العاشقى سانى 1921 جىلى 22 ناۋرىزدا تاشكەنت قالاسىندا جارىق كورگەن جاستار باسىلىمنىڭ تۇڭعىش رەداكتورى عاني مۇراتباەۆ بولسا, ايتۋلى اقىن ءىلياس جانسۇگىروۆ جاۋاپتى حاتشى قىزمەتىن اتقارعان. ىرگەتاسىن وسىنداي حالقىمىزدىڭ ارداقتىلارى قالاعان گازەتتە كاكىمجان قازىباەۆ, شەرحان مۇرتازا, سەيداحمەت بەردىقۇلوۆ, ءابىش كەكىلباي ۇلى, فاريزا وڭعارسىنوۆا, ورالحان بوكەي جانە تاعى باسقا قازاق ادەبيەتى مەن جۋرناليستيكاسىنىڭ ءبىر-ءبىر كورنەكتى وكىلىنە اينالعان قانشاما قارىمدى قالامگەرلەر ەڭبەك ەتىپ, قولتاڭبالارىن قالدىردى. سونداي-اق باسىلىم ءار جىلدارى «جاس قايرات», «ورتەڭ», «جاس قازاق», «لەنينشىل جاس» اتاۋلارىمەن جارىق كورىپ, ەلىمىز ازاتتىق العان 1991 جىلدان «جاس الاش» بولىپ شىعا باستادى.
كورمەنىڭ اشىلۋىندا پارلامەنت سەناتىنىڭ دەپۋتاتى نۇرتورە ءجۇسىپ, ءماجىلىس دەپۋتاتى جاناربەك ءاشىمجان, 1986-1994 جىلدارى «جاس الاش» گازەتىندە باس رەداكتور بولعان, بەلگىلى عالىم, قالامگەر ءۋاليحان قاليجان, اقىن, مەملەكەتتىك سىيلىقتىڭ لاۋرەاتى نەسىپبەك ايت ۇلى جانە گازەتتىڭ باس رەداكتورى قايرات ماتىرەكوۆ ءسوز الىپ, ۇلت ۇنىنە اينالعان باسىلىمنىڭ تاريحى مەن وندا قىزمەت ىستەگەن قالامگەرلەر تۋرالى تاعىلىمدى ەستەلىكتەرىمەن ءبولىستى.
سونىمەن قاتار ۇلتتىق مۋزەي ديرەكتورىنىڭ ورىنباسارى نازگۇل قادىرىمبەتوۆا قازاق جۋرناليستيكاسىنىڭ ۇلاعاتتى ۇستاحاناسى بولعان گازەتتىڭ وقىرماندار ءۇشىن ورنى بولەك ەكەنىن ايتا كەلىپ: «جاس الاشتىڭ» ءجۇرىپ وتكەن جولى – ۇلت رۋحانياتىنىڭ شەجىرەسى. باسىلىمنىڭ جۇزجىلدىق تىگىندىسىن تۇگەندەگەن ءاربىر ازامات قازاقتىڭ مۇڭىمەن, قۋانىشىمەن, سۇيىنىشىمەن سۋسىندايدى» دەپ جينالعان قاۋىمعا جىلى لەبىزىن جەتكىزدى.
كورمەگە عاسىر جاساعان باسىلىمنىڭ شىعۋ كەزەڭىنەن باستاپ, بۇگىنگە دەيىنگى تاريحىن بەينەلەگەن مازمۇندى مالىمەتتەر مەن قۇندى دەرەكتەر, ايشىقتى سۋرەتتەر جانە سوندا قىزمەت اتقارعان قالامگەرلەردىڭ جازبالارى مەن كىتاپتارى قويىلىپ, وعان كەلۋشىلەردىڭ قىزىعۋشىلىعىن تۋعىزدى.
