سوڭعى ءۇش جىلدا ەلىمىزدە اۋىل شارۋاشىلىعى تاۋار وندىرۋشىلەرىنىڭ ساقتاندىرۋعا دەگەن قىزىعۋشىلىعى ارتىپ كەلەدى: 2020 جىلى 93 كەلىسىم جاسالسا, بيىل 5 ايدىڭ ىشىندە 184 ساقتاندىرۋ جونىندەگى كەلىسىمگە قول قويىلدى.
2004 جىلدان بەرى قولدانىستا بولعان ساقتاندىرۋ جۇيەسى مىندەتتى بولاتىن جانە تەك ەگىنشىلىكتى قامتىعان. 2020 جىلى جۇيە ەرىكتى مەحانيزمگە اۋىسىپ, اگروسەكتوردىڭ كەز كەلگەن باعىتىن ساقتاندىرۋعا جول اشتى. قازىرگى ساقتاندىرۋ ونىمدەرى وسىمدىك شارۋاشىلىعىن جاڭبىر مەن قۋاڭشىلىقتان ساقتاندىرۋمەن قاتار ءىرى قارا, جىلقى, قوي, قۇستاردى دا ساقتاندىرۋدى قامتيدى.
مەملەكەت تاراپىنان ساقتاندىرۋ سىياقىلارىن سۋبسيديالاۋ تۇرىندە قولداۋ بەرىلەدى, بۇل شارۋانىڭ شىعىنىن تومەندەتۋگە مۇمكىندىك بەرەدى. ساقتاندىرۋ كەلىسىمى باعاسىنىڭ 50%-ىن شارۋا تولەسە, 50%-ىن مەملەكەت سۋبسيديالايدى. بۇل ماقساتتا ەكى جىلدىڭ ىشىندە 3,5 ملرد تەڭگە ءبولىندى.
ەلىمىزدەگى اگروساقتاندىرۋ جۇيەسىنە الەمدىك ساقتاندىرۋ نارىعىندا «ا» رەيتينگى بار حالىقارالىق قايتا ساقتاندىرۋ كومپانيالارى تارتىلىپ وتىر. ولار وتاندىق كومپانيالار وزىنە العان تاۋەكەلدەردى قايتا ساقتاندىرادى. بۇل ساقتاندىرۋ جاعدايى تۋىنداعان كەزدە كەپىلدەندىرىلگەن تولەمدى قامتاماسىز ەتەدى.
2021 جىلدىڭ جەلتوقسان ايىنان باستاپ اگروساقتاندىرۋ وپەراتورى – «بايتەرەك» حولدينگىنىڭ ەنشىلەس ۇيىمى سانالاتىن اگرارلىق نەسيە كورپوراتسياسى بولىپ بەكىتىلدى.
جىل ساناپ اگروساقتاندىرۋعا دەگەن قىزىعۋشىلىق ارتىپ كەلەدى. 2020-2021 جىلدارى 254 كەلىسىمشارت جاسالىپ, 265,7 مىڭنان استام گەكتار القاپ, 2,6 ملن ت ۇلىك (ونىڭ ىشىندە ءىرى قارا, ۇساق مال, جىلقى جانە قۇستار) ساقتاندىرىلعان. بيىلعى 5 ايدا 184 كەلىسىم جاسالىپ, 308 مىڭ گا القاپ پەن 60 مىڭنان استام ت ۇلىك ساقتاندىرىلدى.
2020-2021 جىلدارى اۋىل شارۋاشىلىعى تاۋار وندىرۋشىلەرى ساقتاندىرۋ كەلىسىمدەرىن جاساۋعا 350 ملن تەڭگە جۇمساعان. بۇعان مەملەكەتتىك سۋبسيديالاۋ رەتىندە 350 ملن تەڭگە قوسىلدى. ءسويتىپ ساقتاندىرۋ جاعدايى تۋىنداعان كەزدەگى شارۋالارعا تولەنگەن قارجى كولەمى 1 ملرد 333 ملن تەڭگەگە جەتتى.
بيىلعى 5 ايدا تولەنگەن سۋبسيديا كولەمى 500 ملرد تەڭگەدەن اسىپ وتىر. مەيلىنشە اۆتوماتتاندىرىلعان جۇيەدە ەشقايدا بارۋدىڭ قاجەتى جوق, ەلەكتروندى تسيفرلى قولتاڭبامەن www.qoldau.kz پلاتفورماسى ارقىلى ساقتاندىرۋ ءۇشىن شارت جاساسۋعا بولادى, دەپ حابارلادى «اگرارلىق نەسيە كورپوراتسياسى» اق ءباسپاسوز قىزمەتى.
