بۇل اتى مەن زاتى ەرەكشە كونتسەرت مەملەكەت باسشىسى قاسىم-جومارت توقاەۆتىڭ باستاماسىمەن قۇرىلعان اباي وبلىسىنىڭ رەسمي اشىلۋى كەزەڭىنە جانە الەمدىك دەڭگەيدەگى زاڭعار جازۋشى مۇحتار اۋەزوۆتىڭ تۋعانىنا 125 جىل توۋىنا ارنالدى.
«قۇتتى قوناق كەلسە, قوي ەگىز تابادى» دەگەندەي, ءدال سول كۇنى ەۋرازيا ۋنيۆەرسيتەتىنىڭ الەمدىك QS World University Rankings رەيتينگى بويىنشا 277 ورىندى يەلەنگەنى ءمالىم ەتىلدى. دۇنيەجۇزىنىڭ ۇزدىك 3 مىڭ ۋنيۆەرسيتەتى اراسىنان وسىلاي العى شەپتەن كورىنۋ – تاماشا جەتىستىك! بۇل – قازاقستان جوعارى ءبىلىمىنىڭ ابىرويى.
جاڭا قازاقستانمەن بىرگە قايتا جاڭارعان اباي وبلىسىنداعى امىرە قاشاۋباەۆ اتىنداعى مەملەكەتتىك فيلارمونيا – 77 جىلدىق تاريحى بار ونەر ۇجىمى. ءاۋ باستا ونىڭ ىرگەتاسىن قالاعان ءانشى-كۇيشىلەردىڭ شىعارماشىلىعىن كلاسسيك-جازۋشى مۇحتار اۋەزوۆتىڭ ءوزى تاماشالاپ, جوعارى باعا بەرگەنى دە ءمالىم.
ونەر ۇجىمى كەيىن, 1965 جىلى «وبلىستىق مەملەكەتتىك فيلارمونيا» مارتەبەسىن الدى. 1969 جىلدان اتاقتى ءانشى امىرە قاشاۋباەۆتىڭ ەسىمىن يەلەندى. اتالعان مەملەكەتتىك فيلارمونيانىڭ تاريحى مەن ونەر تاعىلىمى ايرىقشا. مادەنيەت ەشەكەەۆ, بولات سىبانوۆ, داۋىل حايرۋللين, كەلدەنباي ولمەسەكوۆ, روزا بايدالينا, ماۋلەن ماساليموۆ, مارحابا كەرىمقۇلوۆا, ساعي مەكىشوۆ, مىرزاعالي ايدابولوۆ, راحىمبەك نوعايباەۆ, جولدىباي داستەنوۆ, ت.ب. بۇرىنعى-كەيىنگى سەمەيلىك شىعارماشىل تۇلعالاردىڭ ەسىمى وتاندىق مادەنيەت تاريحىنا ەنگەنىن ماقتانىشپەن ايتۋعا بولادى.
سوڭعى جىلدارى فيلارمونيانى باسقارۋعا ەۇۋ-دا قىزمەتتە شىڭدالعان قازاق ۇلتتىق مۋزىكا اكدەمياسىنىڭ تۇلەگى, مادەنيەتتانۋ ماگيسترى, تانىمال كۇيشى ايبەك بەكبوسىن باسقارىپ ءجۇر.
«اباي جولىمەن» كونتسەرتى اتالعان فيلارمونيانىڭ «بيبىگۇل قازاق حالىق اسپاپتار وركەسترى» سۇيەمەلدەگەن ا.بەكبوسىننىڭ ۇلى اباي مەن ونىڭ اقىندىق اينالاسىنا, داڭقتى ابايتانۋشىلارعا ارنالعان «تەلعارا» كۇيىمەن اشىلدى. جينالعان ەلوردا زيالىلارى مەن وقىتۋشى-عالىمدار ساحنادا ونەر كورسەتكەن ديريجەرلەر – نۇرلان توكەي, ادىلەت سەرىكوۆ, انشىلەر – ماپرۋزا وتۋلەنوۆا, ەركەبۇلان مۇساەۆ, گۇلدانا نوعايباەۆا, ايگەرىم توقتىباەۆا, ايگەرىم ءاشىروۆا, دينا يسبەكوۆا, كەنجەگۇل اقشەكينا, جاسۇلان تاجيەۆ, دومبىراشىلار – ادىلەت سەرىكوۆ, ەرزات ماعۋفاروۆ, دۋمان نۇرقامىسوۆ, ەربولات تالاپحان, ت.ب. ىزدەنىسى مەن تالعامىنا, سەزىم پەرنەسىن ءدوپ باسقانىنا ريزا بولدى. ۇلى ابايدان باستاپ وتاندىق كومپوزيتورلاردىڭ, الەمدىك تۇلعالاردىڭ كلاسسيكالىق مۇراسى شىرقالدى. سونىمەن بىرگە نۇربەك ومىربەكوۆ پەن «دالا ءۇنى» اكاپەللاسى ورىنداعان م.دۋلات ۇلىنىڭ «الاش مارشى» جۇرتشىلىقتىڭ ەلدىك رۋحىن شىڭداي ءتۇستى.
ءا.قاشاۋباەۆ اتىنداعى مەملەكەتتىك فيلارمونيا ونەردەگى جانە رۋحانياتتاعى اباي جولىن, مۇحتار ءداستۇرىن جاڭا دەڭگەيدە اكەلگەنىنە كۋا بولدىق. كەش سوڭىندا ۋنيۆەرسيتەت رەكتورى ەرلان سىدىقوۆ ەلوردا جۇرتشىلىعى اتىنان ءا.قاشاۋباەۆ اتىنداعى مەملەكەتتىك فيلارمونيا ۇجىمىنا ريزاشىلىعىن جەتكىزدى.
