سەنات توراعاسى ماۋلەن اشىمباەۆ نازارباەۆ ۋنيۆەرسيتەتى جوعارى مەملەكەتتىك ساياسات مەكتەبىنىڭ ماگيستراتۋرا جانە دوكتورانتۋرا تۇلەكتەرىنە ديپلوم تاپسىرۋ راسىمىنە قاتىستى.
پالاتا سپيكەرى بيىلعى تۇلەكتەر ەلىمىز ءۇشىن ەڭ جاۋاپتى جانە ماڭىزدى كەزەڭدە كاسىبي مامان اتانىپ وتىرعاندارىنا نازار اۋداردى.
«كونستيتۋتسيالىق رەفورما جاڭا قازاقستاننىڭ نەگىزى قالايدى. وندا الەۋمەتتىك ادىلەتتىلىك باستى قۇندىلىق بولىپ سانالادى. ءبىرىنشى كەزەكتە, جاڭا قازاقستاندى قۇراتىن ءبىزدىڭ جاستارىمىز ەكەنى انىق», – دەدى ماۋلەن اشىمباەۆ.
سونداي-اق سەنات سپيكەرى بۇگىنگى كونستيتۋتسيالىق وزگەرىستەر اياسىندا مەملەكەتتىك اپپاراتتىڭ جۇمىسىن دا قايتا جانداندىرۋدىڭ ماڭىزدى ەكەنىن ايتتى.
«قازىر ەلىمىزدىڭ الدىندا جاڭا مىندەتتەر تۇر. ونىڭ ءبارى مەملەكەتتىك اپپاراتتان جاڭا ساپانى تالاپ ەتەدى. پرەزيدەنتىمىز اتاپ وتكەندەي, بۇل جەردە مەملەكەتتىك باسقارۋ مودەلىن تۇبەگەيلى وزگەرتۋ ماسەلەسى ءسوز بولىپ وتىر. سوندىقتان مەملەكەتتىك باسقارۋدىڭ تيىمدىلىگىن ارتتىرۋعا ارنالعان جۇيەلى جۇمىستى جالعاستىرعان ءجون», – دەدى ماۋلەن اشىمباەۆ.
وسىعان وراي سەنات توراعاسى بۇگىنگى مەملەكەتتىك قىزمەتشىنىڭ بويىندا بولۋعا ءتيىس قاسيەتتەرگە توقتالدى. ولاردىڭ ءبىرىنشىسى – سانانىڭ اشىقتىعى جانە يننوۆاتسيالىق شەشىمدەرگە دايىن بولۋ.
«قازىرگى تاڭدا مەملەكەتتىك قىزمەتشىلەر بيۋروكراتيانى ازايتىپ, ناقتى ناتيجەگە باسا ءمان بەرۋگە ءتيىس. كوبىنە ءبىزدىڭ مەملەكەتتىك قىزمەتتە شۇعىل, قاۋىرت, قاربالاس جۇمىس ءجۇرىپ جاتسا دا سوڭعى ناتيجە كوڭىل كوڭشىتپەيدى. سوندىقتان بۇل سالادا ناقتى ناتيجە بەرەتىن جوبالىق ءتاسىل ماڭىزدى ءرول اتقارادى», – دەدى ماۋلەن اشىمباەۆ.
سونىمەن قاتار سەنات توراعاسى مەملەكەتتىك قىزمەتشىلەر جاۋاپكەرشىلىكتەن قاشپاۋ كەرەكتىگىن ايتتى. ونىڭ ايتۋىنشا, بۇل بۇگىندە وسى سالاداعى كەمشىلىكتەردىڭ ءبىرى. كوپتەگەن مەملەكەتتىك قىزمەتشىلەر جاۋاپكەرشىلىكتەن قورقىپ, شەشىم قابىلداۋدان قاشقاقتاپ تۇرادى. سوعان بايلانىستى ازاماتتار مەن بيزنەسكە قاتىستى ءبىراز ماسەلە سوزبۇيداعا سالىنىپ, ناقتى شەشىمىن تاپپاي جاتادى. وسىعان وراي مەملەكەتتىك قىزمەتشىلەردى قورعاۋعا ارنالعان قۇقىقتىق اكتىلەر ازىرلەۋ ماسەلەسىنە دە كوڭىل بولگەن ءجون.
ماۋلەن اشىمباەۆ ءار مامان ۇنەمى ءوزىن ءوزى جەتىلدىرىپ, كاسىبي تۇرعىدان شىڭدالىپ وتىرۋى كەرەكتىگىن دە تىلگە تيەك ەتتى.
«بۇگىنگى مەملەكەتتىك باسقارۋشىلار تەرەڭ ءبىلىمدى بولۋعا ءتيىس. سونداي-اق ولار سىني ويلاپ, تەز شەشىم قابىلداي ءبىلۋى كەرەك. ۇجىممەن, ازاماتتارمەن ءتىل تابىسىپ, جۇرگىزىلىپ جاتقان ساياساتتى ادامدارعا انىق ءارى ايقىن تۇسىندىرە الۋى قاجەت. مۇنىڭ ءبارى ۇنەمى ءوز قابىلەتىڭدى ارتتىرىپ وتىرۋدى تالاپ ەتەدى. سوندىقتان ءاردايىم ىزدەنىپ, جاڭا نارسەنى تانۋعا, بىلۋگە, ۇيرەنۋگە ۇمتىلعان ابزال. سونىمەن بىرگە مەملەكەتتىك قىزمەتشى قاشاندا ادالدىق پەن تارتىپكە تابان تىرەۋگە ءتيىس», – دەگەن ماۋلەن اشىمباەۆ تۇلەكتەرگە الداعى ومىردە ساتتىلىك تىلەدى.
