ايماقتار • 09 ماۋسىم، 2022

تەننيس ورتالىعى اشىلدى

تۇركىستان قالاسىندا سوڭعى 3 جىلدا الەمدىك دەڭگەيدەگى بىرنەشە سپورت نىسانى بوي كوتەردى. ستاديون، Olympic Center سپورت كەشەنى پايدالانۋعا بەرىلدى. «مۇز سارايى»، بەكزات ساتتارحانوۆ سپورت كەشەنى سالىنۋدا. ال كۇنى كەشە تەحنيكالىق اشىلۋى وتكىزىلگەن سالتاناتتى جيىنعا 14 جاسقا دەيىنگى ەلىمىزدىڭ ءبىرىنشى راكەتكاسى، ەۋروپادا توپ جارىپ جۇرگەن زاڭعار نۇرلان ۇلى قاتىستى.

عالىمجان ەلشىباي

ورتالىقتىڭ تەحنيكالىق اشىلۋىنا قاتىسقان وبلىس اكىمى ومىرزاق شوكەەۆ سپورتشىلار مەن جاتتىقتىرۋشىلاردى قۇتتىقتادى. «ەۋروپا رەيتينگىسىنىڭ چەمپيوندىق كەستەسىندە كوش باستاپ كەلە جاتقان زاڭعار نۇرلان ۇلى كەلەشەكتە دجوكوۆيچ، نادال سەكىلدى تەننيس جۇلدىزىنا اينالادى دەپ سەنەمىز. وسى تەننيس ورتالىعىندا الداعى ۋاقىتتا رەسپۋبليكالىق، حالىقارالىق جارىستار ءوتىپ تۇرادى. جاسوسپىرىمدەر مەن جاستارىمىز، تەننيسسۇيەر قاۋىم وسىندا شەبەرلىكتەرىن شىڭدايدى»، دەدى ومىرزاق شوكەەۆ. سلوۆاكيادا وتكەن Tennis Europe سەرياسىنىڭ Baseline Open U14 ەكىنشى ساناتتى ءتۋرنيرىنىڭ چەمپيونى جانە وزگە دە دودالاردىڭ جەڭىمپازى اتانىپ جۇرگەن جاس تەننيسشى زاڭعار نۇرلان ۇلى تۇركىستاندىقتارعا جىلى لەبىزىن ءبىلدىردى. «سپورتتاعى ەڭ العاشقى قادامىمدى 4 جاسىمدا تۇركىستان وڭىرىندە باستاعام. سپورتتا ەڭ باستىسى – جاۋاپكەرشىلىك. تىنىمسىز شىڭدالۋ، الدىڭا ماقسات قويۋ ارقىلى عانا جەڭىسكە جەتۋگە بولادى. كۇنىنە 4 ساعات جاتتىعامىن. تۇركىستانعا ەكى جىل بۇرىن كەلگەم، قازىر وزگەرىپ كەتىپتى»، دەيدى زاڭعار. Tennis Europe ۇيىمىنىڭ مونتە-كارلو قالاسىندا بيىل كۇزدە وتەتىن Junior Masters جارىسىنا وراي جاڭارتىلعان رەيتينگىندە زاڭعار نۇرلان ۇلى 520 ۇپايمەن ءبىرىنشى ورىندا تۇر. سۇحباتتارىنىڭ بىرىندە زاڭعار «ۇلكەن دۋلىعا» ءتۋرنيرىن ۇتۋ – ارمانى ەكەنىن ايتقان بولاتىن.

تۇركىستانداعى تەننيس ورتالىعىنىڭ سىرتقى فاساد جۇمىستارى مەن ينجەنەرلىك جەلىلەرى، اكىمشىلىك عيماراتىنىڭ 1،2 قاباتتارىندا ىشكى ارلەۋ جۇمىستارى تولىق اياقتالعان. ورتالىقتا 11 تەننيس كورتى، كورەرمەندەرگە ارنالعان جينالمالى مىنبەلەر، امبەباپ ويىن الاڭى، بالالار ويىن الاڭى جانە اۆتوتۇراعى بار.

تۇركىستان

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز