«بۇل رەتتە ءبىلىم جانە عىلىم مينيسترلىگىنىڭ قولدا بار بيۋدجەتى بولىنەدى. جالپى ءبىز شىعىنداردىڭ ايتارلىقتاي ءوسۋىن كۇتپەيمىز. مەنىڭ ويىمشا, ولار از بولادى, مۇمكىن بۇرىنعى بعم بيۋدجەتىنىڭ اياسىندا دا بولۋى مۇمكىن. قوسىمشا شتات سانى بولىنەدى دەپ تە ويلامايمىن. ەگەر ونداي جاعداي بولسا, وندا باسشىلىقتىڭ شەشىمى بويىنشا قوسىمشا قاراجات بولىنەدى», دەدى الىبەك قۋانتىروۆ.
ونىڭ ايتۋىنشا, جوعارى ءبىلىم مەن عىلىمعا جاتاتىن دەپارتامەنتتەر مەن قۇرىلىمدىق بولىمشەلەر جاڭا مينيسترلىككە كوشەدى. مەكتەپكە دەيىنگى جانە مەكتەپتەگى ءبىلىم بەرۋمەن اينالىساتىن قۇرىلىمدىق بولىمشەلەرگە قاتىستى بارلىق نارسە ءبىلىم مينيسترلىگىنىڭ قۇرىلىمىندا قالادى.
«عىلىم جانە جوعارى ءبىلىم مينيسترلىگى مينيسترلىكتەر ۇيىندە نەمەسە باسقا اكىمشىلىك عيماراتتا ورنالاسادى. بۇل بويىنشا قوسىمشا سۇراقتار بولماۋى ءتيىس», دەپ قوستى ءا.قۋانتىروۆ.
ەسكە سالا كەتسەك, 1 ماۋسىمدا ۇلتتىق عىلىم اكادەمياسىنىڭ مەرەيتويلىق سەسسياسىندا مەملەكەت باسشىسى قاسىم-جومارت توقاەۆ قازاقستاننىڭ ءبىلىم جانە عىلىم مينيسترلىگىن ەكى ۆەدومستۆوعا ءبولۋ تۋرالى ۇسىنىس جاساعان بولاتىن. ونىڭ ايتۋىنشا, بۇل ەلدەگى عىلىمي قىزمەتتى ۇيلەستىرۋدى كۇشەيتۋ ماقساتىندا قاجەت.
