ەندى مىنا قىزىقتى قاراڭىز, بيىل ءبىرىنشى رەت ءۇرجار اۋداندىق اۋرۋحاناسىنىڭ اۋلاسىنداعى كادىمگى قاراعاش گۇل اتىپتى. قىزعىلت گۇل. قاراعاشتىڭ قىرىقتان استام ءتۇرى بولعانىمەن, ءدال بۇل ءتۇرى كۇزدىڭ كۇنى جاپىراعى تۇسەدى. الايدا جازدىڭ كۇنى گۇل اتپايتىن. جۋىقتا ۇرجارلىق الەۋمەتتىك جەلى قولدانۋشىسى قاراعاشتى بەينە كامەراعا ءتۇسىرىپ الىپ, ەلۋ جىل عۇمىرىندا گۇلدەگەن قاراعاشتى كورمەگەنىن ايتقان. شىنىندا دا, ءتۇيىر تاستاي بەرمەيتىن ۇساق جاپىراقتى قاراعاشتىڭ گۇلدەۋى وتە سيرەك قۇبىلىس.
نەگىزى قاراعاش جەردىڭ قوڭىرجاي بەلدەۋلەرىندە كەزدەسەدى. ەلىمىزدىڭ دالالى جەرىندە, ساي-سالالاردا, وزەن-كولدىڭ جاعالاۋلارىندا وسەدى. جالپى, 40 ءتۇرى بولسا, ونىڭ تورتەۋى قولدان وسىرىلەدى. بۇلاردىڭ ەڭ كوپ تاراعانى – جىلتىر قاراعاش. ماتەريالدىق اعاش ءۇشىن قاتتى بولعانىمەن, قاسيەتى زور سياقتى. اسىرەسە, شەبەرلەردىڭ قاراعاشتان جاساعان دومبىراسىنا سۇرانىس كوپ. باعاسى دا بارشىلىق. بۇل اعاشتىڭ جاپىراقتارى مەن جاس بۇتالارىنىڭ قابىعىن ەمدىك ماقساتتا دا پايدالانادى ەكەن. سونىمەن قاتار كوگالداندىرۋ ءۇشىن, اڭىزاق جەلگە توسقاۋىل بولۋ ءۇشىن دە ەگەدى.
تاعى ءبىرى قىزىعى, قاراعاش گۇلدەسە, جاپىراعى شىقپاي تۇرىپ گۇلدەر ەدى. الايدا اۋرۋحانا اۋلاسىنداعى قاراعاش جاپىراعى شىققان سوڭ گۇل اتقان.
قۇت دارىپ, باق تايماعان ورىسىنەن,
كەشەگى بابالاردىڭ تەرى سىڭگەن.
ءۇرجاردى شىر اينالىپ كەتە المايسىڭ,
تاتساڭ سەن جالعىز ءتۇيىر جەمىسىنەن, دەپ جازعان جەرگىلىكتى اقىن جابايىل بەيسەنوۆ.
بەينەتاسپاعا تارتىپ العان ازامات تا بەلگىلى اقىننىڭ ولەڭىن وقىپ, ءۇرجاردا جەمىس اعاشى تۇگىلى قاراعاش گۇلدەيتىنىن ايتىپ, ءۇرجار جەرىن ماقتان ەتەدى. راس, بۇل وڭىرگە شىبىق شانشىساڭ تال, گ ۇلىن تارتساڭ بال شىعادى.
اباي وبلىسى,
ءۇرجار اۋدانى
