سولتۇستىك قازاقستان وبلىسى كاسىپكەرلەر پالاتاسى ءباسپاسوز قىزمەتىنىڭ مالىمەتىنشە, جولاۋشى تاسىمالىمەن اينالىساتىن كاسىپكەرلەر كومەك سۇراعان. پاندەمياعا بايلانىستى شىعىن شەككەن ولار بۇگىندە جۇمىستارىن قالپىنا كەلتىرۋگە ءازىر.
«سقو اۋماعىندا 4 حالىقارالىق اۆتووتكەل بار. ول قورعان, چەليابى, ەكاتەرينبۋرگكە اپاراتىن «جاڭا جول» اۆتوموبيل وتكىزۋ پۋنكتى, يشيم, تۇمەن, توبىل, سۋرگۋتكە باراتىن «قاراقوعا» جانە ومبىعا اپاراتىن «بيدايىق» بەكەتى. بۇل ءۇش وتكەل ءساۋىر ايىندا اشىلدى, ال حالىقارالىق اۆتوبۋس جۇرەتىن «قىزىل جار» وتكىزۋ پۋنكتى جابىق بولدى. شەكارا قىزمەتىندە بۇل بەكەتتى اشۋ ءۇشىن ۇكىمەتتىڭ ارنايى قاۋلىسى قاجەت ەكەنىن ايتتى, سول سەبەپتى ءبىز كاسىپكەرلەر پالاتاسىنان كومەك سۇرادىق», دەيدى كاسىپكەر الەكساندرا سىسوەۆا.
كاسىپكەرلەردىڭ ءوتىنىشى ەسكەرۋسىز قالماي, ورتالىق اپپاراتقا جىبەرىلدى.
«بىرەر كۇن بۇرىن ەل اۋماعىندا كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ وتىرىسى بولىپ, ول جەردە رەسپۋبليكانىڭ 7 وبلىسىندا قر مەملەكەتتىك شەكاراسىنىڭ جەكەلەگەن ۋچاسكەلەرىندە ۋاقىتشا جابىلعان 12 اۆتوموبيل وتكىزۋ پۋنكتىنىڭ, ونىڭ ىشىندە «قىزىل جار» اۆتوموبيل وتكىزۋ بەكەتىنىڭ جۇمىسىن قالپىنا كەلتىرۋ تۋرالى شەشىم قابىلداندى. ەندى وسى شەشىمنىڭ ىسكە اسۋىن كۇتەمىز», دەيدى سقو كاسىپكەرلەر پالاتاسىنىڭ ساراپشىسى ولگا دوستلەر.
پەتروپاۆلدان پاندەمياعا دەيىن يشيم, تۇمەن, توبىل جانە سۋرگۋت قالالارىنا 6 اۆتوبۋس جۇرگەن. ەكى جىلدىڭ ىشىندە جولاۋشىلار تاسىمالىمەن اينالىسقان كاسىپورىندار قىزمەتكەرلەرىنىڭ جارتىسىنا جۋىعىنان ايىرىلدى.
