بيزنەس • 15 ماۋسىم، 2022

گرانتتاردىڭ كولەمى ۇلعايدى

قوستاناي وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسى وڭىردە شاعىن كاسىپكەرلىككە بەت بۇرىپ جاتقانداردىڭ قاتارى ەداۋىر كوبەيگەنىن مالىمدەدى. وسىعان سايكەس، جاڭا كاسىپ باستاپ جاتقان نەمەسە بيزنەسىن كەڭەيتكىسى كەلگەن كاسىپكەرلەردىڭ جوبا-باستامالارىنا بولىنگەن قولداۋ قارجىنىڭ كولەمى دە ۇلعايىپ وتىر.

نۇرقانات قۇلاباەۆ

ماسەلەن، بىلتىر قوستاناي وبلىسىندا شاعىن كاسىپكەرلىكتى دامىتۋعا ارنالعان مەملەكەتتىك گرانتتارعا 60 ملن تەڭگە بولىنسە، بيىل بۇل سوما 80 ملن تەڭگەگە جەتكەن.

– كاسىپكەرلىكتى دامىتۋدىڭ 2021-2025 جىلدارعا ارنالعان ۇلتتىق جوباسى اياسىندا بيىل مەملەكەت گرانتتارىنا ۇمىتكەرلەردەن 302 ءوتىنىم كەلىپ ءتۇستى. جاڭا كاسىپ باستاپ جاتقاندار اراسىنداعى باسەكە جوعارى بولعاندىقتان، كونكۋرستىق كوميسسياعا گرانت يەلەرىن انىقتاۋ وڭاي بولعان جوق. جوبالاردى كونكۋرسقا قاتىسقان بيزنەس جوسپارلاردىڭ جۇزەگە اسۋ مۇمكىندىكتەرى، جاڭاشىلدىعى مەن باسەكەگە قابىلەتتىلىگى، قارجىلىق ومىرشەڭدىگى، ۇمىتكەردىڭ كاسىپكەرلىك تاجىريبەسىنىڭ دەڭگەيى، جاڭا جۇمىس ورىندارىن اشۋ مۇمكىندىگى سياقتى بىرنەشە قاعيداتتار بويىنشا تاڭداپ الدىق، – دەدى كاسىپكەرلىكتى دامىتۋ باسقارماسىنىڭ ءبولىم باسشىسى جاسۇلان قالەنوۆ.

كونكۋرس قورتىندىسىندا كوميسسيا ۇزدىك دەپ تانىعان 18 جوبا 2 ملن 350 مىڭ تەڭگەدەن 5 ملن تەڭگەگە دەيىن قارجى گرانتتارىن الدى. جەڭىمپاز جوبالاردىڭ بەسەۋى قوستانايدا، ۇشەۋى ارقالىقتا، ۇشەۋى قوستاناي اۋدانىندا جۇزەگە اسىرىلاتىن بولادى. سونىمەن قاتار اۋليەكول، امانگەلدى، جانگەلدين، مەڭدىقارا، قامىستى جانە ۇزىنكول اۋداندارى دا ءبىر-ءبىر گرانتقا يە بولدى.

كونكۋرسقا قاتىسقانداردىڭ دەنى جاستار مەن تۇرمىسى تومەن وتباسىلاردان ەكەنىن ايتا كەتۋ كەرەك. مىسالى، بيىلعى گرانت يەلەرىنىڭ جەتەۋى – 29 جاسقا دەيىنگى جاس كاسىپكەرلەر. ۇشەۋى كوپبالالى انا، ال بىرەۋى تولىق ەمەس وتباسىدان شىققان تالاپكەر. گرانت جەڭىمپازدارى اشاتىن كاسىپ تە بيزنەستىڭ ءار الۋان سالاسىنا جاتادى. ولاردىڭ ىشىندە تاماق ونەركاسىبى، كيىم، اياقكيىم تىگۋ تسەحى، ءبىلىم بەرۋ قىزمەتى، ءتىپتى بالالار الاڭقايلارى مەن سپورت كەشەندەرىن جاسايتىن وندىرىسكە دەيىن بار.

كاسىپكەرلىكتى دامىتۋ باسقارماسىنىڭ وكىلدەرى جوبالاردىڭ جۇزەگە اسىرىلۋ بارىسىنا مونيتورينگ جاساپ وتىراتىندىقتارىن ايتتى. ال بيىل بيزنەس-جوسپارى ماقۇلدانباي قالىپ، مەملەكەتتىڭ قارجىلاي قولداۋىنا قول جەتكىزە الماعان كاسىپكەرلەر جوبالارىن تولىقتىرىپ، جەتىلدىرىپ، كەلەسى جولعى كونكۋرستا تاعى ءبىر رەت باق سىناپ كورمەك.

قوستاناي وبلىسى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز