الەم • 11 ماۋسىم، 2022

اقش-قا كەلەتىن جولاۋشىلاردان ەندى كوروناۆيرۋسقا تەست تالاپ ەتىلمەيدى

الداعى جەكسەنبىدەن باستاپ اقش-قا ۇشىپ كەلگەن جولاۋشىلاردان COVID-19-بەن اۋىرمايتىنىڭىزدى راستايتىن انىقتاما تالاپ ەتىلمەيدى. تاپ وسىنداي تالاپ كانادا، ۇلىبريتانيا مەن وزگە دە بىرقاتار مەملەكەتتەردە ەنگىزىلگەن، دەپ حابارلايدى Egemen.kz BBC News اگەنتتىگىنە سىلتەمە جاساپ.

ارمان ماناربەك ۇلى

اقش كوروناۆيرۋسپەن كۇرەسكە باعىتىندا ۇلكەن جەتىستىككە جەتتى. ەل ءبيىلى تەست تاپسىرۋ تالابىن الىپ تاستاۋعا وسى جاعداي سەبەپ بولىپ وتىرعاندىعىن ايتادى. سونىمەن قاتار تەستى الىپ تاستاۋدى تۋريزم يندۋسترياسىنىڭ وكىلدەرى تالاپ ەتكەن. ويتكەنى ەلگە كەلەر الدىندا تەست تاپسىرۋ تالابى تۋريستەر ءۇشىن ۇرەي تۋدىرادى. ولار تەست ءۇشىن شەكارادا قالىپ قويۋىمىز مۇمكىن دەپ قورقادى. تەست جەكسەنبى، 12 ماۋسىمنان باستاپ الىنادى.

اۋرۋلاردىڭ الدىن الۋ مەن قاداعالاۋ ورتالىقتارى بۇل ساياساتتى 90 كۇننەن سوڭ قايتا تالقىعا سالماق.

بيلىك وكىلدەرى ەلدە ۆيرۋستىڭ جاڭا شتامدارى تابىلا قالسا، تەستىلەۋدى قايتا ەنگىزۋ ەش قيىندىق تۋدىرمايتىنىن ايتادى.

2021 جىلدىڭ قاڭتارىنان باستاپ، اقش-تا اۆياجولاۋشىلاردان ۇشاققا وتىراردان 3 كۇن بۇرىن كوروناۆيرۋسپەن اۋىرمايتىنىن نەمەسە ودان قۇلان-تازا ايىعىپ كەتكەنىن راستايتىن انىقتاما تالاپ ەتۋ ەرەجەسى ەنگىزىلدى.

پرەزيدەنت دجو بايدەن 2021 جىلدىڭ جەلتوقسانىندا بۇل تالاپتى كۇشەيتتى. ەندى انىقتامانى ۇشاققا وتىرارعا 24 ساعات قالعانعا دەيىن وتكىزۋ قاجەت بولعان. بۇعان «وميكرون» شتامى پايدا بولىپ، ۆيرۋس جۇقتىرۋشىلار سانىنىڭ ارتۋى سەبەپ بولعان.

قازىر اقش-قا كەلگىسى كەلەتىن شەتەلدىكتەر ۆاكتسينالانعان بولۋى كەرەك. اقش-تا ۆيرۋس تاراتۋشىلار سانى 2022 جىلدىڭ قاڭتارىنان باستاپ، ازايدى. دەگەنمەن سوڭعى ۋاقىتتا اۋرۋ جۇقتىرۋ كورسەتكىشى ارتا ءتۇستى.

قازىر ەلدە كوروناۆيرۋستان قايتىس بولىپ جاتقاندار سانى پاندەميانىڭ شارىقتاۋ شەگىنە جەتكەن كەزدەگىدەن الدەقايدا تومەن.

وسىعان دەيىن الەمدە كوروناۆيرۋستان قايتىس بولعاندار سانى 2020 جىلدىڭ كوكتەمىندەگى كورسەتكىش دەڭگەيىنە تۇسكەنى حابارلانعان بولاتىن.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز