تەرگەۋ مالىمەتىنە سايكەس, قىلمىستىق سحەما ءموبيلدى قوسىمشا ارقىلى جۇمىس ىستەگەن پوكەر ويىنىنا نەگىزدەلگەن. وندا «تەحاس حولدەم» تۇرىندەگى ويىن جۇرگىزىلىپ, «Vendetta» جانە «AMG600L» اتتى ويىن كلۋبتارى قۇرىلعان. بۇل كلۋبتار «Nomad» جەلىسىنە بىرىكتىرىلگەن.
اتالعان جۇيە تاۋلىك بويى جۇمىس ىستەپ, قازاقستاننان عانا ەمەس, وزبەكستان مەن قىرعىزستاننان دا ويىنشىلاردى تارتقان. قاتىسۋشىلار مەسسەندجەرلەر ارقىلى جارنامالىق حابارلامالار الىپ, بونۋس جۇيەسى ارقىلى ويىنعا قىزىقتىرىلعان.
اقتوبەدە ليتسەنزياسى جوق لومبارد 93 ميلليون تەڭگە تابىس تاپقان
ويىنشىلار ءوز شوتتارىن بانك اۋدارىمدارى ارقىلى تولتىرىپ, كەيىن سول قاراجات «فيشكالارعا» اينالدىرىلعان. ۇتىس بولعان جاعدايدا اقشا قايتادان بانك كارتالارىنا شىعارىلىپ وتىرعان.
تەرگەۋ دەرەكتەرىنە سايكەس, ۇيىمداستىرۋشىلاردىڭ تابىسى ءار ويىن ۇستەلىنەن الىناتىن 3-5 پايىز كوميسسيا ارقىلى قالىپتاسقان. سونىمەن قاتار ويىنشىلاردى ۇستاپ قالۋ ءۇشىن ۆيرتۋالدى قارىز بەرۋ جۇيەسى قولدانىلعان.
قارجىلىق اعىنداردى جاسىرۋ ماقساتىندا «دروپپەرلەردىڭ» بانك شوتتارى پايدالانىلعان, ولاردىڭ قاتارىندا شەتەل ازاماتتارى دا بولعان. ءبىر شوت ءۇشىن 100-200 مىڭ تەڭگە ارالىعىندا سىياقى تولەنگەن. جالپى اينالىم 557 ميلليون تەڭگەدەن اسقان.
قازىرگى ۋاقىتتا كۇدىكتىگە قاتىستى تەرگەۋ امالدارى جۇرگىزىلىپ جاتىر.
