«كۇنى كەشە عانا اكىمدىك بارلىق كوممۋنالدىق مەملەكەتتىك مەكەمە قىزمەتكەرلەرىنىڭ جالاقىسىن قوسىمشا كوتەرۋ تۋرالى شەشىم قابىلدادى. بۇل مادەنيەت نىساندارىنىڭ, مۋزەيلەردىڭ, تەاترلاردىڭ, سونىمەن قاتار اكىمدىك جانىنداعى قوعامدىق كەلىسىم مەكەمەسىنىڭ قىزمەتكەرلەرىنە دە قاتىستى», دەدى بەرىك جاكەنوۆ نۇر-سۇلتان قالالىق قازاقستان حالقى اسسامبلەياسىنىڭ حح سەسسياسىندا.
ونىڭ ايتۋىنشا, سوڭعى 3 جىلدا ەلوردا تۇرعىن ءۇي قۇرىلىسى سالاسىندا 5 جىلدىڭ نورماسى ورىندالىپ, 8,5 ملن شارشى مەتر تۇرعىن ءۇي پايدالانۋعا بەرىلدى. جەو-3 قۇرىلىسى قايتا جاندانىپ, جاۋىن سۋىنا ارنالعان كارىز جۇيەسى, سورعى-سۇزگى ستانساسى سالىنىپ جاتىر. 50 شاقىرىم ينجەنەرلىك جەلى, 2 مەكتەپ, 2 سپورت كەشەنى سالىندى. الماتى, سارىارقا اۋداندارىنداعى 10 تۇرعىن ءۇي الابى تولىقتاي گازعا قوسىلدى. سونداي-اق 680 شاقىرىم گاز تاراتۋ جەلىسى توسەلدى.
«بيىل بايقوڭىر مەن ەسىل اۋداندارىن گازداندىرۋ ءجۇرىپ جاتىر. سوڭعى 3 جىلدا ۇزىندىعى 165 شاقىرىم بولاتىن 300-دەن استام كوشە سالىنىپ, جوندەلدى. 2 اۆتوموبيل كوپىرى سالىنىپ جاتىر. بيىل ۇلى دالا داڭعىلىعىنداعى, كەلەسى جىلى تاۋەلسىزدىك داڭعىلىنداعى كوپىر قۇرىلىسى اياتالادى», دەدى ول.
