وبلىستىق كاسىپكەرلىك جانە تۋريزم باسقارماسىنىڭ باسشىسى نۇربول جاڭابەكوۆتىڭ ايتۋىنشا, ءساۋىر ايىنان بەرى 536 توننا قانت جەتكىزىلىپتى. ونىڭ 408 تونناسى «يدەال ماركەت» جشس-ءنىڭ ساۋدا جەلىلەرىنە, ال 128 تونناسى وزگە سۋپەرماركەتتەرگە بەرىلگەن. ەندى الماتى وبلىسىنداعى «كوكسۋ قانت» زاۋىتىنان 408 توننا قانت جەتكىزۋگە كەلىسىم جاسالعان.
– سۋپەرماركەت جەلىلەرىندە قانت ءار ادامعا ءۇش كيلودان ساتىلادى. ويتكەنى جەكە دۇكەن يەلەرى نەمەسە باسقا دا تۇتىنۋشىلار قانتتى ءبىر مەزەتتە تومەن باعامەن كوپ مولشەردە ساتىپ الۋى مۇمكىن. ءسويتىپ, قانت باعاسىنا ۇستەمە قوسىپ, قىمباتقا ساتادى. سوندىقتان, سۋپەرماركەتتەردە قانت بەلگىلى ءبىر مەرزىمدە عانا سورەگە شىعارىلادى, – دەيدى ن.جاڭابەكوۆ.
ساۋدا ورىندارىنداعى ازىق-تۇلىك باعاسىنا رەيد جۇرگىزىلىپ جاتىر. مۇنداي مونيتورينگتى اپتاسىنا بىرنەشە رەت جۇرگىزۋ كوزدەلگەن. «بۇل ازىق-ت ۇلىك باعاسىنىڭ تۇراقتىلىعىن, نەگىزسىز وسۋىنە باقىلاۋ ءۇشىن قولعا الىندى. ماقسات – تۇرعىندارعا ازىق-تۇلىكتىڭ قولجەتىمدى باعامەن ۇسىنىلۋىن قاداعالاۋ», دەيدى باسقارما باسشىسى.
«يدەال ماركەت» جشس قويما لوگيستيكاسى بەكەتىنىڭ ديرەكتورى قۋانىش الىمبەتوۆتىڭ مالىمەتىنشە, وسى اپتادا الماتى وبلىسىنداعى «كوكسۋ قانت» زاۋىتىنان 2 ۆاگونمەن 66 توننا قانت جەتكىزىلگەن. بۇل تاۋار «يدەال» جانە «ليدەر» سۋپەرماركەتتەرىنىڭ 35 ساۋدا نۇكتەسىنە ساتىلىمعا شىعارىلادى.
– قازىر اتىراۋدا بولشەك ساۋداداعى قانتتىڭ باعاسى – 385 تەڭگە. ەندى ساتىلىمعا شىعارىلاتىن قانتتىڭ
1 كيلوسى 500-517 تەڭگەدەن باستالادى. بۇعان تاسىمالداۋ قۇنىنىڭ قىمباتتاۋى سەبەپ بولىپ تۇر. جاقىن كۇندەرى وتاندىق زاۋىتتان تاعى ەكى ۆاگونمەن قانت جەتكىزۋ كوزدەلىپ وتىر, – دەپ ءمالىم ەتتى قۋانىش الىمبەتوۆ.
اتىراۋ وبلىسى
