قوعام • 12 ماۋسىم، 2022

بوزوقتان بوتايعا دەيىن...

34 رەت كورسەتىلدى

ەلىمىزدەگى ات ءتۋريزمىن دارىپتەپ جۇرگەن شاباندوزدار اقمولا جانە سولتۇستىك قازاقستان وبلىستارىنىڭ كيەلى جەرلەرىنە ساياحاتقا شىقتى. جەتى كۇندىك ەكسپەديتسيانىڭ ماقساتى – بوزوق قالاشىعى مەن بوتاي مادەنيەتى سەكىلدى ۇلتتىق ماڭىزى بار ەسكەرتكىشتەردى جۇرتشىلىققا كەڭىرەك ناسيحاتتاۋ. سونداي-اق قازاقستانداعى ەكولوگيالىق ءتۋريزمدى ودان ءارى دامىتۋدى دا كوزدەگەن.

مازمۇندى ءىس-شاراعا مادەنيەت جانە سپورت ءمينيسترى داۋرەن اباەۆ، عالىمدار، At-trاvel كلۋبىنىڭ وكىل­دەرى مەن قوعام بەلسەندىلەرى قاتىسىپ، ەكسپەديتسيا مۇشەلەرىنە ءسات-ساپار تىلەدى.

– وسى دالادا ادامزات العاش رەت جىلقىنى قولعا ۇيرەتتى. بوتاي مادەنيەتى – سول ۇلى وركەنيەتتىڭ باس­تاۋى. بوزوق قالاشىعى – ەڭسەلى ەلوردامىزدىڭ التىن تامىرى. بۇل جەردە ۇلتتىق پارك قۇرۋ ارقىلى ءبىز كونە تاريحىمىزدى جاس ۇرپاققا ناسيحاتتايمىز. مادەنيەت جانە سپورت مينيسترلىگى اشىق اسپان استىنداعى ۇلتتىق مۋزەي قۇرىلىسىن كەزەڭ-كەزەڭمەن جۇزەگە اسىرۋدى كوزدەيدى. الداعى ۋاقىتتا دا «بوزوق» مۋزەي-قورىعىنىڭ جۇمىسى جاندانا بەرەدى. سولتۇستىك قازاقستان مەن اقمولا وبلىستارىنىڭ اراسىن اتپەن ءجۇرىپ وتەتىن ەكسپەديتسيانىڭ ءمانى ەرەكشە. وسىنداي ءىس-شارالار ارقىلى اتقا ءمىنۋدى ناسيحاتتايمىز، تاريحىمىزبەن تانىسامىز، ەكو-ءتۋريزمدى دامىتامىز. ەكسپەديتسيانى ۇيىمداستىرۋعا ۇلەس قوسقان بارشاڭىزعا العىس ايتامىن، – دەدى داۋرەن اباەۆ.

ايتا كەتەيىك، بوزوق – استانا ىرگەسىندە ورنالاسقان 1250 جىلدىق تاريحى بار كونە قالاشىق بولسا، بوتاي – ەرتەدەگى ەۋرازيا جىلقى وسىرۋشىلەرىنىڭ بىرەگەي قونىسى. بۇل مادەنيەت ءبىزدىڭ زامانىمىزعا دەيىنگى V-IV عاسىرلاردا داۋىرلەدى. وندا جۇرگىزىلگەن زەرتتەۋلەردىڭ تاريحي ماڭىزى – جىلقىلاردى قولعا ۇيرەتۋدىڭ الەمدەگى بىردەن ءبىر ورتالىعى قازاقستان ەكەنىن دالەلدەيدى.

سوڭعى جاڭالىقتار

قازاقستاندا قانشا ادام ۆاكتسينا الدى

كوروناۆيرۋس • بۇگىن، 10:42

ۇقساس جاڭالىقتار