بۇل ەشقانداي ميف ەمەس, سيمۆولدىق سيپاتى دا جوق, قوعامدا بەلەڭ العان قاندى وقيعانىڭ جەلىسىمەن جازىلعان شىعارما. «ميوكارد ينفاركتى». سوزىلمالى سىرقاتتىڭ اتاۋىمەن اتالعان تۋىندى درامالىق سيپاتقا يە. اۆتورى – ميفوشىعارمالاردىڭ جانكۇيەرى, سۋرەتشى باقىت ءباپىشوۆ.
باقساڭىز, كەنەپ بەتىندە تىك فورماتتا تاس بالبال كولدەنەڭىنەن سۇلاپ جاتىر. 1986 جىلعى قايعىلى جاعداي سۋرەتشىنىڭ جۇرەگىنەن وسىلاي وتەدى. بالبال فونىندا شىعىستىق مانەردە وسىمدىك تەكتەس ويۋلارمەن ورنەكتەلگەن كىلەم ىلىنگەن. كىلەم قىزعىش سارى تۇستەن كۇرەڭ قىزىل تۇسكە دەيىن قۇبىلادى. قاۋىپتى ناۋقاس بالبالتاس پىشىندە تۇسپالدانىپ بەرىلگەن. الايدا كۇڭىرەنىپ تۇيگەن قاباعى وقىرمانعا ايقىن كورىنەدى. بالبال بابا تاستان جارالعان جۇرەك تۇسىن قۇشاقتاپ قىرىنان جاتىر. ونىڭ ۇستىنە كەپتەرگە ۇقساس قۇس قوناقتاعان. قۇستىڭ كولەڭكەسى ەرەكشە ايشىقتالىپ قويۋ قارا تۇستە كىلەم بەتىنە تۇسكەن. ول دا ب ۇلىڭعىر.
الدىڭعى شەپكە قۇستىڭ وزىنەن بۇرىن كولەڭكەسى باسىمدىق تانىتا شىعىپ تۇر. بۇل كولەڭكە شىعارمانىڭ درامالىق كۇشىن ودان بەتەر كۇشەيتە تۇسەدى. قۇلاپ تۇسكەن بالبالدىڭ كولەڭكەسى جوق, بۇل ونىڭ دۇنيەدەن جىراق ەكەنىن اڭداتادى. كومپوزيتسيا اياقسىز قالعانداي اسەر بەرەدى. ويتكەنى كەنەپتە بەينەلەنگەن كىلەم فورماتتىڭ سول جاق تۇسىندا بىتپەي قالىپ شورت كەسىلگەن بولسا, سۇلاپ جاتقان بالبال تاس كەنەپتىڭ وڭ جاق تۇسىندا جامباسىنان تومەن قاراي شورت كەسىلىپ اياقسىز قالعان.
قىلقالام شەبەرى دراماعا تولى قايعىلى كەزەڭگە سەبەپشى بولعان وقيعاعا قاتەرلى اۋرۋدىڭ دياگنوزىن قويىپ, ونى بالبالمەن بەينەلەي وتىرىپ, بۇگىنگى قوعامنىڭ بابا مۇراسىنان تامىرىمەن اجىراپ بارا جاتقانىن باياندايدى. سول ارقىلى 1986 جىلى ۇلتىم دەپ قان توككەن بوزداقتاردىڭ رۋحى ۇلتسىزداردىڭ تابانىندا تاپتالعانىنا نازدانا كوڭىل ايتادى. سۋرەتكەر قاسىرەتتى شاقتىڭ كەسكىنىن وسىلاي باعامدايدى.
