۋگە مىندەتتى.
شيكىزاتتىق ەمەس ەكسپورت ساناتىنا – وسىمدىك شارۋاشىلىعى (استىق, كوكونىس, جەمىس), حيميكات, تىڭايتقىش, وڭدەلگەن تاس, شويىن مەن بولات, ءتۇستى جانە قىمبات مەتالدار كىرەدى. سونداي-اق ماشينا قۇراستىرۋ ونىمدەرىن, فارماتسەۆتيكالىق تاۋارلاردى, ۇن, جارما, وسىمدىك مايى سەكىلدى دايىن ونىمدەردى, تۇرمىستىق حيميا مەن كيىم-كەشەكتى دە وسى قاتارعا جاتقىزا الامىز.
Energyprom رەسۋرسىنىڭ جازۋىنشا, بىلتىر شيكىزاتتىق ەمەس ەكسپورتتىڭ نەگىزگى كولەمى – مىس جانە مىس كاتودتارى (3,3 ملرد دوللار), فەرروقورىتپا (2,3 ملرد دوللار) جانە ۋران (1,7 ملرد دوللار) ەسەبىنەن قۇرالعان. ەكسپورت قۇرىلىمىندا ترانسپورتتىق قىزمەت (4 ملرد دوللار), ساياحات (535,3 ملن دوللار) جانە مەملەكەتتىك قىزمەتتەردىڭ دە (204,8 ملن دوللار) ۇلەسى باسىم.
«تاۋارلاردىڭ شيكىزاتتىق ەمەس ەكسپورتىنىڭ قۇرىلىمىندا ونەركاسىپ تاۋارلارى باسىم, ونىڭ ۇلەسى 2021 جىلى 18,4 ملرد دوللاردى قۇراپ, ءبىر جىلمەن سالىستىرعاندا 30,5 پايىزعا ءوستى. اۋىلشارۋاشىلىق تاۋارلارىنىڭ ۇلەسى 1,4 ملرد دوللار بولىپ, ءبىر جىلدا 3,5 پايىزعا كوبەيدى. بيىل قاڭتار-اقپاندا وڭدەلگەن تاۋارلار ەكسپورتىنىڭ كولەمى 3,5 ملرد دوللاردى قۇرادى. وڭدەلگەن تاۋارلار ەكسپورتىنىڭ ەڭ كوپ كولەمى قىتاي, رەسەي جانە وزبەكستانعا باعىتتالدى», دەلىنگەن Energyprom زەرتتەۋىندە.
2021 جىلدىڭ سوڭىندا شيكىزات تاۋارلارىنىڭ ەكسپورتى 19,9 ملرد دوللاردى قۇراعان كەزدە ساۋدا جانە ينتەگراتسيا ءمينيسترى باقىت سۇلتانوۆ مۇنى رەكوردتىق كورسەتكىش دەپ باعالايتىنىن ايتقان ەدى. ءمينيستردىڭ ايتۋىنشا, مەملەكەت تاراپىنان ەكسپورتتاۋشىلارعا ساقتاندىرۋ قولداۋىن كورسەتۋ وسىنداي مەجەگە جەتۋگە كومەگىن تيگىزدى.
KazakhExport ۇلتتىق ەكسپورتتىق-ساقتاندىرۋ كومپانياسى بىلتىر 200 ملرد تەڭگەدەن استام سوما كولەمىندە قازاقستاندىق كاسىپكەرلەرگە ساقتاندىرۋ قولداۋىن جاساعان. اتالعان كومپانيا باسشىسىنىڭ ورىنباسارى قۋانىش مۇقاجانوۆتىڭ ايتۋىنشا, كومپانيا قىزمەتىن تۇتىنۋشىلار ىشىندە – ءىرى بيزنەس تە, شاعىن كاسىپورىن دا بار.
«بيىل جوعارى تەحنولوگيالار جانە ينتەللەكتۋالدىق قىزمەتتەر ەكسپورتىن جاساۋشى كومپانيالار اراسىندا بەلسەندىلىك بار ەكەنىن بايقادىق. «ونەركاسىپ ساياساتى تۋرالى» زاڭدا كورسەتىلگەندەي ەكسپورتتىق زايمدار بويىنشا سىياقى مولشەرلەمەسىن سۋبسيديالاۋ دەيتىن جاڭا مەحانيزمنىڭ ىسكە قوسىلۋى بۇل باعىتتى قوسىمشا ىنتالاندىرىپ وتىر. سونىمەن قاتار شاعىن جانە ورتا بيزنەس سۋبەكتىلەرى دە وزدەرىنىڭ ەكسپورتتىق وپەراتسيالارىن ءجيى ساقتاندىرا باستادى. پورتفەلىمىزدە سەمەيدەگى «قازپوليگراف», باتىس قازاقستان وبلىسىنداعى «№1 نان-ءسۇت كومبيناتى», الماتىداعى «اريون سيستەما», قاراعاندىداعى KazMetis جشس-لار بار», دەيدى ق.مۇقاجانوۆ.
