ايماقتار • 13 ماۋسىم، 2022

جەكەمەنشىك مەكتەپتەردىڭ سانى ارتا تۇسەدى

65 رەت كورسەتىلدى

تۇركىستان وبلىسى دەموگرافيالىق ءوسىم بو­يىنشا ەلىمىزدە كوش باسىندا. ياعني جاڭا مەكتەپتەرگە قاجەتتىلىك ماسەلەسى جىل سايىن تۋىنداۋى زاڭدىلىق. بۇل ورايدا بىلتىر بيۋدجەت ەسەبىنەن 78 مەكتەپتىڭ قۇرىلىسى جۇرگىزىلىپ، 44-ءى پايدالانۋعا بەرىلگەن بولاتىن. جەكە ينۆەستيتسيا ەسەبىنەن 37 مەكتەپ سالىندى. بۇل باعىتتا جۇمىس بيىل كۇشەيمەك.

ەلىمىز بويىنشا 2021-2025 جىلدار ارالىعىندا سالىنىپ جاتقان مەكتەپتەردىڭ تورتتەن ءبىر بولىگى – تۇركىستان وبلىسىنا تيەسىلى. ءتورت جىلدا وڭىردە 199 مەكتەپ بوي كوتەرەدى. بيىل 59 مەكتەپتىڭ قۇرىلىس جۇمىستارىن جۇرگىزۋگە 20 ملرد تەڭگەدەن استام قارجى قارالدى. ال وبلىس ورتالىعى تۇركىستان قالاسىندا 2025 جىلعا دەيىن 10-نان استام مەكتەپ سالىنادى دەپ جوسپارلانۋدا. وتكەن جىلى 900 ورىندىق مەكتەپ، 720 ورىندىق نازارباەۆ زياتكەرلىك مەكتەبى 120 ورىندىق جاتاقحاناسىمەن سالىندى. بۇدان بولەك، 6 جەكەمەنشىك مەكتەپ پايدالانۋعا بەرىلدى. بيىل تۇركىستان قالاسىنداعى «Turkistan» اەا» اكىمشىلىك-ىسكەرلىك اۋماعىندا «نۇروردا» حالىقارالىق مەكتەبىنىڭ» قۇرىلىسى باستالادى. ءتورت تىلدە ءبىلىم بەرەتىن حالىقارالىق مەكتەپتە بارلىق جاعداي جاسال­ماق. ءبىلىم بەرۋ كەشەنىندە فۋتبول الاڭى، جاتاقحانا جانە باسسەين سالىنادى. جوسپار بويىنشا مەكتەپ 2024 جىلعى جاڭا وقۋ جىلىندا اشىلادى دەپ كۇتىلۋدە. جالپى ءبىلىم بەرۋ مەكەمەلەرىنىڭ جەتىسپەۋشىلىگىن جويۋ ماقساتىندا جەكەمەنشىك مەكتەپتەرگە جان باسىنا شاققانداعى قارجىلاندىرۋ جۇيەسى دە قولعا الىنىپ وتىر. ياعني كاسىپكەر مەكتەپ سالىپ، وندا ءبىلىم الاتىن ءاربىر وقۋشى ءۇشىن مەملەكەتتىك باعدارلاما اياسىندا قايتارىمسىز قارجىعا يە بولا الادى. مىسالى، سايرام اۋدانى، مانكەنت اۋىلىندا جەكە كاسىپكەر 4 بىردەي مەكتەپ سالۋدا. ينۆەستور سوڭعى ون جىلدا سالعان 8 بالاباقشا مەن 4 جەكەمەنشىك مەكتەپتە 13 مىڭنان استام بالا ءتالىم-تاربيە الۋدا. جەكە كاسىپكەر نيزامحان سۋلايمانوۆ سالىپ جاتقان 1 200 بالاعا ارنالعان ءار مەكتەپتىڭ قۇنى 1،5 ملرد تەڭگەدەن اسپايدى. قاڭتار ايىندا قۇرىلىسى باستالعان زاماناۋي ۇلگىدەگى ءبىلىم ۇيالارى جوسپار بويىنشا بيىلعى وقۋ جىلى پايدالانۋعا بەرىلمەك.

