«قازاقستان رەسپۋبليكاسىنداعى سايلاۋ پروتسەسى: تەوريا جانە تاجىريبە» دەپ اتالاتىن وقىتۋ كۋرسىنا وبلىستار, رەسپۋبليكالىق ماڭىزى بار قالالار جانە استانا, اۋدانداردىڭ اۋماقتىق سايلاۋ كوميسسيالارىنىڭ باسشىلارى قاتىسىپ جاتىر. «وسى جىلدىڭ سوڭىنا دەيىن اكادەميا ورتالىق سايلاۋ كوميسسياسىمەن بىرلەسىپ, سايلاۋدى ۇيىمداستىرۋشىلار مەن سايلاۋ پروتسەسىنىڭ باسقا دا قاتىسۋشىلارىن وقىتۋ ءۇشىن 600-گە جۋىق جاتتىقتىرۋشىنى وقىتۋدى جوسپارلاپ وتىر», دەيدى ەلەكتورالدىق وقىتۋ ورتالىعىنىڭ ديرەكتورى جانار بوقانوۆا.
ەل پرەزيدەنتى قاسىم-جومارت توقاەۆ قازاقستان حالقىنا جولداۋىندا سايلاۋ كوميسسيالارى ءرولىنىڭ ارتۋىنا بايلانىستى ولاردىڭ قىزمەتىنىڭ قاعيداتتارىن قايتا قاراپ, ولاردى كاسىبي نەگىزگە كوشىرۋ كەرەكتىگىن اتاپ ءوتتى. «بۇگىنگى كۇننىڭ وزىندە بارلىق دەڭگەيدەگى سايلاۋ كوميسسيالارىندا سايلاۋ پروتسەسىن باسقارۋعا قابىلەتتى, وزىنە جاۋاپكەرشىلىك الۋعا دايىن, سايلاۋشىلارمەن جانە سايلاۋ پروتسەسىنىڭ باسقا دا قاتىسۋشىلارىمەن ءتيىمدى قارىم-قاتىناس جاساۋ داعدىلارىن مەڭگەرگەن قۇزىرەتتى ماماندار جۇمىس ىستەۋى ءتيىس», دەگەن ەدى مەملەكەت باسشىسى. وسىنى نەگىزگە العان اكادەميا وتكەن جىلدىڭ جەلتوقسان ايىندا ەلەكتورالدىق وقىتۋ ورتالىعىن اشقان بولاتىن. ورتالىقتىڭ نەگىزگى ماقساتى – ەلەكتورالدى مامانداردىڭ بىلىكتىلىك دەڭگەيىن ارتتىرۋ, تەوريالىق جانە قولدانبالى ءبىلىمدى كەڭەيتۋ, سايلاۋ پروتسەسىنە قاتىسۋشىلاردىڭ پراكتيكالىق داعدىلارىن جەتىلدىرۋ.
وقىتۋدىڭ ءبىرىنشى كۇنىندە تىڭداۋشىلار الدىندا ورتالىق سايلاۋ كوميسسياسىنىڭ توراعاسى نۇرلان ءابدىروۆ, مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباەۆ, سونداي-اق ورتالىق مەملەكەتتىك ورگاندار مەن قازاقستاندىق زەرتتەۋ ينستيتۋتتارىنىڭ وكىلدەرى ءسوز الىپ, ەلدەگى سايلاۋ ناۋقانىنىڭ ءوتۋى, سونىڭ ىشىندە سايلاۋدى ۇيىمداستىرۋشى مامانداردىڭ تىكەلەي قىزمەتتەرىنىڭ ماڭىزىن اتاپ ءوتتى.
جالپى, وقىتۋ كۋرسى بارىسىندا تىڭداۋشىلار قازاقستانداعى سايلاۋ ناۋقاندارىن دايىنداۋ مەن وتكىزۋدىڭ ۇيىمداستىرۋشىلىق جانە قۇقىقتىق اسپەكتىلەرى تۋرالى لەكتسيالار تىڭدايدى. ءتيىمدى كوممۋنيكاتسيا جاساۋدىڭ تەتىكتەرىن ۇيرەنەدى, ماسەلەن, بۇقارالىق اقپارات قۇرالدارىمەن, بايقاۋشىلارمەن, ساياسي پارتيالارمەن ساياسي ناۋقان كەزىندە جانە ودان كەيىن دە قارىم-قاتىناس ورناتۋ, دۇرىس اقپاراتپەن قامتۋ سەكىلدى ماشىقتاردى مەڭگەرمەك. سونىمەن قاتار سايلاۋدى ۇيىمداستىرۋشىلاردىڭ soft skills داعدىلارىن جەتىلدىرۋگە ارنالعان ترەنينگتەر, سايلاۋ پراكتيكاسىنداعى جاعدايلار بويىنشا پراكتيكالىق كەيستەردى تالداۋ فورماتىندا ساباقتار وتكىزىلەدى. وقىتۋ كۋرسى 15-ماۋسىمدا اياقتالادى.
