كوروناۆيرۋس • 10 ماۋسىم، 2022

قازاقستاندا «ستەلس-وميكرون» شتامى انىقتالدى

561 رەت كورسەتىلدى

قازاقستاننىڭ 12 وڭىرىندە «ستەلس-وميكرون» شتامى انىقتالدى، دەپ حابارلايدى Egemen.kz دەنساۋلىق ساقتاۋ مينيسترلىگىنىڭ ءباسپاسوز قىزمەتىنە سىلتەمە جاساپ.

ء«ساۋىر-مامىر ايلارىندا جۇرگىزىلگەن پتر سكرينينگىنىڭ ناتيجەلەرى بويىنشا كوروناۆيرۋس ينفەكتسياسىنىڭ ءارتۇرلى شتامدارىنىڭ اينالىمى انىقتالدى. بارلىق وڭىرلەردە BA.1 «وميكرون» شتامى – 98،6%، ونىڭ ىشىندە 12 وڭىردە BA.2 «ستەلس-وميكرون» – 36،7%، B.1.617-Delta – 1،4% انىقتالدى. پتر سكرينينگىنىڭ ناتيجەلەرىن راستاۋ ءۇشىن تولىق گەنومدى سەكۆەنيرلەۋ جۇرگىزىلدى. جۇرگىزىلگەن تولىق گەنومدى سەكۆەنيرلەۋ ناتيجەسى بويىنشا BA.2 «ستەلس-وميكرون» شتامىنىڭ – 93،8% (اقتوبە، الماتى، اتىراۋ، شىعىس قازاقستان، قىزىلوردا، قوستاناي، قاراعاندى، ماڭعىستاۋ، پاۆلودار، سولتۇستىك قازاقستان وبلىستارى، الماتى جانە نۇر-سۇلتان قالالارى)، BA.1 «وميكرون» شتامىنىڭ – 6،2% (اتىراۋ، قىزىلوردا، قاراعاندى وبلىستارى، الماتى جانە نۇر-سۇلتان قالالارى) اينالىمى انىقتالدى»، دەلىنگەن حابارلامادا.

ەپيدەميولوگيالىق جاعدايدىڭ تۇراقتانۋىنا قاراماستان، مينيسترلىك كوروناۆيرۋس ينفەكتسياسىنا قارسى ۋاقتىلى ۆاكتسيناتسيادان، رەۆاكتسيناتسيادان وتۋگە كەڭەس بەرەدى.

قازىرگى ۋاقىتتا قازاقستاندا كۆي-عا قارسى ۆاكتسيناتسيالاۋ جانە رەۆاكتسيناتسيالاۋ ءۇشىن ۆاكتسينانىڭ 3 ءتۇرى بار (پفايزەر، سينوفارم جانە كازۆاك)، ونىڭ ىشىندە 2-ەۋىن دۇنيەجۇزىلىك دەنساۋلىق ساقتاۋ ۇيىمى ماقۇلداعان.

 

سوڭعى جاڭالىقتار

ۇقساس جاڭالىقتار