وبلىس اكىمى ومىرزاق شوكەەۆ ينۆەستورعا تۇركىستان قالاسىنان مەكتەپ سالۋ تۋرالى ۇسىنىس جاساعان. كاسىپكەر الداعى ۋاقىتتا تاعى 4 مەكتەپ سالۋدى كوزدەپ وتىر. ينۆەستوردىڭ يەلىگىندەگى 1 200 ورىندىق بالاباقشا وڭىردەگى ەڭ ۇلكەن بالاباقشا بولىپ ەسەپتەلەدى. سونداي-اق سايرام اۋدانى، قارابۇلاق اۋىلىندا 2 200 ورىندىق ورتا مەكتەپ جۇمىس ىستەيدى. ءبىلىم وشاعى ەلورداداعى نازارباەۆ ۋنيۆەرسيتەتىنىڭ جوباسىمەن سالىنعان. مەكتەپتىڭ ۇلكەن ءماجىلىس زالدارى، كىتاپحانا، سپورت زالى مەن 450 ورىندىق اسحاناسى بار. وسكەلەڭ ۇرپاقتى ەڭبەككە باۋلۋعا باعىتتالعان پاندەر وتىلەتىن سىنىپتاردىڭ جاساقتالۋى دا وزگەشە. بارلىق مەكتەپتە بالالار مەملەكەتتىك باعدارلاما اياسىندا اقىسىز ءبىلىم الادى. وقۋشىلاردى تەگىن تاسىمالداپ، ىستىق تاماقپەن قامتاماسىز ەتەدى. قوسىمشا ۇيىرمەلەر تەگىن. ۇزدىكتەرگە ارنايى ستيپەنديا تاعايىندالعان. مىنە، وسى باعىتتاعى، ياعني جەكەمەنشىك مەكتەپتەردىڭ سانى وڭىردە ارتا تۇسپەك. بۇل ماقساتتا ينۆەستورلاردى تارتۋ جۇمىسى كۇشەيتىلمەك. سونداي-اق شالعايداعى ەلدى مەكەندەردە تۇراتىن وقۋشىلاردى ارنايى اۆتوبۋس­تار تاسىمالدايتىن بولادى. ول ءۇشىن جاڭا اۆتوبۋستار ساتىپ الىنادى. مىسالى، بيىلعى جاڭا وقۋ جىلىنا وبلىستىق بيۋدجەتتەن ورداباسى اۋدانىنا 15 جاڭا اۆتوبۋس بەرىلەتىن بولادى. ال شۇبارسۋ اۋىلىندا بيىل 3 جەكەمەنشىك مەكتەپ پايدالانۋعا بەرىلەدى. جۋىردا اپتالىق اپپارات وتىرىسىندا وبلىس اكىمى اۋدان، قالا اكىمدەرىنە ءبىلىم ۇيالارىنىڭ ماسەلەلەرىن نازاردا ۇستاۋدى، ادامي الەۋەتتى دامىتۋ باسقارماسىمەن بىرلەسە وزەكتى ماسەلەلەردى شەشۋدى تاپسىردى.

وقۋشىلاردىڭ دەنساۋلىعى مەن قاۋىپسىزدىگى دە نازاردان تىس قالعان ەمەس. مىسالى، بيىل مەكتەپ وقۋشىلارىن پروفيلاكتيكالىق تەكسەرۋدەن وتكىزۋگە جانە ساۋىقتىرۋ ءىس-شارالارىن اتقارۋعا 26،1 ملرد تەڭگەگە مەديتسينالىق ۇيىمدارمەن شارت جاسالدى. جىل باسىنان بەرى مەكتەپ مەديتسيناسىنا شامامەن 6،4 ملرد تەڭگەگە قىزمەت كورسەتىلدى.

«مەكتەپ وقۋشىلارى مەن مەكتەپكە دەيىنگى مەكە­مەلەردىڭ مەديتسينالىق قامتاماسىز ەتىلۋىن ۇيىم­داستىرۋ تۋرالى ويلايتىندار از. مەكتەپ مەديتسيناسى ءبىلىم بەرۋ ۇيىمدارىندا، ياعني تىكەلەي مەكتەپتەردە، بالاباقشالاردا، شاعىن ورتالىقتاردا نەمەسە باسقا دا ءبىلىم بەرۋ ۇيىمدارىنداعى بالالارعا مەديتسينالىق قىزمەت كورسەتۋدى كوزدەيدى. بۇرىن مەكتەپ مەديتسيناسى ۋچاسكەلىك قىزمەتكە بولىنگەن قاراجات ەسەبىنەن قارجىلاندىرىلعان. ءمامس جۇيەسى ەنگىزىلگەن سوڭ، مەكتەپ مەديتسيناسىنا ەرەكشە كوڭىل بولىنە باستادى. بۇل مەكتەپ جاسىنداعى بالالارعا ارنالعان الدىن الۋ شارالارىنىڭ كەڭ اۋقىمىن قامتاماسىز ەتۋگە مۇمكىندىك بەرەدى»، دەيدى «الەۋمەتتىك مەديتسينالىق ساقتاندىرۋ قورى» كەاق تۇركىستان وبلىسى بويىنشا فيليالىنىڭ ديرەكتورى اسحات بەيسەنباەۆ.

مەكتەپ مەديتسيناسىنىڭ تاريفىنە ۆاكتسينالاۋ، جىل سايىنعى پروفيلاكتيكالىق تەكسەرۋ، ءتىس دارىگەرىنىڭ تىكەلەي وقۋ ورنىندا وتكىزىلەتىن تەكسەرۋى كىرەدى. وقۋ ورنىنداعى دارىگەرلەر بالالاردىڭ سالاماتتى ءومىر سالتىن ۇستانۋى بويىنشا ءىس-شارالار وتكىزەدى. شۇعىل جاعدايلاردا مەديتسينالىق پۋنكتتە جەدەل جاردەم بريگاداسى كەلگەنگە دەيىن بالالارعا العاشقى كومەك كورسەتىلەدى. سونداي-اق بالالار قاۋىپسىزدىگىن قامتاماسىز ەتۋ ماقساتىندا وبلىستاعى 943 مەكتەپتىڭ 563 كامەراسى جەدەل باسقارۋ ورتالىقتارىنا قوسىلدى. بۇل جالپى مەكتەپتەردىڭ – 60%-ى. تەحنيكالىق مۇمكىندىگى بار 750-گە جۋىق مەكتەپتى جەدەل باسقارۋ ورتالىقتارىنا شىعارۋ جوسپارلانىپ وتىر.

 

تۇركىستان وبلىسى

سوڭعى جاڭالىقتار

قازاقستاندا قانشا ادام ۆاكتسينا الدى

كوروناۆيرۋس • بۇگىن، 10:42

ۇقساس جاڭالىقتار