سوڭعى اپتالاردا قاتتى جاۋعان جاڭبىر سالدارىنان قىتايدىڭ وڭتۇستىگىندەگى ۇيلەر مەن جولدار زاقىمدالدى.
«حۋنان پروۆينتسياسىندا وسى ايدا 10 ادام قازا تاۋىپ, ءۇش ادام ءىز-ءتۇزسىز جوعالىپ كەتتى. 286 مىڭ ادام ەۆاكۋاتسيالاندى. بارلىعى 1,79 ميلليون ادام زارداپ شەكتى», دەپ حابارلادى شەنەۋنىكتەر ءباسپاسوز ءماسليحاتىندا.
بەلگىلى بولعانداي, 2700-دەن استام ءۇي قيراپ, 96 160 گەكتار ەگىن القابى زاقىمدانعان. قىتايدىڭ كۇرىش وندىرەتىن نەگىزگى ورتالىعى ۇلكەن شىعىنعا ۇشىراعان.
وتكەن ايدىڭ سوڭىندا سۋ تاسقىنى مەن كوشكىننىڭ سالدارىنان جاعالاۋداعى فۋتسزيان پروۆينتسياسىندا سەگىز ادام, وڭتۇستىك-باتىس يۋننان پروۆينتسياسىندا بەس ادام جانە گۋانسي پروۆينتسياسىندا ەكى بالانى سۋ تاسقىنى الىپ كەتكەن.
قىتاي بيلىگى وتكەن جازدا ورتالىق حەنان پروۆينتسياسىندا جاڭبىر سالدارىنان بولعان جويقىن سۋ تاسقىنىنان 398 ادام قازا تاپقاننان كەيىن, بيىلعى سۋ تاسقىنى ماۋسىمىنا دايىندىق جۇمىستارىن پىسىقتاپ جاتىر.
گۇلدانا ەلۋباي
