مۇرات نۇرتىلەۋ اباي وبلىسىنىڭ اكىمى لاۋازىمىنا ۋرانحاەۆ نۇرلان تەلمان ۇلى مەن سمايىلوۆ اسحات سايداحمەت ۇلىنىڭ كانديداتۋرالارىن ۇسىنۋ تۋرالى مەملەكەت باسشىسىنىڭ حاتىن وقىپ بەردى.
اشىق داۋىس بەرۋ ناتيجەسىندە 25 دەپۋتات اسحات سمايىلوۆقا, 89 دەپۋتات نۇرلان ۋرانحاەۆقا داۋىس بەردى.
پرەزيدەنت اكىمشىلىگىنىڭ باسشىسى جاڭادان قۇرىلعان وبلىستىڭ اكىمىن تانىستىرا كەلە, نۇرلان ۋرانحاەۆتىڭ سەمەي قالاسىندا دۇنيەگە كەلگەنىن جانە ونىڭ جاۋاپتى باسقارۋشىلىق قىزمەتتەردە تاجىريبەسى مول ەكەنىن اتاپ ءوتتى.
مۇرات نۇرتىلەۋ وبلىسقا قازاقتىڭ ۇلى اقىنى اباي ەسىمىنىڭ بەرىلۋى حالىقتىڭ رۋحىن كوتەرەتىن تاريحي ءارى ءادىل شەشىم بولعانىن ايتتى.
كەزدەسۋ سوڭىندا مۇرات نۇرتىلەۋ نۇرلان ۋرانحاەۆقا وبلىس تۇرعىندارىنىڭ يگىلىگى ءۇشىن پرەزيدەنت جۇكتەگەن مىندەتتەردى ابىرويمەن اتقارۋدى تىلەدى.
