نۇر-سۇلتان قالاسى تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ وتىرىس بارىسىندا جاساعان باياندامادا ءماسليحات دەپۋتاتتارىن بۇل باستامانى قولداۋعا شاقىردى.
«بيىل 28 ساۋىردە قالالىق ونوماستيكا كوميسسياسىنىڭ كەزەكتى وتىرىسى ءوتتى. سول جەردە ەلوردانىڭ بىرقاتار ءبىلىم مەكەمەسىنە اتاۋ بەرۋ ماسەلەسى تالقىلاندى. اتاپ ايتقاندا №1 قالالىق مەكتەپ ليتسەيگە كەڭەس وداعىنىڭ ەكى مارتە باتىرى تالعات بيگەلدينوۆتىڭ ەسىمىن بەرۋ, №70 مەكتەپ ليتسەيگە كورنەكتى مەملەكەت جانە قوعام قايراتكەرى تەمىربەك جۇرگەنوۆتىڭ ەسىمىن بەرۋ, №92 مەكتەپ ليتسەيگە گەولوگيا-مينەرولوگيا عىلىمىنىڭ دوكتورى, پروفەسسور, قازاقستان عىلىم اكادەمياسىنىڭ العاشقى قۇرىلتايشىلارىنىڭ ءبىرى اقجان ءال-ءماشانيدىڭ ەسىمىن بەرۋ, №65 مەكتەپ گيمنازياعا اقىن, جازۋشى ماعجان جۇماباەۆتىڭ ەسىمىن بەرۋ, №88 مەكتەپ ليتسەيگە بەلگىلى اقىن قادىر مىرزا ءالىنىڭ ەسىمىن بەرۋدى جانە №1 ونەر مەكتەبىنە بەلگىلى كۇيشى تاتتىمبەت قازانعاپ ۇلىنىڭ ەسىمىن بەرۋدى سىزدەردىڭ نازارىڭىزعا ۇسىنىپ وتىرمىز», دەدى ساكەن ەسىركەپ.
